ရန်ကုန်တိုင်းဒေသကြီးအတွင်း ယာဉ်စည်းကမ်း၊ လမ်းစည်းကမ်း ဖောက်ဖျက်ကျူးလွန်သည့် ယာဉ်များကို ပြည်သူများအနေဖြင့် Viber မှတစ်ဆင့် တိုင်ကြားနိုင်ကြောင်း ရန်ကုန်တိုင်းဒေသကြီး ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီက အသိပေးထုတ်ပြန်ထားသည်။
တိုင်ကြားလိုသူများအနေဖြင့် ယာဉ်ထိန်းရဲတပ်ဖွဲ့မှူးရုံး (ရန်ကုန်) ၏ Online Complaint Centre (OCC) သို့ Viber ဖုန်းနံပါတ် ၀၉-၇၇၇၄၃၆၂၃၂ မှတစ်ဆင့် ပေးပို့တိုင်ကြားနိုင်ကြောင်း သိရသည်။
တိုင်ကြားရာတွင် ဖြစ်ပွားသည့် နေ့ရက်၊ အချိန်၊ နေရာ၊ ယာဉ်နံပါတ်နှင့် ပြစ်မှုထင်ရှားစေမည့် ဓာတ်ပုံ သို့မဟုတ် ဗီဒီယိုမှတ်တမ်းများကို ပူးတွဲပေးပို့ရန် လိုအပ်ကြောင်းလည်း အသိပေးထားသည်။
Viber မှတစ်ဆင့် တိုင်ကြားလာသည့် အမှုများကို သက်ဆိုင်ရာတာဝန်ရှိသူများက စိစစ်ကာ ဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း သိရသည်။
ထို့ပြင် မော်တော်ယာဉ်သက်တမ်းတိုးဆောင်ရွက်ရာတွင် လိုအပ်သည့် “ပြစ်မှုကင်းရှင်းကြောင်း ထောက်ခံချက်” ကို ပုဇွန်တောင်မြို့နယ်ရှိ အမှတ်(၂) ယာဉ်ထိန်းရဲတပ်ဖွဲ့ခွဲမှူးရုံး၊ မှုသေးစစ်ဌာနတွင် လည်းကောင်း၊ မြင်သာ၊ အင်းစိန်၊ ဒဂုံတောင်၊ ရွာသာကြီး (ဒဂုံအရှေ့) နှင့် သန်လျင်မြို့ရှိ ကုန်းလမ်းပို့ဆောင်ရေးညွှန်ကြားမှုဦးစီးဌာန၏ One Stop Service (OSS) စင်တာများတွင်လည်းကောင်း ထုတ်ယူနိုင်ကြောင်း ထုတ်ပြန်ချက်တွင် ဖော်ပြထားသည်။