သင်္ကြန်ပိတ်ရက်ကာလအတွင်း အများပြည်သူ၏ ခရီးသွားလာရေး အဆင်ပြေစေရန် ရည်ရွယ်၍ YBS ယာဉ်အစီးရေ ၁၀၀၀ ကျော်ဖြင့် ပြေးဆွဲဝန်ဆောင်မှုပေးသွားမည်ဖြစ်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ (YRTC) မှ သိရသည်။
သင်္ကြန်အကြိုနေ့ဖြစ်သည့် ဧပြီ ၁၃ ရက်မှ သင်္ကြန်အတက်နေ့ ဧပြီ ၁၇ ရက်အထိ YBS ကုမ္ပဏီ ၁၅ ခုမှ ယာဉ်လိုင်းပေါင်း ၇၁ လိုင်းဖြင့် ယာဉ်အစီးရေ ၁၀၀၀ ကျော်ကို အသုံးပြုပြီး ဆက်တိုက် ပြေးဆွဲပေးသွားမည်ဖြစ်သည်။
အဆိုပါကာလအတွင်း YBS ၁၊ ၅၊ ၆၊ ၉၊ ၁၂၊ ၁၈၊ ၁၉၊ ၂၃၊ ၂၇၊ ၃၃၊ ၃၄၊ ၃၅၊ ၃၇၊ ၃၉၊ ၄၀၊ ၄၁၊ ၄၂၊ ၄၃၊ ၄၄၊ ၄၅၊ ၄၆၊ ၅၂၊ ၅၃၊ ၅၄၊ ၆၁၊ ၆၂၊ ၆၅၊ ၆၆၊ ၆၇၊ ၆၈၊ ၇၀၊ ၇၁၊ ၇၂၊ ၇၄၊ ၇၅၊ ၇၆၊ ၇၇၊ ၇၉၊ ၈၁၊ ၈၄၊ ၈၅၊ ၈၇၊ ၈၈၊ ၈၉၊ ၉၀၊ ၉၁၊ ၉၂၊ ၁၀၃၊ ၁၀၆၊ ၁၀၇၊ ၁၁၁၊ ၁၁၉၊ ၁၂၀၊ ၁၂၃၊ ၁၂၄၊ ၁၂၆၊ ၁၂၉၊ ၁၃၀၊ ၁၃၁၊ ၁၃၂၊ ၁၃၃၊ ၁၃၄၊ ၁၃၆၊ ၁၃၇၊ ၁၃၈၊ ၁၃၉၊ ၁၄၂ နှင့် ၁၄၄ စသည့် ယာဉ်လိုင်းများ ပါဝင်မည်ဖြစ်ကြောင်း သိရသည်။
YRTC တာဝန်ရှိသူတစ်ဦးက “ရုံးပိတ်ရက်ရှည်ဖြစ်တဲ့ သင်္ကြန်ကာလအတွင်း မြို့တွင်း မဖြစ်မနေ သွားလာရသူတွေ အဆင်ပြေစေဖို့ အခုလို စီစဉ်ပေးတာဖြစ်ပါတယ်။ နှစ်ဆန်း ၂ ရက်နေ့ခန့်တွင် ယာဉ်လိုင်းများအားလုံး ပုံမှန်ပြန်လည် ပြေးဆွဲသွားမှာဖြစ်ပါတယ်” ဟု ပြောကြားသည်။
ထို့ပြင် သင်္ကြန်ကာလအတွင်း ပြေးဆွဲမည့် ယာဉ်လိုင်းများအနေဖြင့် ယာဉ်စီးခများကို ပုံမှန်နှုန်းထားအတိုင်းသာ ကောက်ခံရန် ညွှန်ကြားထားပြီး သတ်မှတ်နှုန်းထားထက် ပိုမိုကောက်ခံမှုများရှိပါက ယာဉ်လိုင်းနံပါတ်နှင့် ယာဉ်နံပါတ်များဖြင့် YRTC ထံသို့ တိုင်ကြားနိုင်ကြောင်းလည်း သိရသည်။
ပုံမှန်ကာလတွင် YBS ယာဉ်လိုင်းကုမ္ပဏီ ၂၁ ခု၊ ယာဉ်လိုင်း ၁၄၁ လိုင်း၊ ယာဉ်အစီးရေ ၅၄၆၂ စီးဖြင့် နေ့စဉ် ခရီးသည် ၁ ဒသမ ၅ သန်းကျော်အား သယ်ယူပို့ဆောင်ပေးလျက်ရှိကြောင်း သိရသည်။