ကျူးဘားကမ်းလွန်မှာ နှစ်ပေါင်း ၁၅၀ နီးပါးအတွင်း အားအပြင်းဆုံး ငလျင်တစ်ခု လှုပ်ခတ်သွားလို့ မက္ကဆီကိုနဲ့ ဖလော်ရီဒါအထိပါ တုန်ခါမှုတွေ ခံစားခဲ့ရပါတယ်။
တရားဝင်သတင်းထုတ်ပြန်ချက်တွေအရ ဒေသစံတော်ချိန် တနင်္လာနေ့ မနက် ၂ နာရီတုန်းက ကျူးဘားအနောက်မြောက်ဘက် ကမ်းလွန်မှာ သမိုင်းဝင်အားပြင်းငလျင်တစ်ခု လှုပ်ခတ်သွားခဲ့တာပါ။ အဲဒီငလျင်ကြောင့် ပုံမှန်ဆိုရင် ငလျင်သိပ်မလှုပ်တတ်တဲ့ ကျူးဘား၊ မက္ကဆီကိုနဲ့ ဖလော်ရီဒါပြည်နယ်က နေရာတော်တော်များများပါ လှုပ်ခါသွားခဲ့ပါတယ်။
အမေရိကန်ဘူမိဗေဒလေ့လာရေးအဖွဲ့ (USGS) ရဲ့ တိုင်းတာချက်အရ အဲဒီငလျင်ဟာ အနက် ၂၆ ကီလိုမီတာ (၁၆ မိုင်) အနက်ကို ဗဟိုပြုပြီး ပမာဏ ၆.၁ မဂ္ဂနီကျုနဲ့ လှုပ်ခတ်သွားတာဖြစ်ပါတယ်။ ငလျင်ဗဟိုချက်ကတော့ ကျူးဘားနိုင်ငံ၊ မန်တူအာမြို့ရဲ့ အနောက်-အနောက်မြောက်ဘက် ၁၀၄ ကီလိုမီတာအကွာမှာရှိပြီး မြို့တော်ဟာဗားနားကနေဆိုရင် ကားနဲ့ ၂ နာရီကနေ ၄ နာရီလောက် မောင်းရတဲ့ အကွာအဝေးပါ။
ကျူးဘားအနောက်ပိုင်းက ပီနားဒဲလ်ရီယို(Pinar del Rio) ဟိုတယ်မန်နေဂျာ ဖာလာဗီယာ ပူပို(Flavia Pupo) က ဟိုတယ်အဆောက်အအုံကြီး လှုပ်ခါသွားပြီး လူတွေတော်တော်လေး လန့်ဖျပ်ကုန်တဲ့အကြောင်းကို အခုလို ပြောပြပါတယ်။
“ဒီမှာရှိတဲ့သူတွေအားလုံးတော့ ဘာမှမဖြစ်ပါဘူး။ လမ်းပေါ်ကလူတွေကတော့ နည်းနည်း လန့်နေကြတာပေါ့” လို့ သူက ဖုန်းနဲ့ ပြောပြခဲ့တာပါ။
အခုနောက်ဆုံးလှုပ်ခတ်သွားတဲ့ ငလျင်ဒဏ်ကို ဝေးလံလှတဲ့ ဖလော်ရီဒါပြည်နယ်အထိပါ ခံစားခဲ့ရပါတယ်။ မိုင်ယာမီမြို့မှာရှိတဲ့ အမျိုးသားမိုးလေဝသဌာနကလည်း ပြည်နယ်အနောက်တောင်ပိုင်းမှာ ငလျင်လှုပ်ခတ်မှုကို ခံစားခဲ့ရတယ်ဆိုတဲ့ သတင်းပေးပို့ချက်အမြောက်အမြား ရရှိခဲ့ကြောင်း Twitter (X) မှာ တင်ထားပါတယ်။ တနင်္လာနေ့မွန်းလွဲပိုင်းက လူမှုကွန်ရက်ပေါ်မှာ တက်လာတဲ့ ပို့စ်အများအပြားအရဆိုရင် အော်လန်ဒိုမြို့(Orlando) ရဲ့ မြောက်ဘက်ပိုင်းက လူတွေပါ ငလျင်ဒဏ်ကို သတိပြုမိခဲ့ကြတယ်လို့ သိရပါတယ်။
ဖို့တ်လော်ဒါဒေးလ်(Fort Lauderdale) မြို့လယ်က ရှေ့နေရုံးတစ်ခုမှာ အလုပ်လုပ်နေတဲ့ မာရီယာ မွန်ကာယို(Maria Moncayo) ကတော့ သူ ရုံးခန်းစားပွဲမှာ အေးအေးဆေးဆေး အလုပ်လုပ်နေတုန်း တစ်ခုခု တုန်ခါနေသလိုမျိုး စပြီး ခံစားခဲ့ရတယ်လို့ ပြောပါတယ်။ အဆောက်အအုံရဲ့ တခြားတစ်နေရာရာမှာ ဆောက်လုပ်ရေးလုပ်ငန်းခွင်တစ်ခုခု လုပ်နေသလိုမျိုး ခံစားချက်နဲ့ တူပြီး၊ တစ်မိနစ်ခွဲလောက် ကြာအောင် လှုပ်ခါသွားခဲ့တာပါလို့ သူက ဆိုပါတယ်။
အဲဒီ လှုပ်ခတ်ခဲ့တဲ့ ငလျင်မျိုးဟာ ကာရစ်ဘီယံဒေသရဲ့ ဒီလိုနေရာမျိုးမှာ ဖြစ်ခဲတယ်လို့ USGS က ငလျင်ပညာရှင် ပေါလ်အားလ်က ပြောပါတယ်။ ဒီငလျင်ဟာ တက်တိုးနစ်ကျောက်ချပ်လွှာတစ်ခုတည်းရဲ့ အတွင်းပိုင်းမှာ ဖြစ်ပွားခဲ့တာဖြစ်ပြီး၊ ပုံမှန်အားဖြင့် ကျောက်ချပ်လွှာအစွန်းနားတွေမှာ ဖြစ်တတ်တဲ့ ငလျင်တွေထက်စာရင် ဒီလိုကျောက်ချပ်လွှာအတွင်းပိုင်းမှာဖြစ်တဲ့ ငလျင်တွေက ပြန့်ကျဲပြီး ဖြစ်လေ့ဖြစ်ထလည်း ပိုနည်းတယ်လို့လဲ သူက ရှင်းပြပါတယ်။