နေပြည်တော်၊ ဇူလိုင် ၂၃
မြန်မာနိုင်ငံနှင့် လာအိုနိုင်ငံ နယ်နိမိတ်ဖြတ်သန်းစီးဆင်းနေသည့် မဲခေါင်မြစ်ပေါ်တွင် ၂,၇၉၀ မဂ္ဂါဝပ် ထုတ်လုပ်နိုင်မည့် အကြီးစားရေအားလျှပ်စစ်စီမံကိန်း အကောင်အထည်ဖော်နိုင်ရေးအတွက် ၃၄ လကြာ ပူးတွဲဖြစ်မြောက်နိုင်စွမ်းလေ့လာမှု ဆောင်ရွက်သွားရန် နှစ်နိုင်ငံက သဘောတူညီထားကြောင်း သိရသည်။
အဆိုပါသဘောတူညီချက်ကို နိုင်ငံတော်သမ္မတ ဦးမင်းအောင်လှိုင်၏ လာအိုနိုင်ငံ ဗီယင်ကျန်းမြို့ ချစ်ကြည်ရေးခရီးစဉ်အတွင်း ဇူလိုင် ၄ ရက်က လက်မှတ်ရေးထိုးခဲ့ခြင်းဖြစ်ပြီး စီမံကိန်းအကောင်အထည်ဖော်နိုင်ရေးအတွက် နည်းပညာနှင့် စီးပွားရေးဆိုင်ရာ ဖြစ်မြောက်နိုင်စွမ်းများကို ပူးတွဲလေ့လာသွားမည်ဖြစ်ကြောင်း သိရသည်။
စီမံကိန်းအကောင်အထည်ဖော်နိုင်ပါက တရုတ်နိုင်ငံပြင်ပ မဲခေါင်မြစ်ပေါ်ရှိ ရေအားလျှပ်စစ်စီမံကိန်းများအနက် အကြီးဆုံးစီမံကိန်းတစ်ခု ဖြစ်လာနိုင်ကြောင်း ဖော်ပြထားသည်။
နှစ်နိုင်ငံတာဝန်ရှိသူများက အဆိုပါစီမံကိန်းသည် မြန်မာ-လာအို ချစ်ကြည်ရေးပူးပေါင်းဆောင်ရွက်မှု၏ အရေးပါသည့် သင်္ကေတတစ်ခုဖြစ်ပြီး စွမ်းအင်ဖူလုံရေး တိုးမြှင့်ရေးနှင့် ဒေသတွင်း ပြန်လည်ပြည့်ဖြိုးမြဲစွမ်းအင်ကဏ္ဍ ဖွံ့ဖြိုးတိုးတက်ရေးကို အထောက်အကူပြုမည်ဟု ပြောကြားထားသည်။
သို့ရာတွင် အဆိုပါစီမံကိန်းနှင့်ပတ်သက်၍ သဘာဝပတ်ဝန်းကျင်နှင့် လူမှုရေးဆိုင်ရာ သက်ရောက်မှုများ ရှိလာနိုင်ကြောင်း ကျွမ်းကျင်သူအချို့က သုံးသပ်ထားသည်။
ဝါရှင်တန်အခြေစိုက် Stimson Center မှ အရှေ့တောင်အာရှအစီအစဉ်ညွှန်ကြားရေးမှူး ဘရိုင်ယန်အိုင်လာက စီမံကိန်းသည် မျှော်လင့်မထားသည့် ဖွံ့ဖြိုးတိုးတက်မှုတစ်ရပ်ဖြစ်ကြောင်း သုံးသပ်ထားပြီး၊ ဆစ်ဒ်နီတက္ကသိုလ်မှ အငြိမ်းစားပါမောက္ခ ဖိလစ်ဟာ့ခ်ျက ယင်းစီမံကိန်းအတွက် ပြင်ပဘဏ္ဍာရေးနှင့် နည်းပညာအကူအညီများ လိုအပ်နိုင်ကြောင်း မှတ်ချက်ပြုထားသည်။
ထို့အပြင် သဘာဝပတ်ဝန်းကျင်ထိန်းသိမ်းရေးအဖွဲ့အစည်းများက ဆည်တည်ဆောက်မှုကြောင့် ငါးရွှေ့ပြောင်းသွားလာမှု၊ နုန်းစီးဆင်းမှုနှင့် မြစ်ကမ်းတစ်လျှောက် ဂေဟစနစ်များအပေါ် သက်ရောက်မှုများ ဖြစ်ပေါ်လာနိုင်ကြောင်း သတိပေးထားသည်။
Ref: South China Morning Post
