မွန်ပြည်နယ်၊ ကျိုက်ထိုမြို့နယ်အတွင်း ငှက်ဖျားရောဂါကို အပြီးတိုင်တိုက်ဖျက်နိုင်ရန်အတွက် မြို့နယ်ပြည်သူ့ကျန်းမာရေးဦးစီးဌာနမှ Malaria Microstratific ation ဟုခေါ်သည့် စီမံချက်အသစ်တစ်ရပ်ကို စတင်ကျင့်သုံးဆောင်ရွက်နေပြီဖြစ်ကြောင်း သိရသည်။
အဆိုပါ စီမံချက်အသစ်အရ မြို့နယ်တစ်ခုလုံးကို တစ်ပြေးညီဆောင်ရွက်မည့်အစား ကျေးရွာတစ်ရွာချင်းစီနှင့် တောစပ်တစ်ခုချင်းစီအထိ ရောဂါဖြစ်ပွားမှုနှုန်းကို အ သေးစိတ် ခွဲခြမ်းစိတ်ဖြာကာ ရရှိလာသည့် အချက်အလက်များအပေါ် မူတည်၍ ရောဂါအန္တရာယ်ရှိမှု အခြေအနေကို အရောင်များဖြင့် အဆင့်သတ်မှတ်ကာ ငှက်ဖျားပိုး အားအကောင်းဆုံးရှိနေသည့် အနီရောင်အဆင့်ဒေသများကို ဦးစားပေး တိုက်ဖျက်သွားမည် ဖြစ်ကြောင်းသိရသည်။
ထို့သို့ အသေးစိတ်အဆင့်သတ်မှတ်လိုက်ခြင်းကြောင့် ဆေးစိမ်ခြင်ထောင်များ ဖြန့်ဝေခြင်းနှင့် ဆေးဖျန်းခြင်းလုပ်ငန်းများကို အမှန်တကယ် လိုအပ်သည့်နေရာများသို့ ထောက်ပံ့ပေးနိုင်မည်ဖြစ်ရာ အရင်းအမြစ်များ လေလွင့်မှုကို လျှော့ချနိုင်မည်ဖြစ်ကြောင်း အသိပေးထားသည်။
ယင်းစီမံချက်ကြောင့် တောတောင်လုပ်ငန်းလုပ်ကိုင်သူများနှင့် ဝေးလံသည့်ကျေးရွာများရှိ မိဘပြည်သူများထံသို့ ကျန်းမာရေးစောင့်ရှောက်မှုများ ပိုမိုထိရောက်စွာ ရောက်ရှိလာမည်ဖြစ်သကဲ့သို့ ကျန်းမာရေးဝန်ထမ်းများ ကွင်းဆင်းမေးမြန်းခြင်းနှင့် ကာကွယ်ရေးပစ္စည်းများ ပေးအပ်ခြင်းတို့ လုပ်ဆောင်ရာတွင် ဒေသခံပြည်သူများအနေဖြင့် အား တက်သရော ပူးပေါင်းပါဝင်ပေးကြရန်လည်း မေတ္တာရပ်ခံထားသည်။
ကျိုက်ထိုမြို့နယ် ကျန်းမာရေးဦးစီးဌာနအနေဖြင့် စနစ်တကျစီမံဆောင်ရွက်ခြင်းဖြင့် ဒေသခံများ ငှက်ဖျားရောဂါကြောင့် အသက်ဆုံးရှုံးခြင်းနှင့် အလုပ်ပျက်ကွက်ခြင်းတို့မှ ကင်းဝေးစေရန်ရည်ရွယ်ဆောင်ရွက်နေခြင်း ဖြစ်ကြောင်း သိရသည်။
