ရတနာပုံမြို့သစ်စီမံကိန်းဧရိယာအတွင်း သောက်သုံး ရေလုံလောက်စွာရရှိရေးနှင့် လျှပ်စစ်မီးလိုအပ်ချက်ဖြည့်ဆည်းပေးနိုင်ရေးအတွက် နေရောင်ခြည်စွမ်းအင်သုံးလျှပ်စစ်ဓာတ်အားထုတ်လုပ်မှုလုပ်ငန်းဆောင်ရွက်ရန် နိုင်ငံတော်သမ္မတ ဦးမင်းအောင်လှိုင်က မှာကြားသည်။
နိုင်ငံတော်သမ္မတက ယနေ့ မေ ၁၆ ရက်တွင် မန္တလေးတိုင်း၊ ပြင်ဦးလွင်မြို့နယ်၊ ပြင်စာကျေးရွာအနီး ရတနာပုံမြို့သစ်စီမံကိန်းနှင့် ရတနာပုံတယ်လီပို့အဆောက်အဦတို့အားကြည့်ရှုစစ်ဆေးစဥ် အထက်ပါအတိုင်းမှာ ကြားခဲ့ခြင်းဖြစ်သည်။
အဆောက်အဦများတည်ဆောက်ရာ၌ ငလျင်ဒဏ်ခံနိုင်သည့် အဆောက်အဦများဖြစ်စေရန်၊ စီမံကိန်းဧရိယာအတွင်း စိမ်းလန်းစိုပြေရေး၊ ရေအရင်းအမြစ်များကို အပြည့်အဝနှင့်အကျိုးရှိရှိအသုံးချနိုင်ရေး စီမံဆောင် ရွက်ရန်၊ ရတနာပုံမြို့သစ်စီမံကိန်းအတွင်း ဒီဂျစ်တယ်၊ အိုင်တီနှင့် အေအိုင်နည်းပညာများ တိုးတက်စေရေး သက်ဆိုင်ရာ ဝန်ကြီးဌာနမှ အကောင်အထည်ဖော်ဆောင်ရွက်ရန်တို့ကို မှာကြားသည်။
ထို့ပြင် လုပ်ငန်းဆောင်ရွက်မည့် ကုမ္ပဏီများအနေဖြင့် ဒီဂျစ်တယ်၊ အိုင်တီနှင့် အေအိုင်နည်းပညာများ ဖွံ့ဖြိုးတိုးတက်စေမည့် အထောက်အကူပြုပစ္စည်းထုတ်လုပ်ခြင်းလုပ်ငန်းများကိုသာဆောင်ရွက်ရန်၊ ဝန်ထမ်းအိမ်ရာများ၊ သွားရေးလာရေးနှင့် အုပ်ချုပ်မှုများ အဆင်ပြေစေရေးအတွက်စီမံဆောင်ရွက်ရန် မှာကြားသည်။
ထို့အတူ Master Plan ကို စနစ်တကျရေးဆွဲဆောင် ရွက်ရန်၊ Master Plan ကို စနစ်တကျရေးဆွဲပြီးမှသာ စိမ်းလန်းစိုပြေရေးလုပ်ငန်းများကို ဆက်လက်ဆောင်ရွက်ရန်တို့ကိုလည်း နိုင်ငံတော်သမ္မတက မှာကြားခဲ့သည်။
ထို့နောက် နိုင်ငံတော်သမ္မတက ရတနာပုံမြို့သစ် စီမံ ကိန်းဧရိယာအတွင်းကို မော်တော်ယာဉ်များဖြင့်ကြည့်ရှုစစ်ဆေးခဲ့သည်။