ရှမ်းပြည်နယ်အရှေ့ပိုင်း အထူးဒေသ (၄)၏ ငြိမ်းချမ်းရေး (၃၇) နှစ်မြောက် အခမ်းအနားတွင် ငြိမ်းချမ်းရေးနှင့် စည်းလုံးရေးကော်မတီ ဒုတိယဥက္ကဋ္ဌ ဦးစန်ပေ့က ငြိမ်းချမ်းရေးလမ်းစဉ်ကို မြဲမြံစွာထိန်းသိမ်းကာ အထူးဒေသ (၄)၏ သမိုင်းစာမျက်နှာသစ်ကို ဆက်လက်ရေးထိုးသွားမည်ဖြစ်ကြောင်း ပြောကြားခဲ့သည်။
ဦးစန်ပေ့က အထူးဒေသ၏ ဖွံ့ဖြိုးတိုးတက်မှုသည် ရှေ့ဆောင်ဘိုးဘေးများ ချမှတ်ခဲ့သည့် အုတ်မြစ်ပေါ်တွင် အခြေခံတည်ဆောက်ထားပြီး ငြိမ်းချမ်းရေးနှင့် စည်းလုံးရေးကော်မတီ၏ ခိုင်မာသည့် ဦးဆောင်မှုအပေါ် မူတည်၍ တိုးတက်လာခဲ့ကြောင်း ပြောကြားသည်။
ထို့ပြင် အထူးဒေသတည်ထောင်ပြီးနောက် မူလရည်မှန်းချက်ဖြစ်သည့် ငြိမ်းချမ်းရေးလမ်းစဉ်ကို စဉ်ဆက်မပြတ် ထိန်းသိမ်းခဲ့ပြီး တိုင်းရင်းသားစည်းလုံးညီညွတ်ရေး၊ စီးပွားရေးဖွံ့ဖြိုးတိုးတက်ရေး၊ ပြည်သူများ၏ လူနေမှုဘဝမြှင့်တင်ရေးနှင့် အခြေခံအဆောက်အအုံ ဖွံ့ဖြိုးတိုးတက်ရေးတို့ကို အားသွန်ခွန်စိုက် ဆောင်ရွက်ခဲ့ကြောင်း ၎င်းက ဆိုသည်။
ထို့အတူ ကလေးငယ်တိုင်း ပညာသင်ကြားခွင့်ရရှိရေး၊ ယဉ်ကျေးမှုအမွေအနှစ်များ ထိန်းသိမ်းရေး၊ မြို့ပြနှင့် ကျေးလက်ဒေသများ၏ ဖွံ့ဖြိုးတိုးတက်ရေးတို့ကို ဆက်လက်မြှင့်တင်နိုင်ခဲ့ပြီး လက်တွေ့အခြေအနေနှင့် ကိုက်ညီသည့် ငြိမ်းချမ်းဖွံ့ဖြိုးရေးလမ်းကြောင်းကို ရှာဖွေဖော်ဆောင်နိုင်ခဲ့ကြောင်းလည်း ပြောကြားခဲ့သည်။
ဒုတိယဥက္ကဋ္ဌ ဦးစန်ပေ့က ရိုးရာဓလေ့ကောင်းများကို လက်ဆင့်ကမ်းထိန်းသိမ်းရန်၊ ငြိမ်းချမ်းရေးလမ်းစဉ်ကို ဆက်လက်မြဲမြံစွာ ထိန်းသိမ်းရန်နှင့် ကဏ္ဍအသီးသီးရှိ ဖွံ့ဖြိုးရေးလုပ်ငန်းများကို အဆင့်သစ်သို့ ရောက်ရှိစေရေး အားလုံးပူးပေါင်းဆောင်ရွက်ကြရန် တိုက်တွန်းပြောကြားခဲ့သည်။
ယင်းအခမ်းအနားကို ဇွန် ၃၀ ရက်က ကျင်းပခဲ့ပြီး ဒေသ၏ စည်းလုံးညီညွတ်မှုကို ဆက်လက်ထိန်းသိမ်းကာ ဖွံ့ဖြိုးတိုးတက်ရေးကို အတူတကွ အကောင်အထည်ဖော်သွားမည်ဖြစ်ကြောင်းလည်း ထည့်သွင်းပြောကြားခဲ့သည်။