ရန်ကုန်၊ ဩဂုတ် ၃
တရုတ်နိုင်ငံ၊ ဟောင်ကောင်တက္ကသိုလ်၌ ဩဂုတ် ၂ ရက်မှ ၈ ရက်အထိ ကျင်းပမည့် (၁၆) ကြိမ်မြောက် အာရှသိပ္ပံစခန်းချနေထိုင်ခြင်း အစီအစဉ် (Asian Science Camp 2026) သို့ မြန်မာနိုင်ငံမှ ကျောင်းသား ၂ ဦးနှင့် ကျောင်းသူ ၃ ဦး၊ စုစုပေါင်း ၅ ဦး တက်ရောက်ခွင့် ရရှိခဲ့ကြောင်း သိရသည်။
အဆိုပါ အာရှသိပ္ပံစခန်းချနေထိုင်ခြင်း အစီအစဉ်ကို ၂၀၀၇ ခုနှစ်မှ စတင်၍ ဂျပန်၊ အိန္ဒိယ၊ ကိုရီးယား၊ အစ္စရေး၊ စင်ကာပူ၊ ထိုင်း၊ မလေးရှား၊ အင်ဒိုနီးရှားနှင့် တရုတ် အပါအဝင် အာရှတိုက်အတွင်းရှိ နိုင်ငံများ၌ နှစ်စဉ် အလှည့်ကျ ကျင်းပခဲ့ခြင်းဖြစ်သည်။
ယင်းအစီအစဉ်တွင် အာရှတိုက်မှ နိုဘယ်ဆုရ သိပ္ပံပညာရှင်များ ကိုယ်တိုင် ပါဝင်တက်ရောက်၍ ကျောင်းသား၊ ကျောင်းသူ လူငယ်များနှင့်အတူ စခန်းချနေထိုင်ကာ သိပ္ပံပညာရပ်ဆိုင်ရာ ဟောပြောပွဲများ၊ လေ့လာရေးခရီးစဉ်များနှင့် ပြိုင်ပွဲများကို ထည့်သွင်းကျင်းပလေ့ရှိပြီး နှစ်စဉ် အာရှတိုက်မှ လူငယ် ၃၀၀ ခန့် ပါဝင်ဆင်နွှဲလျက်ရှိကြောင်း သိရသည်။