ကျွန်းလှ၊ ဇူလိုင် ၂၄
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ် တပ်ကုန်းကျေးရွာ၌ မိုးစပါးပန်းတိုင်အထွက်နှုန်း ရရှိစေရေးအတွက် စံပြကွက်စိုက်ပျိုးခြင်း ကွင်းသရုပ်ပြပွဲကို ဇူလိုင် ၂၄ ရက် နံနက်ပိုင်းက ကျင်းပပြုလုပ်ခဲ့သည်။
အဆိုပါ ကွင်းသရုပ်ပြကို တပ်ကုန်းကျေးရွာ ကွင်းအမှတ် (၄၉၅) ရှိ တောင်သူ ဦးမင်းနိုင်၏ (၃) ဧက လယ်မြေတွင် ပြုလုပ်ခဲ့ပြီး ဒေသတွင်း စပါးစိုက်ပျိုးထုတ်လုပ်မှု တိုးတက်ရေးနှင့် စားနပ်ရိက္ခာဖူလုံရေးကို ရည်ရွယ်ဆောင်ရွက်ခြင်းဖြစ်ကြောင်း သိရသည်။
မြို့နယ်စိုက်ပျိုးရေးဦးစီးဌာန ဦးစီးမှူး ဒေါ်မြင့်မြင့်ရီက ကြိုးတန်း (၁၀) တန်း တစ်တန်းလှပ်စိုက်နည်းကို အသုံးပြုပါက တစ်ဧကလျှင် ကောက်ကွက် (၁.၂) သိန်းမှ (၁.၅) သိန်းအထိ ဝင်ဆံ့နိုင်ပြီး လေဝင်လေထွက်ကောင်းမွန်သည့်အပြင် ပေါင်းထိုးတမန်းနှိုးလုပ်ငန်းများကိုလည်း လွယ်ကူစေကြောင်း ရှင်းလင်းပြောကြားခဲ့သည်။
ထို့ပြင် သိပ္ပံနည်းကျ စိုက်ပျိုးရေးနည်းစနစ်များကို စနစ်တကျ လိုက်နာဆောင်ရွက်နိုင်ပါက တစ်ဧကလျှင် စပါးတင်း (၁၀၀) အထက်အထိ အထွက်နှုန်းရရှိနိုင်ကြောင်းလည်း အသိပေးပြောကြားခဲ့သည်။
ကွင်းသရုပ်ပြပွဲသို့ မြို့နယ်စိုက်ပျိုးရေးကြီးကြပ်မှုကော်မတီဝင်များ၊ စိုက်ပျိုးရေးဦးစီးဌာနမှ တာဝန်ရှိသူများနှင့် ဒေသခံတောင်သူများ တက်ရောက်ကာ မိုးစပါးစံပြကွက် စိုက်ပျိုးဆောင်ရွက်နေမှုများကို လေ့လာကြည့်ရှုခဲ့ကြသည်။
ကျွန်းလှမြို့နယ်သည် စိုက်ပျိုးရေးကို အဓိကအသက်မွေးဝမ်းကျောင်းပြုသည့် ဒေသဖြစ်ပြီး စပါးအပါအဝင် သီးနှံမျိုးစုံ စိုက်ပျိုးထုတ်လုပ်လျက်ရှိရာ ယင်းကဲ့သို့ စိုက်ပျိုးရေးနည်းပညာများ ဖြန့်ဝေပေးခြင်းဖြင့် တောင်သူများ၏ အထွက်နှုန်းတိုးမြင့်လာကာ ဒေသ၏ လူမှုစီးပွားဖွံ့ဖြိုးတိုးတက်ရေးကို အထောက်အကူပြုနိုင်မည်ဖြစ်ကြောင်း သိရသည်။