အစိုးရ-ပုဂ္ဂလိက ပူးပေါင်းဆောင်ရွက်မှု (PPP) ဖြင့် အကောင်အထည်ဖော်နေသည့် နိုင်ငံခြားရင်းနှီးမြှုပ်နှံမှုလုပ်ငန်း ၃၆ ခုရှိပြီး ရင်းနှီးမြှုပ်နှံမှုပမာဏ အမေရိကန်ဒေါ်လာ ၇,၃၂၅ ဒသမ ၂၉၈ သန်းရှိ
ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) ၏ စာရင်းများအရ အစိုးရ-ပုဂ္ဂလိက ပူးပေါင်းဆောင်ရွက်မှု (PPP) ပုံစံဖြင့် ဆောင်ရွက်လျက်ရှိသည့် နိုင်ငံခြားရင်းနှီးမြှုပ်နှံမှုလုပ်ငန်း ၃၆ ခုရှိပြီး ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ၇,၃၂၅ ဒသမ ၂၉၈ သန်းရှိကြောင်း အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ဒုတိယဝန်ကြီး ဦးကျော်ထင်က ပြောကြားသည်။
ယင်းကို ယမန်နေ့က ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး စတုတ္ထနေ့တွင် ပုဗ္ဗသီရိမဲဆန္ဒနယ်မှ ဦးလှဆွေ၏ “Public-Private Partnership (PPP) ဥပဒေ ရေးဆွဲပြဋ္ဌာန်းနိုင်ရေး အစီအစဉ်ရှိ၊ မရှိ” မေးခွန်းအား ပြန်လည်ဖြေကြားစဉ် ထည့်သွင်းပြောကြားခဲ့ခြင်းဖြစ်သည်။
ထို့ပြင် မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁၇၅ ခုရှိပြီး ရင်းနှီးမြှုပ်နှံမှုပမာဏမှာ ကျပ် ၈ ဒသမ ၆၂၇ ထရီလီယံကျော်ရှိကြောင်း၊ အဆိုပါလုပ်ငန်းများကို ရင်းနှီးမြှုပ်နှံမှုဥပဒေနှင့်အညီ ဆောင်ရွက်လျက်ရှိကြောင်းလည်း ဒုတိယဝန်ကြီးက ပြောကြားသည်။
သီလဝါဆိပ်ကမ်းတွင် ကုမ္ပဏီ ၂၂ ခုက ပြည်ထောင်စုအစိုးရအဖွဲ့နှင့် မြန်မာနိုင်ငံရင်းနှီးမြှုပ်နှံမှုကော်မရှင် (MIC) ၏ ခွင့်ပြုမိန့်များရယူပြီး သက်ဆိုင်ရာဥပဒေများနှင့်အညီ လုပ်ငန်းများ လည်ပတ်ဆောင်ရွက်လျက်ရှိကြောင်း သိရသည်။
နိုင်ငံတော်အတွင်း PPP လုပ်ငန်းများ၏ အရည်အသွေးနှင့် ယှဉ်ပြိုင်နိုင်စွမ်း မြင့်မားလာစေရန်အတွက် နိုင်ငံတော်သမ္မတရုံး၏ Project Bank ဆိုင်ရာ ညွှန်ကြားချက်တွင် PPP နှင့်သက်ဆိုင်သည့် ကိစ္စရပ်များကို အခန်း (၄) မှ အခန်း (၁၀) အထိ ထည့်သွင်းပြဋ္ဌာန်းထားကြောင်းလည်း ၎င်းက ပြောသည်။
အစိုးရ-ပုဂ္ဂလိက ပူးပေါင်းဆောင်ရွက်မှုဗဟိုဌာန (PPP Center) အနေဖြင့်လည်း အစိုးရ၏ ဖိတ်ခေါ်မှုမရှိဘဲ မိမိဆန္ဒအလျောက် တင်သွင်းလာသည့် စီမံကိန်းအဆိုပြုလွှာများအတွက် ယှဉ်ပြိုင်တင်ဒါခေါ်ယူမှု လုပ်ငန်းစဉ်ဆိုင်ရာ လုပ်ထုံးလုပ်နည်းများကို အမျိုးသားကာကွယ်ရေးနှင့် လုံခြုံရေးကောင်စီရုံး၏ ညွှန်ကြားချက်ဖြင့် ထုတ်ပြန်ထားကြောင်း သိရသည်။
ထို့အပြင် PPP နှင့်စပ်လျဉ်းသည့် အစိုးရ-ပုဂ္ဂလိက ပူးပေါင်းဆောင်ရွက်မှုဆိုင်ရာ ညွှန်ကြားချက် (Notification of PPP) ကိုလည်း ရေးဆွဲထားပြီး ဥပဒေရေးရာဝန်ကြီးဌာနသို့ သဘောထားတောင်းခံထားကြောင်း ဒုတိယဝန်ကြီး ဦးကျော်ထင်က ပြောကြားခဲ့သည်။
ဒေသတွင်း အာဆီယံနိုင်ငံများအနက် PPP ဥပဒေ သီးခြားပြဋ္ဌာန်းထားသည့် နိုင်ငံ လေးနိုင်ငံရှိပြီး မြန်မာနိုင်ငံအပါအဝင် နိုင်ငံခုနစ်နိုင်ငံတွင် လမ်းညွှန်ချက်များ၊ စည်းမျဉ်းများ၊ ဒီကရီများ၊ အက်ဥပဒေများနှင့် PPP လက်စွဲများကို အသုံးပြု၍ လုပ်ငန်းများ ဆောင်ရွက်လျက်ရှိကြောင်းလည်း သိရသည်။
လက်ရှိတွင် PPP လုပ်ငန်းများကို အစိုးရဌာနများနှင့် အဖွဲ့အစည်းများအနေဖြင့် ထုတ်ပြန်ထားသည့် ညွှန်ကြားချက်များ၊ သက်ဆိုင်ရာဥပဒေ၊ နည်းဥပဒေများနှင့် လုပ်ထုံးလုပ်နည်းများနှင့်အညီ ဆောင်ရွက်နိုင်ကြောင်း ဝန်ကြီးဌာနက ပြန်လည်ဖြေကြားခဲ့သည်။