၂၀၂၆ ခုနှစ် မဟာသင်္ကြန်ရုံးပိတ်ရက်ကာလအတွင်း အကောက်ခွန်လုပ်ငန်းများ အဆင်ပြေချောမွေ့စေရန် အကောက်ခွန်ဦးစီးဌာနမှ အထူးအစီအစဉ်များဖြင့် ဆောင်ရွက်ပေးသွားမည်ဖြစ်ကြောင်း ထုတ်ပြန် ကြေညာခဲ့သည်။
အဆိုပါကြေညာချက်အရ အပြည်ပြည်ဆိုင်ရာဆိပ်ကမ်းများနှင့် လေကြောင်းများမှတစ်ဆင့် တင်သွင်း၊ တင်ပို့မည့်ကုန်ပစ္စည်းများကို သင်္ကြန်ရုံးပိတ်ရက်ဖြစ်သော ဧပြီ ၁၁ ရက်၊ ၁၃ ရက်၊ ၁၄ ရက်နှင့် ၁၅ ရက်များတွင် ရုံးချိန်ပြည့် ဆောင်ရွက်ပေးသွားမည်ဖြစ်သည်။
ထို့ပြင် နိုင်ငံတော်လိုအပ်ချက်အရ အရေးတကြီးတင်သွင်းလာသော ပစ္စည်းများကို ကြိုတင်လျှောက်ထားပါက ထုတ်ယူနိုင်ရန်အတွက် လုပ်ငန်းများ ဆောင်ရွက်ပေးသွားမည်ဖြစ်ကြောင်း သိရသည်။
အချိန်ပို (Overtime) လုပ်ငန်းများ ဆောင်ရွက်လိုသော ကုမ္ပဏီများအနေဖြင့် အကောက်ခွန်ဦးစီးဌာနတွင် ကျသင့်ခွန်နှင့်ပတ်သက်သည့် Deposit ငွေ လုံလောက်စွာထားရှိရမည်ဖြစ်ပြီး ဧပြီ ၁၀ ရက်နေ့ မွန်းလွဲ ၂ နာရီမတိုင်မီ လျှောက်ထားရမည်ဖြစ်ကြောင်း ထုတ်ပြန်ထားသည်။
ထို့ပြင် Asia World ဆိပ်ကမ်းတွင် မြန်မာနှစ်ဆန်းတစ်ရက်နေ့မှအပ ကျန်ရုံးပိတ်ရက်များအတွင်း ပို့ကုန်ကုန်သေတ္တာများ စစ်ဆေးတင်ပို့မှုကို အချိန်ပိုဖြင့် သုံးဆိုင်းစနစ်ဖြင့် ဆောင်ရွက်ပေးသွားမည်ဖြစ်သည်။
နယ်စပ်ကုန်သွယ်ရေးစခန်းများနှင့် ကုန်သွယ်ရေးလမ်းကြောင်းရှိ မြို့နယ်အကောက်ခွန်ဦးစီးဌာနမှူးရုံးများတွင်လည်း သင်္ကြန်ကာလအတွင်း ပိတ်ရက်မရှိ ဆက်လက်လုပ်ငန်းဆောင်ရွက်ပေးသွားမည်ဖြစ်ကြောင်း သိရသည်။
ကုန်ပစ္စည်းတင်သွင်း၊ တင်ပို့ရာတွင် အခက်အခဲများရှိပါက သက်ဆိုင်ရာတာဝန်ရှိသူများ၏ ဖုန်းနံပါတ်များသို့ ဆက်သွယ်မေးမြန်းနိုင်ကြောင်း အကောက်ခွန်ဦးစီးဌာနက အသိပေးထားသည်။