ယူကရိန်း၏ တိုက်ခိုက်လာနိုင်သည့် အန္တရာယ်ကြောင့် ရုရှားသည် ယခုနှစ်၏ စစ်အောင်နိုင်ခြင်း စစ်ရေးပြအခမ်းအနားကို နှစ်ပေါင်းများစွာအတွင်း အင်အားအနည်းဆုံးပမာဏဖြင့် ကျင်းပခဲ့သည်။
မေလ ၉ ရက် နေ့က ရင်ပြင်နီတွင် ကျင်းပသော စစ်ရေးပြအခမ်းအနားသည် ရုရှားနိုင်ငံ၏ အလေးအမြတ်အထားဆုံး နိုင်ငံတော်ရုံးပိတ်ရက်ဖြစ်ပြီး နာဇီဂျာမနီတို့အပေါ် ဆိုဗီယံပြည်ထောင်စုက အောင်ပွဲရခဲ့မှုကို ဂုဏ်ပြုရန်နှင့် ယူကရိန်းမှလည်း အများအပြား ပါဝင်သော ကျဆုံး ဆိုဗီယက်နိုင်ငံသား ၂၇ သန်းကို အောက်မေ့ဂုဏ်ပြုရန် ကျင်းပသည့် အချိန်ဖြစ်သည်။
နျူကလီးယားလက်နက်တပ်ဆင်နိုင်သော တိုက်ချင်းပစ် ပဲ့ထိန်းဒုံးကျည်များ အပါအဝင် တစ်ချိန်က ရုရှား၏ ကြီးမားသောစစ်အင်အားကို ပြသရန် အသုံးပြုခဲ့သော စစ်ရေးပြအခမ်းအနားသည် ယခုနှစ်တွင်မူ တင့်ကားများ သို့မဟုတ် အခြားစစ်နက်ပစ္စည်းများသည် ရင်ပြင်နီ၏ ကျောက်ခင်းလမ်းပေါ်တွင် ပါဝင်ခဲ့ခြင်းမရှိပေ။
စစ်သည်များသည် ဗလာဒီမာလီနင်၏ ဂူဗိမာန်ရှေ့မှောက်တွင် ချီတက်၍ ကောင်းချီးပေးကြမည်ဖြစ်ပြီး တိုက်လေယာဉ်များက ခရမ္မလင်၏ မျှော်စင်များပေါ်တွင် ပျံသန်းကြမည်ဖြစ်ကာ သမ္မတ ဗလာဒီမာပူတင်က မိန့်ခွန်းပြောကြားမည်ဖြစ်သည်။ ယင်းနောက်တွင် အညတရ စစ်သည်တော်များ၏ ဂူဗိမာန်တွင် သမ္မတပူတင်က ပန်းခွေချ မည်ဖြစ်သည်။
“စစ်ဘက်ပစ္စည်းတွေ ထုတ်ပြတဲ့အစီအစဉ်ကလွဲလို့ ယေဘုယျအားဖြင့်တော့ ပုံမှန်အတိုင်းပါပဲ” ဟု ခရမ္မလင်၏ လက်ထောက် ယူရီယူရှာကော့ဗ်က သတင်းထောက်များကို ပြောကြားခဲ့သည်။
စစ်ပွဲအဆုံးသတ်ရေး အမေရိက၏ သံတမန်ရေးကြိုးပမ်းမှု တစ်စိတ်တစ်ပိုင်းအဖြစ် ရုရှားနှင့် ယူကရိန်းတို့သည် မေလ ၁၁ ရက်နေ့အထိ အပစ်ရပ်စဲရန်နှင့် နှစ်ဖက် စစ်အကျဉ်းသား ၁,၀၀၀ ခန့်စီလဲလှယ်ရန် သောကြာနေ့တွင် သဘောတူခဲ့သည်ဟု သမ္မတ ဒေါ်နယ်ထရမ့်ပ်က ကြေညာခဲ့သည်။
စနေနေ့ စစ်ရေးပြအခမ်းအနားကို နှောင့်ယှက်ရန် ကိဗ်၏ ကြိုးပမ်းမှုတိုင်းသည် ယူကရိန်းမြို့တော်ကို ကြီးမားသော ဒုံးကျည်တိုက်ခိုက်မှုမျိုးကို ဖြစ်ပေါ်စေလိမ့်မည်ဟု ရုရှားက သတိပေးခဲ့သည်။ ထိုကဲ့သို့ တိုက်ခိုက်မှုဖြစ်ပွားပါက ကိဗ်ရှိ ဝန်ထမ်းများကို ဘေးလွတ်ရာသို့ ရွှေ့ပြောင်းပေးထားသင့်ကြောင်း မော်စကိုက နိုင်ငံခြားသံတမန်များကို ပြောကြားခဲ့သည်။
ယူကရိန်းသမ္မတ ဇလန်းစကီးကမူ ၎င်း၏ နိုင်ငံသည် အပစ်အခတ်ရပ်စဲရေးကို လိုက်နာမည်ဖြစ်ကာ အကျဉ်းသားလဲလှယ်မှုကို ဆောင်ရွက်မည်ဖြစ်ပြီး စစ်ရေးပြပွဲကို မနှောင့်ယှက်ဟု သောကြာနေ့တွင် ပြောကြားခဲ့သည်။
Ref: အန်တာနာဇီယွန်နားလ်