မြန်မာနိုင်ငံ၏ စက်သုံးဆီထောက်ပံ့မှုမှာ ပြည်ပတင်သွင်းမှုအပေါ် အဓိကမှီခိုနေရပြီး လက်ရှိတွင် စက်သုံးဆီတင်သွင်းရေးကို စင်ကာပူနိုင်ငံရှိ အရင်းအမြစ် (Source) တစ်ခုတည်းအား အဓိကကုန်သွယ်ရေးဗဟိုချက်အဖြစ် မှီခိုဆောင်ရွက်နေရကြောင်း လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးကျော်နိုင်ဝင်းက ပြောကြားသည်။
ဇွန်လ ၂၅ ရက်က ကျင်းပသည့် ပြည်သူ့လွှတ်တော်အစည်းအဝေးတွင် ဒုတိယဝန်ကြီးက ယင်းသို့ ပြောကြားခဲ့ပြီး နိုင်ငံတော်၏ စွမ်းအင်လုံခြုံရေးကို ပိုမိုခိုင်မာစေရန် မတူညီသော စွမ်းအင်အရင်းအမြစ်များနှင့် သယ်ယူပို့ဆောင်ရေးလမ်းကြောင်းများမှ စက်သုံးဆီတင်သွင်းနိုင်ရေး၊ ကမ္ဘာ့နိုင်ငံများနှင့် စွမ်းအင်ကုန်သွယ်မှု ပိုမိုတိုးချဲ့ဆောင်ရွက်နိုင်ရေးတို့ကို မူဝါဒချမှတ် အကောင်အထည်ဖော်ဆောင်ရွက်လျက်ရှိကြောင်း ပြောကြားသည်။
ထို့ပြင် စက်သုံးဆီပြတ်လပ်မှုမဖြစ်ပေါ်စေရေးနှင့် ဈေးနှုန်းတည်ငြိမ်စေရေးအတွက် အိမ်နီးချင်းနိုင်ငံများနှင့် မိတ်ဖက်နိုင်ငံများအကြား ကာလရှည် စက်သုံးဆီထောက်ပံ့ရေး သဘောတူညီချက်များ ချုပ်ဆိုနိုင်ရေးကိုလည်း ညှိနှိုင်းဆောင်ရွက်လျက်ရှိကြောင်း သိရသည်။
စက်သုံးဆီတင်သွင်းဖြန့်ဖြူးရေးကွင်းဆက် (Supply Chain) တစ်လျှောက် မလိုအပ်သော ကုန်ကျစရိတ်များ လျှော့ချနိုင်ရေးနှင့် ဖြန့်ဖြူးမှုလုပ်ငန်းများကို ပိုမိုစနစ်တကျ စီမံခန့်ခွဲနိုင်ရေးအတွက် သိုလှောင်ကန်များတွင် အလိုအလျောက်ဆီပမာဏတိုင်းတာရေးစနစ် (Automatic Tank Gauge – ATG)၊ ဆီတင်ယာဉ်များတွင် GPS စနစ်နှင့် လက်လီအရောင်းဆိုင်များတွင် QR Code စနစ်များ အသုံးပြု၍ အချိန်နှင့်တစ်ပြေးညီ (Real-time Monitoring) ဒစ်ဂျစ်တယ်နည်းပညာဖြင့် ကြပ်မတ်ဆောင်ရွက်လျက်ရှိကြောင်း ဒုတိယဝန်ကြီးက ပြောကြားသည်။
လျှပ်စစ်နှင့်စွမ်းအင်ဝန်ကြီးဌာနအနေဖြင့် နိုင်ငံအတွင်း စွမ်းအင်ဖူလုံရေး၊ ပြည်သူများ စက်သုံးဆီကို သင့်တင့်မျှတသော ဈေးနှုန်းဖြင့် အသုံးပြုနိုင်ရေးနှင့် စက်သုံးဆီပြတ်လပ်မှုမရှိစေရေးတို့အတွက် စက်သုံးဆီတင်သွင်း၊ သိုလှောင်၊ သယ်ယူပို့ဆောင်နှင့် ဖြန့်ဖြူးရေးလုပ်ငန်းစဉ်တစ်လျှောက် ဆက်လက်စစ်ဆေးကြပ်မတ် ဆောင်ရွက်လျက်ရှိကြောင်း သိရသည်။