ကွာလာလမ်ပူ၊ ဇူလိုင် ၂၅
မလေးရှားနိုင်ငံ၏ အစ္စရေးဆိုင်ရာ ရေရှည်ရပ်တည်လာသည့် မူဝါဒနှင့်ပတ်သက်၍ အမေရိကန်ပြည်ထောင်စုဆိုင်ရာ မလေးရှားသံအမတ်ကြီးကို အမေရိကန်နိုင်ငံခြားရေးဌာနက ဆင့်ခေါ်တွေ့ဆုံခဲ့ကြောင်း မလေးရှားနိုင်ငံပိုင် ဘနားမား (Bernama) သတင်းဌာနက ဖော်ပြသည်။
မလေးရှားနိုင်ငံက အစ္စရေးကို နိုင်ငံအဖြစ် အသိအမှတ်မပြုသည့် မူဝါဒမှာ အသစ်မဟုတ်ဘဲ ကာလရှည်ကြာ ကျင့်သုံးလာသည့် မူဝါဒဖြစ်ကြောင်း အမေရိကန်နိုင်ငံဆိုင်ရာ မလေးရှားသံအမတ်ကြီး မူဟာမက် ရှားရူလ် အီခရမ် ယာကွတ်က အမေရိကန်နိုင်ငံခြားရေးဌာနသို့ ရှင်းလင်းပြောကြားခဲ့ကြောင်း မလေးရှားနိုင်ငံခြားရေးဝန်ကြီး မိုဟာမက် ဟာဆန်က ပြောကြားခဲ့သည်။
“အစ္စရေးနိုင်ငံနှင့် ဇီယွန်ဝါဒီအစိုးရကို အသိအမှတ်မပြုခြင်းမှာ မလေးရှား၏ လူဝင်မှုကြီးကြပ်ရေးမူဝါဒနှင့် နိုင်ငံခြားရေးမူဝါဒ၏ အစိတ်အပိုင်းဖြစ်ပြီး ယင်းသည် ကျွန်တော်တို့၏ တရားဝင်ရပ်တည်ချက်ဖြစ်သည်” ဟု ဟာဆန်က ပြောကြားကြောင်း ဘနားမားသတင်းဌာနက ဖော်ပြသည်။
ဟာဆန်၏ ပြောကြားချက်အရ အမေရိကန်နှင့် အစ္စရေး နှစ်နိုင်ငံသားခံယူထားသူတစ်ဦးသည် အမေရိကန်ပတ်စ်ပို့ဖြင့် မလေးရှားနိုင်ငံသို့ ဝင်ရောက်ခဲ့သော်လည်း နောက်ပိုင်း စိစစ်မှုများတွင် အစ္စရေးပတ်စ်ပို့ကိုလည်း ကိုင်ဆောင်ထားကြောင်း တွေ့ရှိခဲ့သဖြင့် နိုင်ငံမှ ထွက်ခွာရန် ညွှန်ကြားခဲ့ကြောင်း သိရသည်။
မလေးရှားနိုင်ငံသည် အစ္စရေးနှင့် သံတမန်ဆက်ဆံရေး မရှိသလို ပါလက်စတိုင်းအရေးကို အခိုင်အမာ ထောက်ခံလျက်ရှိပြီး ဂါဇာနှင့် ဂျော်ဒန်မြစ် အနောက်ကမ်းဒေသ၌ အစ္စရေး၏ စစ်ရေးဆောင်ရွက်မှုများကိုလည်း ဆန့်ကျင်ကြောင်း ထပ်မံအတည်ပြုခဲ့သည်။
ယခုအငြင်းပွားမှုမှာ အမေရိကန်ရင်းနှီးမြှုပ်နှံသူ ဘာလာဂျီ စရီနီဗာဆန် တည်ထောင်ထားသည့် Network School တွင် အစ္စရေးနိုင်ငံသားများ ပါဝင်နေသည်ဟု လူမှုကွန်ရက်ပေါ်တွင် ဝေဖန်မှုများ ထွက်ပေါ်လာပြီးနောက် စတင်ဖြစ်ပွားခဲ့ခြင်းဖြစ်သည်။
မလေးရှားအာဏာပိုင်များ၏ စုံစမ်းစစ်ဆေးမှုအရ ပါဝင်သူအားလုံးသည် တရားဝင် ခရီးသွားစာရွက်စာတမ်းများ ကိုင်ဆောင်ထားကြောင်း တွေ့ရှိခဲ့သော်လည်း ယင်းကျောင်းကို ယာယီပိတ်ထားဆဲဖြစ်ကြောင်း သိရသည်။
ယင်းနောက် မလေးရှားဝန်ကြီးချုပ် အန်ဝါ အီဘရာဟင်မ်က နိုင်ငံအတွင်းရှိ အစ္စရေးနိုင်ငံသားများကို စိစစ်ဖော်ထုတ်၍ ချက်ချင်းနှင်ထုတ်ရန် စီစဉ်နေကြောင်း သတင်းများ ထွက်ပေါ်လာခဲ့ပြီး ယင်းအစီအစဉ်အပေါ် အမေရိကန်လွှတ်တော်အမတ် ရှစ်ဦးက ကန့်ကွက်၍ အမေရိကန်နိုင်ငံခြားရေးဝန်ကြီး မာကို ရူဘီယိုထံ စာပေးပို့ခဲ့သည်။
သို့သော် ယင်းကန့်ကွက်မှုများရှိနေသော်လည်း မလေးရှားနိုင်ငံအနေဖြင့် အစ္စရေးနိုင်ငံသားများအား ပြည်ဝင်ခွင့်ပိတ်ပင်ထားသည့် မူဝါဒကို ဆက်လက်ကျင့်သုံးသွားမည်ဖြစ်ကြောင်း ဝန်ကြီးချုပ် အန်ဝါ အီဘရာဟင်မ်က ထပ်လောင်းပြောကြားခဲ့သည်။
Ref: Al Jazeera / Bernama