AI နည်းပညာဖြင့်ဖန်တီးသည့် ပစ္စည်းများ များပြားလာသည်နှင့်အမျှ သရုပ်ဆောင် မက်သျူး မက်ကွန်နော့ဟီးပြုလုပ်ခဲ့သကဲ့သို့ပင် တေးသံရှင် တေလာဆွစ်ဖ်ကလည်း သူ၏ အသံကို ကုန်အမှတ်တံဆိပ်မှတ်ပုံတင်ရန် အမေရိကန် ဉာဏပစ္စည်းဆိုင်ရာရုံးတွင် လျှောက်လွှာတင်ခဲ့သည်။
အမေရိကန်ပြည်ထောင်စု မူပိုင်ခွင့်နှင့် ကုန်အမှတ်တံဆိပ်ရုံး(USPTO) သို့ အသံဖိုင်နှစ်ခုကို အဆိုတော်က တင်သွင်းခဲ့သည်။ တစ်ခုချင်းစီတွင် “Hey,it’s Taylor” နှင့်စတင်ပြီး အောက်တိုဘာလအစောပိုင်းတွင် ထွက်ရှိခဲ့သည့် သူ၏ နောက်ဆုံးထွက် အယ်လ်ဘမ် The Life of a Showgirl ကို ဖြန့်ချိမည်ဟု ကြေညာခဲ့သည်။
သောကြာနေ့တွင် USPTO ကို တင်သွင်းခဲ့သည့် နောက်ထပ်စာရွက်စာတမ်းတစ်ခုသည် စင်မြင့်ပေါ်တွင် ဖျော်ဖြေနေသည့် အဆိုတော်၏ ဓာတ်ပုံတစ်ပုံဖြစ်သည်။ တင်သွင်းချက်များကို ဉာဏပစ္စည်းဆိုင်ရာ ရှေ့နေ ဂျို့စ်ဂါဘန်က ပထမဆုံး တွေ့သိခဲ့သည်။
လျှောက်ထားချက်များတွင် တင်သွင်းချက်နှင့် ပတ်သက်၍ နောက်ထပ်အသေးစိတ်အချက်အလက်များ မပါဝင်ခဲ့ပေ။
မက်ကွန်နော့ဟီးသည် မကြာသေးမီနှစ်များအတွင်း USPTO တွင် လျှောက်လွှာတစ်ခုတင်သွင်းခဲ့ပြီး AI မိုဒယ်လ်များက သူ၏ အသံကို ခွင့်ပြုချက်မရှိဘဲ အသုံးပြုခြင်းမှ ကာကွယ်ရန် ရည်ရွယ်ထားသည်။
ထိုအထဲတွင် ၁၉၉၃ ခုနှစ်ထွက် Dazed and Confused ရုပ်ရှင်မှ သူ၏ မှတ်မိလွယ်သော စကားစု “Alright,alright, alright!” အသံဖိုင်နှင့် “Just Keep livin’,right?” ဟု ပြောနေသောအသံနှင့်အတူ နောက်ထပ်အတိုကောက်စကားစုများ ပါဝင်သည်။
AI မိုဒယ်လ်များတွင် တိုးတက်မှုများကြောင့် ယခုအခါ တိုတောင်းသော ကလစ်တစ်ခုအတွက် စက္ကန့်ပိုင်းအတွင်း အသံတစ်ခုကို ပေါင်းစပ်လာနိုင်စေသော်လည်း လွန်ခဲ့သော နှစ်အနည်းငယ်ကမူ လုပ်ငန်းစဉ်အတွက် ရှည်လျားသော အသံသွင်းမှုများနှင့် ရက်အနည်းငယ်လိုအပ်ခဲ့သည်။
အနုပညာရှင်များစွာသည် ၎င်းတို့၏ ရုပ်ပုံနှင့် အသံကို AI ပလက်ဖောင်းများမှ စစ်ဆေးမှုမရှိဘဲ အသုံးပြုခြင်းအပေါ် ပိုမိုစိုးရိမ်လာကြသည်။
အမေရိကန်ပြည်နယ်များစွာသည် ထိုကဲ့သို့သော အသုံးပြုမှုများကို တားမြစ်သည့် ဥပဒေများကို အတည်ပြုခဲ့သော်လည်း အများစုသည် အဓိကအားဖြင့် အန္တရာယ်ရှိသော သို့မဟုတ် စီးပွားဖြစ်အမြတ်ထုတ်မှုများအတွက်သာ သက်ဆိုင်သည်။
Ref: ဘန်ကောက်ပို့စ်