မိုးလေဝသနှင့် ဇလဗေဒညွှန်ကြားမှုဦးစီးဌာနသည် ရန်ကုန် (ကမ္ဘာအေး)ရုံး၌ လေထုအတွင်းရှိ အမှုန်အမွှားများ (PM2.5)နှင့် ရှမ်းပြည်နယ် (အရှေ့ပိုင်း) ကျိုင်းတုံမြို့တွင် မျက်နှာပြင်အိုဇုန်း (O3 )၊ (PM10 နှင့် PM2.5 ) ပါဝင်မှုများကို ၂၄ နာရီပတ်လုံး စောင့်ကြည့်တိုင်းတာလျက်ရှိသည်။
၂၀၂၆ ခုနှစ် မေလအတွင်း တိုင်းတာရရှိသည့် အချက်အလက်များအရ မြို့ကြီးနှစ်မြို့၏ လေထုအရည်အသွေး အညွှန်းကိန်းအခြေအနေမှာ အောက်ပါအတိုင်း ဖြစ်သည်။
မြို့အလိုက် လေထုအရည်အသွေး နှိုင်းယှဉ်ချက်
ရန်ကုန် (ကမ္ဘာအေး)
မေလအတွင်း တိုင်းတာရရှိသည့် နေ့ရက်များတွင် လေထုအရည်အသွေးသည် “ကောင်းမွန်သော အဆင့်”တွင် ၈ ရက် ရှိခဲ့သည်။
ကျန်ရှိသည့် ၂၀ ရက်တွင် “အသင့်အတင့်အဆင့် ” ရှိကြောင်း တွေ့ရှိရသည်။
ကျိုင်းတုံမြို့
မေလအတွင်း လေထုအရည်အသွေးသည် “ကောင်းမွန်သော အဆင့်”အဆင့်တွင် ၈ ရက်ရှိခဲ့သည်။
ကျန်ရှိသည့် ၂၃ ရက်တွင် “အသင့်အတင့်အဆင့် ” ရှိကြောင်း တွေ့ရှိရသည်။
လေအရည်အသွေး အညွှန်းကိန်း (AQI) ဆိုင်ရာ အဓိပ္ပာယ်ဖွင့်ဆိုချက်
AQI သည် ၀ – ၅၀ ဆိုပါက လေအရည်အသွေး (ကောင်း)အဆင့်ရှိကာ လေထုညစ်ညမ်းမှုမရှိဘဲ ကျန်းမာရေးအန္တရာယ် မရှိသလောက် နည်းပါးသည်။
AQI သည် ၅၁ – ၁၀၀ ဆိုပါက လေအရည်အသွေး (အသင့်အတင့်) အဆင့်ရှိကာ ကျန်းမာရေး ထိခိုက်နိုင်ခြေအနည်းငယ်ရှိနိုင်သည်။
AQI သည် ၁၀၁ – ၁၅၀ ဆိုပါက ခံနိုင်ရည်နည်းပါးသောသူများအတွက် ကျန်းမာရေးထိခိုက်စေသည်။ ယေဘုယျအားဖြင့် ကျန်းမာရေးအတွက် စိုးရိမ်ဖွယ်မရှိပေ။
AQI သည် ၁၅၁ – ၂၀၀ ဆိုပါက ကျန်းမာရေးထိခိုက်စေသောအဆင့်ဖြစ်ပြီး လူတိုင်းကျန်းမာရေးထိခိုက်မှုမျိုး ကြုံတွေ့နိုင်ကြောင်း သိရသည်။
ရှမ်းပြည်နယ် (အရှေ့ပိုင်း) ၏ နယ်စပ်ဒေသများသည် ထိုင်းနိုင်ငံနှင့် နီးကပ်စွာ တည်ရှိနေခြင်းကြောင့် “နယ်စပ်ဖြတ်ကျော် မီးခိုးငွေ့ညစ်ညမ်းမှု” ပြဿနာတွင် အမြဲတမ်း ပါဝင်ပတ်သက်နေလေ့ ရှိသည်။
နယ်စပ်ဖြတ်ကျော် မီးခိုးငွေ့နှင့် ပတ်သက်၍ ထိုင်းနိုင်ငံဘက်မှ တင်းကျပ်လာသည်များမှာ
ထိုင်းအစိုးရသည် ၎င်းတို့နိုင်ငံအတွင်း လေထုညစ်ညမ်းမှု (PM2.5 ) ကို အဓိကဖြစ်စေသည့် အိမ်နီးနားချင်းနိုင်ငံများမှ တောမီးလေ-ာင်ခြင်းနှင့် စိုက်ပျိုးရေးဘေးထွက်ပစ္စည်း (ဥပမာ – ပြောင်းရိုး၊ ပြောင်းခွံ) မီးရှို့မှုများကို တားဆီးရန်အတွက် “မီးရှို့ရာမှ ထွက်ရှိလာသည့် စိုက်ပျိုးရေးထုတ်ကုန်များ”ကို ထိုင်းနိုင်ငံအတွင်းသို့ တင်သွင်းခွင့် ပိတ်ပင်တားဆီးမည့် ဥပဒေကြမ်းများကို အရှိန်အဟုန်မြှင့် ဆောင်ရွက်နေသည်။
မီးရှို့သည့် နေရာများအားလုံးကို ဂြိုဟ်တုဖြင့် စောင့်ကြည့်နေပြီး၊ အဆိုပါ မီးရှို့မှုဒေသများမှ ထွက်ရှိလာသည့် ကုန်စည်များကို ထိုင်းနိုင်ငံတွင်းရှိ လုပ်ငန်းစုကြီးများက ဝယ်ယူခြင်းမပြုရန် တင်းကျပ်သော ကန့်သတ်ချက်များ ချမှတ်ထားသည်။
“သန့်ရှင်းသော လေထုဥပဒေကြမ်း” (Clean Air Act) ၏ ထူးခြားချက်မှာ ထိုင်းနိုင်ငံပြင်ပ (အိမ်နီးနားချင်းနိုင်ငံများ) တွင် တရားမဝင် မီးရှို့မှုများကြောင့် ထိုင်းပြည်သူများ၏ ကျန်းမာရေးကို ထိခိုက်စေသည့် မီးခိုးငွေ့များ ထိုင်းနိုင်ငံတွင်းသို့ ဖြတ်ကျော်ဝင်ရောက်လာပါက၊ အဆိုပါ မီးရှို့မှုတွင် ပါဝင်ပတ်သက်နေသည့် ကုမ္ပဏီများ သို့မဟုတ် လုပ်ငန်းရှင်များကိုပါ ဥပဒေကြောင်းအရ ပြစ်ဒ-ဏ်ခတ် အရေးယူနိုင်မည့် ပြဋ္ဌာန်းချက်များ ပါဝင်လာခြင်း ဖြစ်သည်။
ပြည်တွင်းရှိ စိုက်ပျိုးရေးလုပ်ငန်းရှင်များနှင့် ဒေသခံတောင်သူများအနေဖြင့် ထိုင်းဈေးကွက်သို့ ဆက်လက်တင်ပို့နိုင်ရန်အတွက် စိုက်ပျိုးရေးစွန့်ပစ်ပစ္စည်းများကို စည်းကမ်းမဲ့ မီးရှို့ဖျ-က်ဆီးမည့်အစား အခြားနည်းလမ်းများဖြင့် ပြောင်းလဲအသုံးချရန် (သို့မဟုတ်) မီးခိုးငွေ့လျှော့ချရေး နယ်စပ်စည်းကမ်းများကို အထူးသတိပြု လိုက်နာရန် လိုအပ်လာကြောင်း စီးပွားရေးနှင့် ပတ်ဝန်းကျင်လေ့လာသူများက သုံးသပ်ထားကြသည်။