အစိုးရနှင့် မွန်ပြည်သစ်ပါတီ (NMSP) ငြိမ်းချမ်းရေးဆွေးနွေး၊ သဘောတူညီချက်များကို မှတ်တမ်းတင် လက်မှတ်ရေးထိုးအတည်ပြု

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီနှင့် မွန်ပြည်သစ်ပါတီ (NMSP) တို့သည် ယမန်နေ့က နေပြည်တော်၌ တွေ့ဆုံဆွေးနွေးခဲ့ပြီး နှစ်ဖက်ဆွေးနွေးခဲ့သည့် အကြောင်းအရာများကို မှတ်တမ်းတင်နိုင်ရေး ညှိနှိုင်းကာ လက်မှတ်ရေးထိုးအတည်ပြုခဲ့ကြကြောင်း သိရသည်။

ယခုတွေ့ဆုံဆွေးနွေးပွဲမှာ အစိုးရသစ်၏ ငြိမ်းချမ်းရေးဖိတ်ခေါ်မှုအရ ပြုလုပ်ခြင်းဖြစ်ပြီး ၂၀၂၁ ခုနှစ်နောက်ပိုင်း ပြည်နယ်အချို့တွင် ပဋိပက္ခများ ဖြစ်ပွားခဲ့သော်လည်း မွန်ပြည်နယ်တွင် တည်ငြိမ်မှုကို ထိန်းသိမ်းထားနိုင်ခဲ့ကြောင်း ဆွေးနွေးပွဲတွင် ထည့်သွင်းပြောကြားခဲ့သည်။

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီဥက္ကဋ္ဌ ဒုတိယဗိုလ်ချုပ်ကြီး ရာပြည့်က ဒေသဖွံ့ဖြိုးတိုးတက်ရေးအတွက် လိုအပ်ချက်များကို ပေါင်းစပ်ညှိနှိုင်းပေးမည်ဖြစ်ကြောင်း၊ ပညာရေးနှင့် ကျန်းမာရေးဆိုင်ရာ လိုအပ်ချက်များကို သက်ဆိုင်ရာဌာနများသို့ တင်ပြ၍ ဖြည့်ဆည်းဆောင်ရွက်ပေးမည်ဖြစ်ကြောင်းနှင့် ဒေသတည်ငြိမ်အေးချမ်းရေးအတွက် နှစ်ဖက်ပူးပေါင်းဆောင်ရွက်ရန် လိုအပ်ကြောင်း ပြောကြားခဲ့သည်။

မွန်ပြည်သစ်ပါတီ (NMSP) ဒုတိယဥက္ကဋ္ဌ နိုင်အောင်မင်းကလည်း အလွတ်သဘောတွေ့ဆုံမှုများမှတစ်ဆင့် အနှစ်သာရရှိပြီး အားလုံးပါဝင်နိုင်သည့် ငြိမ်းချမ်းရေးဆွေးနွေးပွဲများ ဖြစ်ပေါ်လာစေရေး၊ ပွင့်လင်းမြင်သာမှု၊ အပြန်အလှန်ယုံကြည်မှုနှင့် စဉ်ဆက်မပြတ် ပူးပေါင်းဆောင်ရွက်ရေးတို့၏ အရေးပါမှုကို ဆွေးနွေးပြောကြားခဲ့ကြောင်း သိရသည်။

ဆွေးနွေးပွဲတွင် ပညာရေး၊ ကျန်းမာရေး၊ ဒေသဖွံ့ဖြိုးရေး၊ မွန်စာပေသင်ကြားရေး၊ ကျန်းမာရေးဝန်ထမ်းနှင့် ဆေးဝါးအထောက်အပံ့ရရှိရေး၊ ရေးမြို့နယ်၊ ကြာအင်းဆိပ်ကြီးမြို့နယ်၊ ကော့ကရိတ်မြို့နယ် အနောက်ဘက်ခြမ်း (ဂျိုင်းမြစ်တောင်ဘက်ခြမ်း) နှင့် တနင်္သာရီတိုင်းဒေသကြီး ရေဖြူမြောက်ပိုင်းကျေးရွာများတွင် မွေးစာရင်းအချက်အလက်များ အတည်ပြုထုတ်ပေးနိုင်ရေး၊ လမ်းနှင့်တံတားများ ဦးစားပေးဆောက်လုပ်ရေးအပြင် နယ်မြေတည်ငြိမ်အေးချမ်းရေးအတွက် နှစ်ဖက်ပေါင်းစပ်ဆောင်ရွက်နိုင်ရေးတို့ကို အဓိကဆွေးနွေးခဲ့ကြောင်း သိရသည်။

အဆိုပါတွေ့ဆုံဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီမှ ဥက္ကဋ္ဌ ဒုတိယဗိုလ်ချုပ်ကြီး ရာပြည့်၊ အတွင်းရေးမှူး ဒုတိယဗိုလ်ချုပ်ကြီး မင်းနိုင်နှင့် ကော်မတီဝင်များ တက်ရောက်ခဲ့ကြပြီး မွန်ပြည်သစ်ပါတီ (NMSP) ဘက်မှ ဒုတိယဥက္ကဋ္ဌ နိုင်အောင်မင်းနှင့် ဗဟိုအလုပ်အမှုဆောင်ကော်မတီဝင်များ၊ ဗဟိုကော်မတီဝင်များ ပါဝင်သည့် ကိုယ်စားလှယ်အဖွဲ့ တက်ရောက်ခဲ့ကြောင်း သိရသည်။