တရားမဝင်လျှပ်စစ်ဓာတ်အား သုံးစွဲသူများကို သတ်မှတ်ကာလအတွင်း အသိပေးပါက ဒဏ်ကြေးနှင့် တရားစွဲဆိုမှုများ ကင်းလွတ်ခွင့်ပြု လျော်ကြေးငွေကိုလည်း ၅၀ ရာခိုင်နှုန်း လျှော့ပေါ့ကောက်ခံမည်

နေပြည်တော်၊ ဇူလိုင် ၂၂ တရားမဝင်နည်းလမ်းဖြင့် လျှပ်စစ်ဓာတ်အား ရယူသုံးစွဲထားသူများအနေဖြင့် သတ်မှတ်ကာလအတွင်း သက်ဆိုင်ရာဌာနများသို့ ဆက်သွယ်အကြောင်းကြားလာပါက ဒဏ်ကြေးနှင့် တရားစွဲဆိုမှုများမှ ကင်းလွတ်ခွင့်ပြုပေးသည့်အပြင် လျော်ကြေးငွေကိုလည်း မူလသတ်မှတ်နှုန်း၏ ၅၀ ရာခိုင်နှုန်းသာ ကောက်ခံသွားမည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနက ဇူလိုင် ၂၂ ရက်တွင် အသိပေးထုတ်ပြန်ခဲ့သည်။ ဝန်ကြီးဌာနက တရားမဝင်နည်းလမ်းများဖြင့် လျှပ်စစ်ဓာတ်အား ရယူသုံးစွဲနေသူများအနေဖြင့် ၂၀၂၆ ခုနှစ် ဇူလိုင် ၃၁ ရက်မတိုင်မီ သက်ဆိုင်ရာဌာနများသို့ ဆက်သွယ်အသိပေးရန်နှင့် သတ်မှတ်ကာလအတွင်း အသိပေးလာသူများအား ဖြေလျှော့မှုများ ဆောင်ရွက်ပေးလျက်ရှိကြောင်း ထုတ်ပြန်ထားသည်။ လျှပ်စစ်နှင့်စွမ်းအင်ဝန်ကြီးဌာနက ယခင် ဇူလိုင် ၁၂ ရက်တွင်လည်း သတ်မှတ်ရက် ကျော်လွန်ပြီးနောက် Control Center များမှ စစ်ဆေးတွေ့ရှိသည့် တရားမဝင်လျှပ်စစ်ဓာတ်အား သုံးစွဲမှုများကို ၂၀၁၄ ခုနှစ် လျှပ်စစ်ဥပဒေနှင့်အညီ ဒဏ်ကြေးပေးဆောင်စေခြင်း၊ မီတာအသုံးပြုခွင့်ကို ယာယီရပ်ဆိုင်းခြင်း သို့မဟုတ် ပယ်ဖျက်ခြင်းနှင့် လုပ်ငန်းလိုင်စင်ပိတ်သိမ်းခြင်းအထိ အရေးယူဆောင်ရွက်သွားမည်ဖြစ်ကြောင်း အသိပေးထားပြီးဖြစ်သည်။ လက်ရှိတွင် တရားမဝင်ဓာတ်အား ရယူသုံးစွဲနေသူအချို့က သက်ဆိုင်ရာဌာနများသို့ ဆက်သွယ်အသိပေးလာလျက်ရှိပြီး ၎င်းတို့အား ဓာတ်အားဖြတ်တောက်ခြင်းမှ ကင်းလွတ်ခွင့်၊ ဒဏ်ကြေးငွေ ကျပ် ၃၀၀,၀၀၀ ပေးဆောင်ရန် ကင်းလွတ်ခွင့်၊ ၂၀၁၄ ခုနှစ် လျှပ်စစ်ဥပဒေအရ တရားစွဲဆိုခြင်းမှ ကင်းလွတ်ခွင့်တို့အပြင် လျော်ကြေးငွေကို မူလသတ်မှတ်နှုန်း၏ ၅၀ ရာခိုင်နှုန်း သာ ကောက်ခံသည့် ဖြေလျှော့မှုများ ဆောင်ရွက်ပေးလျက်ရှိကြောင်း သိရသည်။ ဝန်ကြီးဌာနက တရားမဝင်လျှပ်စစ်ဓာတ်အား ရယူသုံးစွဲမှုများ လျော့နည်းပပျောက်လာပါက လျှပ်စစ်ဓာတ်အား မရရှိသေးသည့် ပြည်သူများထံ ပိုမိုတိုးမြှင့်ဖြန့်ဖြူးပေးနိုင်မည်ဖြစ်သဖြင့် ပြည်သူများအနေဖြင့် ကိုယ်ချင်းစာစိတ်ဖြင့် ပူးပေါင်းဆောင်ရွက်ပေးကြရန်လည်း မေတ္တာရပ်ခံထားကြောင်း သိရသည်။