ရန်ကုန်၊ဩဂုတ်-၁၁
ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) တွင် အွန်လိုင်းမှတ်ပုံတင်စနစ်ဖြင့် ဖွဲ့စည်းမှတ်ပုံတင်ထားသော ကုမ္ပဏီများအနေဖြင့် မြန်မာနိုင်ငံကုမ္ပဏီများဥပဒေပါ ပြဌာန်းချက်များကို လိုက်နာဆောင်ရွက်ရမည်ဖြစ်ကြောင်း DICA က အသိပေးထားသည်။
ထို့ပြင် မိမိတို့ လုပ်ကိုင်ဆောင်ရွက်နေသော လုပ်ငန်းနှင့်သက်ဆိုင်သည့်အစိုးရဌာန၊ အဖွဲ့အစည်းများမှ ချမှတ် ထားသော အခြားတည်ဆဲဥပဒေ၊ နည်းဥပဒေများကို လိုက်နာဆောင်ရွက်ရန် လိုအပ်ကြောင်း DICA က အသိပေးထားသည်။
ထို့အပြင် ကုမ္ပဏီများ၏ လုပ်ငန်းဆောင်ရွက်မှုနှင့် သက်ဆိုင်သည့် အစိုးရဌာနများ၊ အဖွဲ့အစည်းများက ချမှတ်ထားသော တည်ဆဲဥပဒေ၊ နည်းဥပဒေများကို လိုက်နာမှုမရှိကြောင်း တွေ့ရှိပါက DICA ဝက်ဘ်ဆိုက်မှတစ်ဆင့် မှတ်ပုံတင်အရာရှိက အများပြည်သူသိရှိနိုင်ရန် ထုတ်ပြန်ကြေညာသွားမည်ဖြစ်ကြောင်း သိရသည်။
ယင်းထုတ်ပြန်ချက်တွင် ပူးတွဲဖော်ပြထားသည့် ကုမ္ပဏီ ၂၃ ခုနှင့် ကုမ္ပဏီဒါရိုက်တာအဖွဲ့ဝင်များသည် မြန်မာ့နိုင်ငံခြားကုန်သွယ်မှုဘဏ်ချေးငွေ (၂၀၂၄) ဖြစ်စဉ်တွင် ချေးငွေရယူပြီး ချေးငွေဆက်လက်ပေးဆပ်ရန် ပျက်ကွက်နေသည့် ကုမ္ပဏီများ ဖြစ်သဖြင့် ဘဏ္ဍာရေးနှင့်အခွန်ဝန်ကြီးဌာနက အမည်မည်းစာရင်း (Black List) ထည့်သွင်းသတ်မှတ်ထားကြောင်း DICA ၏ အသိပေးကြေညာချက်တွင် ဖော်ပြထားသည်။
DICA အနေဖြင့် ကုမ္ပဏီများအား သက်ဆိုင်ရာဥပဒေ၊ နည်းဥပဒေများကို လိုက်နာဆောင်ရွက်ရန်နှင့် သက်ဆိုင်ရာအစိုးရဌာန၊ အဖွဲ့အစည်းများ၏ သတ်မှတ်ချက်များကို လိုက်နာရန် ထပ်မံအသိပေးထားခြင်းဖြစ်သည်။
အဆိုပါ အသိပေးကြေညာချက်ကို ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန က ထုတ်ပြန်ထားခြင်းဖြစ်ပြီး ကုမ္ပဏီ ၂၃ ခုနှင့် ဒါရိုက်တာအဖွဲ့ဝင်များအား Black List သတ်မှတ်ထားကြောင်း အများပြည်သူသိရှိနိုင်ရန် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန ၏ website တွင် အသိပေးထုတ်ပြန်ထားသည်။