မွန်ပြည်နယ်၊ ချောင်းဆုံမြို့နယ်၊ ကမာကေးကျေးရွာရှိ ချောင်းပြန်လည်တူးဖော်ချဲ့ထွင်ရေးလုပ်ငန်းများ အောင်မြင်စွာ အကောင်အထည်ဖော်နိုင်ရန်အတွက် ချောင်းဆုံမြို့နယ် လွှတ်တော်ကိုယ်စားလှယ်များက ကွင်းဆင်းစစ်ဆေးမှုများ ဆောင်ရွက်ခဲ့ကြောင်း သိရသည်။
အဆိုပါ ကွင်းဆင်းစစ်ဆေးမှုတွင် မွန်ညီညွတ်ရေးပါတီ (MUP) မှ ချောင်းဆုံမြို့နယ် လွှတ်တော်ကိုယ်စားလှယ်များသည် ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာနမှ တာဝန်ရှိသူများနှင့် ပူးပေါင်းကာ ချောင်းအတွင်း ရေစီးရေလာကောင်းမွန်စေရေး၊ နုန်းမြေများ ဖယ်ရှားရေးနှင့် လက်ရှိလုပ်ငန်းခွင် အခြေအနေများကို အသေးစိတ် ကြည့်ရှုစစ်ဆေးခဲ့ကြသည်။
ယခုကဲ့သို့ ချောင်းတူးဖော်ခြင်းလုပ်ငန်း ဆောင်ရွက်ရခြင်းမှာ ဒေသခံတောင်သူများအတွက် စိုက်ပျိုးရေဖူလုံစွာ ရရှိစေရန်နှင့် မိုးရာသီတွင် ရေဘေးအန္တရာယ်မှ ကြိုတင်ကာကွယ်နိုင်ရန် ရည်ရွယ်ခြင်းဖြစ်သည်။ လွှတ်တော်ကိုယ်စားလှယ်များသည် လုပ်ငန်းများ အမြန်ဆုံးနှင့် အထိရောက်ဆုံး ပြီးစီးနိုင်ရေးအတွက် လိုအပ်သော လုပ်ငန်းစဉ်များကို သက်ဆိုင်ရာဌာနများနှင့် ညှိနှိုင်းဆွေးနွေး ဆောင်ရွက်ခဲ့သည်။
အဆိုပါ လုပ်ငန်းများကို “ပြည်သူ့လိုအပ်ချက်ကို ဗဟိုပြု၍ ပိုမိုကောင်းမွန်သော အပြောင်းအလဲများဆီသို့” ဆိုသည့် ဦးတည်ချက်ဖြင့် အကောင်အထည်ဖော် ဆောင်ရွက်နေခြင်းဖြစ်ကြောင်း မွန်ညီညွတ်ရေးပါတီ-ချောင်းဆုံ၏ ထုတ်ပြန်ချက်အရ သိရှိရသည်။