မြန်မာနိုင်ငံရဲ့ အကြီးဆုံးမြို့တော် ရန်ကုန်မှာ အမေရိကန် သံတမန်တစ်ဦး သေဆုံးနေတာကို တွေ့ရှိခဲ့ရတယ်လို့ အမေရိကန် နိုင်ငံခြားရေးဝန်ကြီးဌာနက ပြောပါတယ်။ ဒီအမှု စုံစမ်းစစ်ဆေးမှုနဲ့ ပတ်သက်ပြီး ထိုင်းအမျိုးသမီးတစ်ဦးကို ရဲတပ်ဖွဲ့က ဖမ်းဆီးထိန်းသိမ်းထားတယ်လို့ ရန်ကုန်မှာရှိတဲ့ သံတမန်အသိုင်းအဝိုင်းက ပြောပါတယ်။
ထိုင်းနိုင်ငံမှာရှိတဲ့ အမေရိကန်အရာရှိတွေနဲ့ မြန်မာနိုင်ငံရှိ အမေရိကန်သံရုံးတို့ကတော့ ဒီအမှုနဲ့ပတ်သက်တဲ့ မေးခွန်းတွေကို အမေရိကန် နိုင်ငံခြားရေးဝန်ကြီးဌာနဆီကိုပဲ လွှဲပြောင်းပေးခဲ့ပါတယ်။ နိုင်ငံခြားရေးဝန်ကြီးဌာနဘက်ကတော့ ရန်ကုန်သံရုံးမှာ တာဝန်ကျနေတဲ့ “အမေရိကန်အစိုးရဝန်ထမ်းတစ်ဦး သေဆုံးသွားတာ” မှန်ကန်ကြောင်း အတည်ပြုပေးခဲ့ပေမယ့် တခြားအသေးစိတ် အချက်အလက်တွေကိုတော့ ထုတ်ဖော်ပြောဆိုခြင်း မရှိပါဘူး။
Associated Press (AP) သတင်းဌာနရဲ့ မေးမြန်းမှုတွေကို အမေရိကန် နိုင်ငံခြားရေးဝန်ကြီးဌာနက အီးမေးလ်ကနေတစ်ဆင့် ပြန်လည်ဖြေကြားရာမှာတော့ “သေဆုံးသူရဲ့ မိသားစုနဲ့ ချစ်ခင်ရသူတွေရဲ့ ကိုယ်ရေးကိုယ်တာလုံခြုံမှုကို လေးစားတဲ့အနေနဲ့ လောလောဆယ်မှာ တခြားဘာအချက်အလက်မှ ထပ်ပြီး ထုတ်ပြန်ပေးစရာမရှိပါဘူး” လို့ ပြောခဲ့ပါတယ်။