မြန်မာနိုင်ငံ ပရော်ဖက်ရှင်နယ်ဘောက်ဆင်လောကအတွက် သမိုင်းဝင်မှတ်တိုင်တစ်ခုအဖြစ် WBC/OPBF က တရားဝင်အသိအမှတ်ပြုသည့် WBC/OPBF Myanmar International Belt ခါးပတ်လုပွဲကို မြန်မာနိုင်ငံ၌ ပထမဆုံးအကြိမ် ကျင်းပခွင့်ရရှိခဲ့ကြောင်း မြန်မာနိုင်ငံဘောက်ဆင်ကော်မရှင် (MBC) မှ ဦးစိုးသန်းနိုင်က ပြောကြားသည်။
မကြာသေးမီက ဂျပန်နိုင်ငံ၌ သွားရောက်ယှဉ်ပြိုင်ခဲ့သည့် ပြိုင်ပွဲများတွင် မြန်မာကစားသမားများ ရှုံးနိမ့်မှုများနှင့် ရင်ဆိုင်ခဲ့ရသော်လည်း ယင်းခရီးစဉ်၏ အကျိုးဆက်ကောင်းတစ်ရပ်အဖြစ် WBC/OPBF အဖွဲ့ချုပ်က မြန်မာနိုင်ငံအတွက် တရားဝင် Title Match ခါးပတ်လုပွဲ ကျင်းပခွင့်ကို ခွင့်ပြုပေးခဲ့ခြင်းဖြစ်ကြောင်း သိရသည်။
အဆိုပါပြိုင်ပွဲကို မြန်မာကစားသမားများ၏ ပရော်ဖက်ရှင်နယ်အဆင့် မြှင့်တင်နိုင်ရေးနှင့် နိုင်ငံတကာစင်မြင့်တွင် အောင်မြင်မှုများ ရရှိစေရေး ရည်ရွယ်၍ မြန်မာနိုင်ငံဘောက်ဆင်ကော်မရှင်က ကျင်းပသွားမည်ဖြစ်သည်။
ပြိုင်ပွဲကို ၂၀၂၆ ခုနှစ်အတွင်း ကျင်းပမည့် PBM ပြိုင်ပွဲ (၃) ကြိမ်အပေါ် အခြေခံ၍ အဆင့်ဆင့်ကျင်းပသွားမည်ဖြစ်သည်။ ပထမအဆင့် PBM-10 ပြိုင်ပွဲကို ဇူလိုင် ၁၁ ရက်တွင် ဝိတ်တန်း (၄) တန်းဖြင့် ကျင်းပမည်ဖြစ်ပြီး အကောင်းဆုံးစွမ်းဆောင်နိုင်သည့် ဝိတ်တန်း (၂) တန်းမှ ကစားသမားများ နောက်တစ်ဆင့်သို့ တက်ရောက်ခွင့် ရရှိမည်ဖြစ်သည်။
ဒုတိယအဆင့် PBM-11 ပြိုင်ပွဲကို စက်တင်ဘာလအတွင်း ဆက်လက်ကျင်းပမည်ဖြစ်ကာ PBM-10 မှ ဆန်ခါတင်ရွေးချယ်ခံရသည့် ထိပ်တန်းကစားသမားများ ယှဉ်ပြိုင်ရမည်ဖြစ်သည်။
နောက်ဆုံးဗိုလ်လုပွဲအဆင့် PBM-12 တွင် အဆင့်ဆင့်ဖြတ်ကျော်လာသည့် အကောင်းဆုံးကစားသမားများက WBC/OPBF Myanmar International Belt တရားဝင်နိုင်ငံတကာခါးပတ်အတွက် Title Match အဖြစ် ယှဉ်ပြိုင်ထိုးသတ်သွားကြမည်ဖြစ်ကြောင်း သိရသည်။
WBC/OPBF ၏ တရားဝင်မြန်မာခါးပတ်ကို စိတ်ဝင်စားမှုအများဆုံးဖြစ်သည့် ဝိတ်တန်း (၂) တန်းအပေါ် အဓိကထား၍ ဆန်ခါတင်ရွေးချယ်သွားမည်ဖြစ်ပြီး ပြိုင်ပွဲဝင်ဝိတ်တန်းများနှင့် ပါဝင်မည့် ကစားသမားစာရင်းကို မကြာမီ ထုတ်ပြန်ကြေညာသွားမည်ဖြစ်ကြောင်း သိရသည်။
ယခုပွဲစဉ်သည် မြန်မာပရော်ဖက်ရှင်နယ်ဘောက်ဆင်လောက ဖွံ့ဖြိုးတိုးတက်ရေးအတွက် လမ်းဖွင့်ပေးမည့် သမိုင်းဝင်ပထမဆုံး နိုင်ငံတကာခါးပတ်လုပွဲတစ်ရပ်အဖြစ် မှတ်တမ်းဝင်လာမည်ဖြစ်ကြောင်း သိရသည်။