ကိုလံဘို၊ ဇူလိုင် ၂
သီရိလင်္ကာနိုင်ငံကို အထက်တန်းအလယ်အလတ်ဝင်ငွေရှိသော စီးပွားရေးနိုင်ငံ (Upper-Middle Income Economy) အဖြစ် ကမ္ဘာ့ဘဏ်က ပြန်လည်အဆင့်သတ်မှတ်လိုက်ကြောင်း သိရသည်။ ယင်းသည် ၂၀၂၂ ခုနှစ် စီးပွားရေးအကျပ်အတည်းကြောင့် အဆင့်လျှော့ချခံခဲ့ရပြီးနောက် လေးနှစ်အကြာတွင် ယခင်အဆင့်သို့ ပြန်လည်ရောက်ရှိလာခြင်းဖြစ်သည်။
ကမ္ဘာ့ဘဏ်က ဇူလိုင် ၁ ရက်တွင် ထုတ်ပြန်သည့် နောက်ဆုံးနိုင်ငံအလိုက် ဝင်ငွေအဆင့် သတ်မှတ်ချက်အရ စက်မှုကဏ္ဍ၊ ကုန်ထုတ်လုပ်မှုကဏ္ဍ၊ ဘဏ္ဍာရေးဝန်ဆောင်မှုကဏ္ဍနှင့် ခရီးသွားလုပ်ငန်းများ ပြန်လည်အားကောင်းလာမှုကြောင့် သီရိလင်္ကာ၏ စီးပွားရေး ပြန်လည်ဦးမော့လာခဲ့ပြီး အထက်တန်းအလယ်အလတ်ဝင်ငွေနိုင်ငံအုပ်စုတွင် ပြန်လည်ထည့်သွင်းသတ်မှတ်ခဲ့ခြင်းဖြစ်ကြောင်း ဖော်ပြထားသည်။
ကမ္ဘာ့ဘဏ်၏ အဆိုအရ ၂၀၂၅ ခုနှစ်အတွင်း သီရိလင်္ကာ၏ အမှန်တကယ် ဂျီဒီပီ (Real GDP) သည် ၅ ရာခိုင်နှုန်း တိုးတက်ခဲ့သည်။
“သီရိလင်္ကာဟာ စီးပွားရေးပြန်လည်ဦးမော့လာမှုရဲ့ ထင်ရှားတဲ့ ဥပမာတစ်ခုဖြစ်ပါတယ်။ ၂၀၂၂ ခုနှစ်မှာ ပြင်းထန်တဲ့ စီးပွားရေးအကျပ်အတည်းကြောင့် နိုင်ငံဟာ ပြိုလဲလုနီးပါး အခြေအနေကို ရင်ဆိုင်ခဲ့ရပေမယ့်၊ သုံးနှစ်အကြာ ၂၀၂၅ ခုနှစ်မှာတော့ စက်မှုကဏ္ဍ၊ ဘဏ္ဍာရေးဝန်ဆောင်မှုနဲ့ ခရီးသွားလုပ်ငန်းတွေ ပြန်လည်တိုးတက်လာမှုကြောင့် Real GDP ၅ ရာခိုင်နှုန်းအထိ တိုးတက်လာခဲ့ပါတယ်။ ယခုလို အဆင့်ပြန်လည်ရရှိတာဟာ စီးပွားရေးကြံ့ခိုင်နိုင်စွမ်းကို ပြသနေပေမယ့် သတ်မှတ်ချက်ကို အနည်းငယ်သာ ကျော်လွန်နိုင်ခဲ့တာ ဖြစ်ပါတယ်” ဟု ကမ္ဘာ့ဘဏ်က သုံးသပ်ထားသည်။
ကမ္ဘာ့ဘဏ်သည် ဖွံ့ဖြိုးတိုးတက်မှုဒေတာအုပ်စုမှ ပြုစုသည့် ယခင်ပြက္ခဒိန်နှစ်၏ တစ်ဦးချင်း အမျိုးသားဝင်ငွေ (Gross National Income per capita) ခန့်မှန်းချက်များကို အခြေခံ၍ နိုင်ငံများ၏ ဝင်ငွေအဆင့်အတန်းကို နှစ်စဉ် ဇူလိုင် ၁ ရက်တွင် ပြန်လည်သတ်မှတ်လေ့ရှိသည်။
ယင်းသတ်မှတ်ချက်အရ နိုင်ငံများကို ဝင်ငွေနည်းနိုင်ငံ၊ အောက်တန်းအလယ်အလတ်ဝင်ငွေနိုင်ငံ၊ အထက်တန်းအလယ်အလတ်ဝင်ငွေနိုင်ငံနှင့် ဝင်ငွေမြင့်နိုင်ငံ ဟူ၍ အုပ်စုလေးခုခွဲခြားထားသည်။
ယခုနှစ်၏ နိုင်ငံအလိုက် ဝင်ငွေအဆင့် သတ်မှတ်ချက်တွင် စီးပွားရေးနိုင်ငံနှင့် နယ်မြေစုစုပေါင်း ၂၁၈ ခု ပါဝင်ပြီး၊ ယင်းအဆင့်သတ်မှတ်ချက်သည် ၂၀၂၇ ခုနှစ် ဇွန်လကုန်အထိ ကမ္ဘာလုံးဆိုင်ရာ ကိုးကားသတ်မှတ်ချက်အဖြစ် အသုံးပြုသွားမည်ဖြစ်ကြောင်း ကမ္ဘာ့ဘဏ်က ထုတ်ပြန်ထားသည်။
Ref: Xinhua