ဗီယက်နမ်စစ်ပွဲတွင်ကျဆုံးခဲ့သောမြောက်ကိုရီးယားစစ်သည်များအတွက် အောက်မေ့ဖွယ်အထိမ်းအမှတ် တည်ဆောက်မည်

          
ဗီယက်နမ်စစ်ပွဲအတွင်းကျဆုံးခဲ့သော မြောက်ကိုရီးယားစစ်သည်များအတွက် ရည်စူး၍ ဗီယက်နမ်က အောက်မေ့ဖွယ်အဆောက်အအုံတစ်ခု ကို တည်ဆောက်မည်ဖြစ်ကြောင်း နိုင်ငံပိုင်မီဒီယာက သတင်းဖော်ပြခဲ့ပြီး စစ်ပွဲကာလအတွင်း ပြုံယမ်း၏ စစ်ရေးအခန်းကဏ္ဍကို ရှားရှားပါးပါး လူသိရှင်ကြား အသိအမှတ်ပြုခြင်းဖြစ်သည်။
      
ဗီယက်နမ်နှင့် မြောက်ကိုရီးယားနိုင်ငံပိုင်မီဒီယာများ၏ အဆိုအရ မြောက်ကိုရီးယားသည် ၁၉၆၀ ပြည့်လွန်နှစ်များတွင် မြောက်ဗီယက်နမ်သို့ တိုက်လေယာဉ်မှူးများ စေလွှတ်ခဲ့ပြီး ၎င်းတို့သည် အမေရိကန်လေယာဉ်များနှင့် တိုက်ခိုက်ရေးမစ်ရှင်တွင် ဆိုဗီယက်လုပ် MiG-17 များကို စီးနင်းတိုက်ပွဲဝင်ခဲ့သည်။
      
ဗီယက်နမ်နှင့် မြောက်ကိုရီးယားတို့သည် စစ်အေးတိုက်ပွဲကာလမှစကာ သံတမန်ဆက်ဆံရေးကို ထိန်းသိမ်းထားသော်လည်း ဗီယက်နမ်စစ်ပွဲတွင် ပြုံယမ်း၏ တိုက်ရိုက်ပါဝင်ပတ်သက်မှုကို မသိကြ သလောက်ဖြစ်သည်။
        
အဆိုပါ အောက်မေ့ဖွယ်စီမံကိန်းနှင့် ပတ်သက်၍ တနင်္လာနေ့က ဟနွိုင်တွင် ဒုတိယကာကွယ်ရေးဝန်ကြီး ငုယင်ထရွန်သန် ဦးဆောင်သော အစည်းအဝေးတွင် ဆွေးနွေးခဲ့ပြီး မြောက်ကိုရီးယားသံအမတ်ကြီး ရီဆွန်ဂွတ် တက်ရောက်ခဲ့ကြောင်း ကာကွယ်ရေးဝန်ကြီးဌာန၏ Quan Doi Nhan Dan သတင်းစာက ဖော်ပြခဲ့သည်။
      
ဗီယက်နမ်ပါတီ၊ နိုင်ငံတော်၊ ပြည်သူနှင့် ပြည်သူ့တပ်မတော်တို့သည် မြောက်ကိုရီးယား၏ ထိရောက်သော အကူအညီနှင့် အတိတ်ကာလက နိုင်ငံတော်လွတ်လပ်ရေးကြိုးပမ်းမှုတွင် မြောက်ကိုရီးယားအာဇာနည်များ၏ စွန့်လွှတ်အနစ်နာခံမှုများကို အမြဲတန်ဖိုးထား အောက်မေ့သတိရပါသည် ဟု သန်က ပြောဆိုကြောင်း Quan Doi Nhan Dan က ဖော်ပြခဲ့သည်။
       
မြောက်ပိုင်း Bac Ninh ပြည်နယ်ရှိ မြောက်ကိုရီးယားအာဇာနည်များ၏ သုဿန်တွင် ပြန်လည်မွမ်းမံမှုလုပ်ငန်း၏ တစ်စိတ်တစ်ပိုင်းအဖြစ် အောက်မေ့ဖွယ်အဆောက်အအုံကို တည်ဆောက်သွားမည်ဖြစ်ကြောင်း သတင်းတွင် ဆက်လက်ဖော်ပြခဲ့သည်။
     
ထိုသုဿန်ကို ၁၉၆၇ ခုနှစ်နှင့် ၁၉၆၈ ခုနှစ်များတွင် ကျဆုံးခဲ့သော အသက် ၁၉ နှစ်မှ ၄၀ နှစ်ကြားအရွယ်ရှိ မြောက်ကိုရီးယားလေတပ်သား ၁၄ ဦးအတွက် တည်ထောင်ခဲ့ခြင်းဖြစ်သည်။ ၎င်းတို့၏ ရုပ်ကြွင်းများကို ၂၀၀၂ ခုနှစ်တွင် မြောက်ကိုရီးယားသို့ ပြန်လည်ပို့ဆောင်ပေးခဲ့သည်။

Ref: ရိုက်တာ