ဇူလိုင်လ ၂၁ ရက်၊ ဒါကာ
ဘင်္ဂလားဒေ့ရှ်နှင့် အမေရိကန်ပြည်ထောင်စုတို့သည် နှစ်နိုင်ငံအကြား မဟာဗျူဟာမြောက် ပူးပေါင်းဆောင်ရွက်မှုကို မြှင့်တင်ရန်နှင့် အင်ဒို-ပစိဖိတ် ဒေသတွင်း ပူးပေါင်းဆောင်ရွက်မှုများ ခိုင်မာ အားကောင်းလာစေရန်အတွက် ပူးတွဲစစ်ရေးလေ့ကျင့်မှုတစ်ခုကို စတင်လိုက်ပြီဖြစ်သည်။
ဘင်္ဂလားဒေ့ရှ် တပ်မတော်၏ အထူးတပ်ဖွဲ့တစ်ခုဖြစ်သော ပါရာ ကွန်မန်ဒို တပ်မဟာ ၏ ကြီးကြပ်မှုဖြင့် ၁၃ ရက်ကြာ ပြုလုပ်မည့် အဆိုပါ စစ်ရေးလေ့ကျင့်မှုကို ဇူလိုင်လ ၁၉ ရက်တွင် စတင်ခဲ့ပြီး ဇူလိုင်လ ၃၁ ရက်တွင် ပြီးဆုံးမည်ဖြစ်ကြောင်း ဘင်္ဂလားဒေ့ရှ် တပ်မတော်၏ ပြန်ကြားရေးဌာန (ISPR) ၏ သတင်းထုတ်ပြန်ချက်အရ သိရသည်။
“Exercise Tiger Lightning (TL)-2026” စစ်ရေးလေ့ကျင့်မှု ဖွင့်ပွဲအခမ်းအနားကို ဇူလိုင်လ ၁၉ ရက် နေ့က ဘင်္ဂလားဒေ့ရှ်နိုင်ငံ အရှေ့မြောက်ပိုင်း ဆီးလ်ဟက်စစ်ဌာနချုပ်နယ်မြေတွင် ဘင်္ဂလားဒေ့ရှ် တပ်မတော်နှင့် အမေရိကန် ပစိဖိတ်တပ်ဖွဲ့တို့ ပူးပေါင်း၍ ကျင်းပခဲ့သည်။
အဆိုပါ အခမ်းအနားသို့ ဘင်္ဂလားဒေ့ရှ် တပ်မတော်အကြီးအကဲ Md Mainur Rahman နှင့် ဘင်္ဂလားဒေ့ရှ်နိုင်ငံဆိုင်ရာ အမေရိကန် သံအမတ်ကြီး Brent T Christensen တို့ တက်ရောက်ခဲ့ကြသည်။
အဆိုပါသင်တန်းသည် နှစ်နိုင်ငံ တပ်မတော်များ၏ စစ်ဆင်ရေးဆိုင်ရာ စွမ်းဆောင်ရည်များကို မြှင့်တင်ပေးမည်ဖြစ်ပြီး မဟာမိတ်ဆက်ဆံရေးကို ခိုင်မာစေကာ ရှည်ကြာသော မဟာဗျူဟာမြောက် ပူးပေါင်းဆောင်ရွက်မှုအတွက် အထူးအထောက်အကူပြုမည်ဖြစ်ကြောင်း ရာမန် က ပြောကြားခဲ့သည်။
သံအမတ်ကြီး ခရစ်တန်ဆန် ကလည်း အဆိုပါစစ်ရေးလေ့ကျင့်မှုသည် နှစ်နိုင်ငံအကြား ရေရှည်တည်တံ့သော ချစ်ကြည်ရေး၊ အပြန်အလှန် လေးစားမှုနှင့် လွတ်လပ်၍ လုံခြုံစိတ်ချရသော၊ ကြွယ်ဝချမ်းသာသော အင်ဒို-ပစိဖိတ် ဒေသဖြစ်ထွန်းရေး နှစ်နိုင်ငံစလုံး၏ ပူးတွဲကတိကဝတ်ကို ဖော်ပြနေခြင်းဖြစ်ကြောင်း ပြောကြားခဲ့သည်။
ယခုနှစ်နိုင်ငံ ပူးတွဲစစ်ရေးလေ့ကျင့်မှုသည် အမေရိကန် ပစိဖိတ်တပ်ဖွဲ့၏ စစ်ဆင်ရေးနယ်မြေဆိုင်ရာ ကမ်ပိန်းနှင့် လုံခြုံရေး ပူးပေါင်းဆောင်ရွက်မှု ရည်မှန်းချက်များ၏ အစိတ်အပိုင်းတစ်ခုဖြစ်ပြီး ကျွမ်းကျင်မှုဆိုင်ရာ ဆက်ဆံရေးများ မြှင့်တင်ရန်၊ စစ်ဆင်ရေးဆိုင်ရာ လုပ်ဆောင်ချက်များ ပိုမိုကောင်းမွန်လာစေရန်၊ စစ်ရေးပြင်ဆင်မှုများ တိုးမြှင့်ရန်နှင့် တပ်မတော်နှစ်ခုအကြား ပူးပေါင်းဆောင်ရွက်နိုင်မှုကို အားပေးမြှင့်တင်ရန် ဖြစ်ကြောင်း ဒါကာမြို့ရှိ အမေရိကန်သံရုံးက ထုတ်ပြန်ထားပါသည်။
Ref: ခမာတိုင်းမ်စ်