ပေါင်၊ဇူလိုင်-၂၄
ဒေသတွင်း ကြက်ဥလိုအပ်ချက် ဖြည့်ဆည်းရေးနှင့် စက်မှု၊ စိုက်ပျိုးမွေးမြူရေး လုပ်ငန်းများ လည်ပတ်မှုကို စစ်ဆေးရန် မွန်ပြည်နယ်ဝန်ကြီးချုပ်နှင့် တာဝန်ရှိသူများသည် ပေါင်မြို့နယ်အတွင်းရှိ လုပ်ငန်းအချို့သို့ (ဇူလိုင် ၂၃ ရက် )နံနက်ပိုင်းက သွားရောက်ခဲ့ကြောင်း သိရသည်။
ဝန်ကြီးချုပ်နှင့် အဖွဲ့သည် ပေါင်မြို့နယ်၊ ပန်းကုန်းကျေးရွာတွင် တည်ဆောက်ရန် လျာထားသည့် အဆင့်မြှင့် အအေးခန်းစနစ်သုံး ဥစားကြက် မွေးမြူရေးခြံ (Evaporative Cooling Systems Layer Farm) မြေနေရာသို့ သွားရောက်ကာ မြေပြင်အခြေအနေ၊ ရေနှင့် လျှပ်စစ်မီး ရရှိနိုင်မှု၊ လမ်းပန်းဆက်သွယ်ရေး အခြေအနေများကို ကြည့်ရှုခဲ့သည်။
ယင်းစေ့စပ်ဆွေးနွေးမှုတွင် ဒေသတွင်း ကြက်ဥဈေးနှုန်း သက်သာစွာ ဖြန့်ဖြူးနိုင်ရေး စနစ်တကျ အကောင်အထည်ဖော်ရန် မှာကြားခဲ့သည်။
ထို့အပြင် ကျုံက ဥယျာဉ်ခြံသို့ သွားရောက်၍ ဒေသထွက် မင်းကွတ်၊ ကြက်မောက်နှင့် ဒူးရင်း အပါအဝင် မျိုးကောင်းမျိုးသန့် ပျိုးပင်များ ထုတ်လုပ်နေမှု အခြေအနေများ၊ သုတေသနရလဒ်များကို တောင်သူများထံ အသိပညာပေးရေး လုပ်ငန်းစဉ်များကို စစ်ဆေးခဲ့ပြီး ခြံအတွင်းရှိ နှစ် ၅၀ သက်တမ်းရှိ မင်းကွတ်ပင်ကြီးများနှင့် ပျိုးပင် အရောင်းအဝယ်ဖြစ်ထွန်းမှုကို မေးမြန်းခဲ့သည်။
ဆက်လက်၍ သဲဖြူကုန်းကျေးရွာရှိ ပဒုမ္မာ ဆပ်ပြာစက်ရုံ၏ ထုတ်လုပ်မှု လိုင်းများနှင့် စက်ယန္တရားများ လည်ပတ်နေမှုကို လှည့်လည်ကြည့်ရှုကာ လုပ်ငန်းခွင် ဘေးအန္တရာယ် ကင်းရှင်းရေး၊ သဘာဝပတ်ဝန်းကျင် ထိခိုက်မှု မရှိစေရေးနှင့် ဈေးကွက်အတွင်း အရည်အသွေးမီ ကုန်ပစ္စည်းများ ဖြန့်ဖြူးနိုင်ရေး ကိစ္စရပ်များကို ပေါင်းစပ်ညှိနှိုင်းပေးခဲ့ကြောင်း သိရသည်။