စစ်ရေးဝန်ကြီး ပိဟက်ဂ်ဆက် (Pete Hegseth) ကို သဘောမကျဘူးဆိုတာရယ်၊ လက်နက်ပြတ်လပ်မှုတွေနဲ့ ပတ်သက်ပြီး ဝန်ကြီးကို ဝေဖန်ခဲ့တယ်ဆိုတာရယ်ကို အမေရိကန်သမ္မတ ဒေါ်နယ်ထရမ့်က ငြင်းပယ်လိုက်ပါတယ်။
”သတင်းတု မီဒီယာတွေက ထုံးစံအတိုင်းပဲ အခြေအမြစ်မရှိတဲ့ ကောလာဟလအမှားတွေကို ဖြန့်နေကြတယ်။ ပိဟက်ဂ်ဆက်ရဲ့ လုပ်ဆောင်ချက်တွေအပေါ် ကျွန်တော် အရမ်းကို ကျေနပ်အားရမိပါတယ်” လို့ သူက Truth Social လူမှုကွန်ရက်မှာ ရေးသားခဲ့ပါတယ်။ ဗင်နီဇွဲလားအပေါ် အမေရိကန်စစ်တပ်ရဲ့ စစ်ဆင်ရေးရလဒ်တွေမှာဆိုရင် ပိုပြီးတော့တောင် ကျေနပ်ရပါတယ်လို့ သူက ဆက်ပြောပါတယ်။ ဒါ့အပြင် အီရန်နဲ့ ဖြစ်နေတဲ့ ပဋိပက္ခတွေမှာလည်း တို-က်ပွဲတွေက “အရမ်းကို အဆင်ပြေနေတယ်” လို့ ထရမ့်က ဆိုပါတယ်။
သမ္မတရဲ့ ပြောကြားချက်အရ အီရန်ဟာ “နျူကလီးယားလက်နက် ဘယ်တော့မှ မပိုင်ဆိုင်နိုင်စေဖို့အတွက် ချေမှုန်းခံလိုက်ရပြီ” လို့ ဆိုပါတယ်။ ဒီကောလာဟလတွေဟာ The Washington Post သတင်းစာရဲ့ ဖော်ပြချက်ကနေ စတင်ခဲ့တာလို့ ထရမ့်က ဆက်ပြောပါတယ်။ အမေရိကန်ခေါင်းဆောင်က အဆိုပါသတင်းစာကို “အဆိုးဆုံး မီဒီယာတွေထဲက တစ်ခု” လို့ ခေါ်ဆိုခဲ့ပြီး သူတို့ရဲ့ လုပ်ရပ်က နိုင်ငံတော်သစ္စာဖောက်မှုနဲ့တောင် တူနေတယ်လို့ နှိုင်းယှဉ်ပြောဆိုခဲ့ပါတယ်။
The Washington Post သတင်းစာကတော့ အီရန်နဲ့ ထိပ်တို-က်တွေ့ဆုံမှုမှာ လက်နက်ပြတ်လပ်နေတဲ့ကိစ္စနဲ့ ပတ်သက်ပြီး ပင်တဂွန် (အမေရိကန်ကာကွယ်ရေးဌာန) က သူ့ကို ဘာလို့ လှည့်စားခဲ့တာလဲဆိုတာ ရှင်းပြဖို့ ဇူလိုင် ၃၁ ရက်နေ့က ထရမ့်က ဟက်ဂ်ဆက်ကို တောင်းဆိုခဲ့တယ်လို့ သတင်းရင်းမြစ်တွေကို ကိုးကားပြီး ဖော်ပြခဲ့တာပါ။ သတင်းစာရဲ့ အဆိုအရ ခဲယမ်းမီးကျောက် ပြဿနာ ဖြေရှင်းပြီးပြီလို့ ထရမ့်က ယုံကြည်ထားတဲ့အတွက် ဟက်ဂ်ဆက်ကို ဝေဖန်ခဲ့တာလို့ ဆိုပါတယ်။ ဒီလို အချေအတင်ဖြစ်မှုက ပင်တဂွန်အကြီးအကဲအပေါ် အမေရိကန်သမ္မတရဲ့ ဒေါသထွက်မှုတွေ ပိုတိုးလာနေတယ်ဆိုတာကို ပြသနေတယ်လို့ အဲဒီသတင်းမှာ မှတ်ချက်ပြုထားပါတယ်။
ဩဂုတ်လ ၅ ရက်နေ့မှာတော့ ပင်တဂွန်ရဲ့ အဓိက ခဲယမ်းမီးကျောက် လက်ကျန်တွေဟာ အန္တရာယ်ရှိလောက်တဲ့အထိ ကျဆင်းနေပြီဆိုတဲ့ CNN ရဲ့ သတင်းဟာ မမှန်ကန်ဘူးလို့ ဟက်ဂ်ဆက်က X (တွစ်တာ) မှာ ပြောခဲ့ပါတယ်။
ဇူလိုင်လနှောင်းပိုင်းမှာ AP သတင်းဌာနက ဖော်ပြခဲ့သလိုပဲ၊ အမေရိကန်စစ်တပ် ပူးတွဲစစ်ဦးစီးချုပ်များအဖွဲ့ ဥက္ကဋ္ဌ ဒန် ကိန်းက လက်ရှိ ဒုံးကျည်လက်ကျန် အခြေအနေတွေကြောင့် အီရန်နဲ့ ပဋိပက္ခကို ဒီထက်ပိုပြီး အရှိန်မြှင့်တင်ဖို့ ဝါရှင်တန်အတွက် အကန့်အသတ်တွေ ရှိနေတယ်လို့ သမ္မတကို ပြောခဲ့ပါတယ်။ အီရန်အပေါ် အပြည့်အဝ စစ်ရေးအရ အရေးယူမှုတွေ ပြန်မလုပ်ဖို့ ဆုံးဖြတ်ခဲ့ရတဲ့ အကြောင်းရင်းတွေထဲမှာ လေကြောင်းရန်ကာကွယ်ရေး ဒုံးကျည်တွေ အပါအဝင် ခဲယမ်းမီးကျောက် ပြတ်လပ်မှုကလည်း အကြောင်းရင်းတစ်ခု ဖြစ်တယ်ဆိုတဲ့ သတင်းတွေကို ထရမ့်က အစောပိုင်းမှာ ငြင်းဆိုခဲ့ပါသေးတယ်။