ပြုံယမ်းသို့ရောက်ရှိလာသော ဘီလာရုစ်သမ္မတကို ကင်မ် ကြိုဆို

မြောက်ကိုရီးယားနိုင်ငံသို့ ပထမဆုံးအကြိမ် ရောက်ရှိလာသော ဘီလာရုစ်သမ္မတ အလက်ဇန်းဒါး လူကာရှန်ကို,ကို မြောက်ကိုရီးယားခေါင်းဆောင် ကင်မ်ဂျုံအန်က ကြိုဆိုနှုတ်ဆက်ခဲ့ကြောင်း ကေစီအန်အေသတင်းဌာနက မတ်လ ၂၆ ရက်နေ့တွင် သတင်းဖော်ပြခဲ့သည်။
      
မတ်လ ၂၅ ရက် နေ့က ကင်မ်အီလ်ဆွန်းရင်ပြင်တွင် ကျင်းပပြုလုပ်ခဲ့သော ကြိုဆိုပွဲအခမ်းအနား၌ မစ္စတာကင်မ်သည် မစ္စတာ လူကာရှန်ကို,ကို ဝမ်းမြောက်စွာတွေ့ဆုံနှုတ်ဆက်ခဲ့ပြီး နွေးထွေးစွာကြိုဆိုခဲ့သည်ဟု သတင်းတွင် ဖော်ပြခဲ့သည်။
        
မစ္စတာ လူကာရှန်ကိုသည် မစ္စတာကင်မ်၏ ဖခင်နှင့် အဖိုးတို့၏ ရုပ်ကလာပ်များကို မြှုပ်နှံထားရာ Kumsusan Palace of the Sun သို့ သွားရောက်ခဲ့ပြီး မြောက်ကိုရီးယားထိပ်တန်းအရာရှိများ ခြံရံလျက် ဂါရဝပြုခဲ့ကြောင်းလည်း ဆက်လက်ဖော်ပြခဲ့သည်။
       
မစ္စတာ လူကာရှန်ကိုသည် ရုရှားသမ္မတ ဗလာဒီမာပူတင်ကိုယ်စား ပန်းစည်းချဂါဝရပြုခဲ့သည်ဟုလည်း ဖော်ပြခဲ့သည်။
      
နောက်အခမ်းအနားတစ်ခုတွင် မစ္စတာ လူကာရှန်ကိုသည် မစ္စတာ ကင်မ်နှင့်အတူ ကိုရီးယားလွတ်မြောက်ရေးစစ်ပွဲအတွင်း ၎င်းတို့၏ အဖိုးတန်အသက်များကို ပေးဆပ်ခဲ့ကြသော ဆိုဗီယက်တပ်မတော်၏ ကျဆုံးစစ်သည်များအား အောက်မေ့သတိရခြင်းအဖြစ် လွတ်မြောက်ရေးမျှော်စင်တွင် ပန်းခွေချခဲ့ပြီး ခဏတာငြိမ်သက်ဂုဏ်ပြုခဲ့ကြသည်ဟု ဒုတိယကမ္ဘာစစ်အပြီး ၁၉၄၅ ခုနှစ်တွင် ဂျပန်ကိုလိုနီအုပ်ချုပ်မှု အဆုံးသတ်ခဲ့ခြင်းကို ရည်ညွှန်း၍ သတင်းတွင် ဖော်ပြခဲ့သည်။
         
မြောက်ကိုရီးယားနှင့် ဘီလာရုစ်နှစ်နိုင်ငံစလုံးသည် ယူကရိန်းစစ်ပွဲတွင် မော်စကိုဘက်မှ အကူအညီပေးခဲ့ပြီး ပြုံယမ်းသည် မြေပြင်တပ်ဖွဲ့များနှင့် လက်နက်များကို ပေးပို့ခဲ့ကာ ၂၀၂၂ ခုနှစ်တွင် ရုရှား၏ ကျူးကျော်မှုအတွက် မင့်စ်က အစပြုရာနေရာအဖြစ် ခွင့်ပြုပေးခဲ့သည်။

Ref: သယ်စထရိတ်တိုင်းမ်စ်