“ကမ္ဘာပတ်ဖို့ အချိန်မရလို့ စိတ်မပူပါနဲ့၊ တစ်ကမ္ဘာလုံးက ရန်ကုန်ကို ရောက်လာပါပြီ”

“နိုင်ငံတကာရဲ့ ထူးခြားဆန်းသစ်တဲ့ အနုပညာရသတွေ၊ မြင်ဖူးချင်လှပါတယ်ဆိုတဲ့ ရိုးရာယဉ်ကျေးမှု ဖျော်ဖြေပွဲတွေနဲ့ ကမ္ဘာကျော်အစားအစာတွေကို တစ်နေရာတည်းမှာ စုံစုံလင်လင် ထိတွေ့ခံစားခွင့်ရမယ့် အခွင့်အရေးကြီး၊သူငယ်ချင်းတွေ၊ မိသားစုတွေနဲ့အတူ နိုင်ငံပေါင်းစုံရဲ့ အငွေ့အသက်တွေကို တဝကြီး ရှူရှိုက်ရင်း ဗဟုသုတအသစ်တွေနဲ့ အတွေ့အကြုံသစ်တွေကို ရယူပိုင်ဆိုင်နိုင်မည့်ပွဲ၊အိမ်မှာပဲ အချိန်ကုန်မယ့်အစား နိုင်ငံတကာရဲ့ ယဉ်ကျေးမှု စင်္ကြံလမ်းထက်မှာ လမ်းလျှောက်ရင်း သင့်ရဲ့နွေအလွန်ကို ပိုမိုတောက်ပအောင် ဖန်တီးလိုက်ပါ။

နိုင်ငံကြီး (၈) နိုင်ငံ၏ ယဉ်ကျေးမှုနှင့် အစားအစာများကို ရန်ကုန်၌ တစ်နေရာတည်းတွင် လေ့လာနိုင်မည့် Cultural Connections 2026 ကျင်းပမည်

ရန်ကုန်မြို့ရှိ နိုင်ငံတကာသံရုံးများနှင့် ယဉ်ကျေးမှုစင်တာများ ပူးပေါင်း၍ Cultural Connections 2026 အစီအစဉ်ဖြင့် နိုင်ငံကြီး (၈) နိုင်ငံ၏ အနုပညာ၊ ယဉ်ကျေးမှုနှင့် အစားအစာများကို လာမည့် မေလ ၁၅ ရက်နေ့မှစတင်ကာ ခံစားလေ့လာနိုင်တော့မည် ဖြစ်သည်။

ပါဝင်မည့်နိုင်ငံများနှင့် အစီအစဉ်များ

အမေရိကန်၊ ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်၊ ကိုရီးယား နှင့် ယူကေ (UK) နိုင်ငံတို့၏ သံရုံးများနှင့် ယဉ်ကျေးမှုစင်တာများတွင် အောက်ပါအစီအစဉ်များကို ထည့်သွင်းထားကြောင်း အမေရိကန်သံရုံးက သတင်းထုတ်ပြန်ထားပါသည် –

နိုင်ငံအလိုက် ရိုးရာနှင့် ခေတ်ပေါ် တိုက်ရိုက်ဖျော်ဖြေတင်ဆက်မှုများ။
အနုပညာနှင့် ဓာတ်ပုံပြပွဲများ။
သက်ဆိုင်ရာနိုင်ငံများ၏ နာမည်ကြီး ရိုးရာအစားအစာများကို မြည်းစမ်းနိုင်မည့် အစီအစဉ်များ။

ကျင်းပမည့်ရက်စွဲများ

နိုင်ငံအလိုက် ယဉ်ကျေးမှုဖလှယ်ပွဲများကို အောက်ပါရက်စွဲများအတိုင်း သတ်မှတ်ထားပါသည် –

မေလ ၁၅ ရက်: ကနေဒါနိုင်ငံ
မေလ ၁၆ ရက်: အီတလီနိုင်ငံ နှင့် ပြင်သစ်နိုင်ငံ
မေလ ၂၂ ရက်: အမေရိကန်နိုင်ငံ နှင့် ကိုရီးယားနိုင်ငံ
မေလ ၂၃ ရက်: ဂျပန်နိုင်ငံ၊ ဂျာမနီနိုင်ငံ နှင့် ယူကေ (UK) နိုင်ငံ

တက်ရောက်ရန် ဖိတ်ခေါ်ချက် နိုင်ငံတကာယဉ်ကျေးမှုများကို ရန်ကုန်မြို့တွင် လက်တွေ့ထိတွေ့ခံစားပြီး အတွေ့အကြုံသစ်များ ရယူနိုင်ရန် စီစဉ်ထားခြင်းဖြစ်ပြီး၊ သွားရောက်လေ့လာရမည့် လိပ်စာအသေးစိတ်များကို သက်ဆိုင်ရာသံရုံးများ၏ လူမှုကွန်ရက်စာမျက်နှာများတွင် အသိပေးဖော်ပြထားကြောင်း သိရသည်။