ပြည်သူများအနေဖြင့် သက်ဆိုင်ရာကို သတင်းပေးကာ ပူးပေါင်းပါဝင်ပေးရန် တိုက်တွန်း
မြန်မာနိုင်ငံအတွင်း ဝင်ရောက်လာသည့် အွန်လိုင်းလောင်းကစားမှုများ၊ လိမ်လည်မှုများကို ပြတ်ပြတ်သားသားနှိမ်နင်းသွားမည်ဖြစ်ကြောင်း ဒီဇင်ဘာ ၁၄ ရက်က ကျင်းပသည့် သတင်းစာရှင်းလင်းပွဲတွင် ဗိုလ်ချုပ်ဇော်မင်းထွန်းက ပြောကြားသည်။
“အွန်လိုင်းလောင်းကစားဆိုတာ နည်းပညာပိုင်းဆိုင်ရာတွေရော လုပ်ဆောင်တဲ့သူတွေရော ရှုပ်ထွေးမှုနှစ်ခုပေါ့၊ နံပါတ်တစ်က နည်းပညာပိုင်းဆိုင်ရာပေါ့၊ နံပါတ်နှစ်ကတော့ လုပ်ဆောင်တဲ့သူတွေပေါ့၊ နံပါတ်တစ်က နည်းပညာပိုင်းဆိုင်ရာဆိုတာက ဒီအွန်လိုင်းလောင်းကစားမှုကို ဒီနေရာမှာနှိမ်နင်းလိုက်ပေမယ့် နည်းပညာပိုင်းဆိုင်ရာ တချို့သောအချက်အလက်တွေကို ဒီအထဲမှာ ဖျ-က်ဆီးလိုက်တာဖြစ်တယ်၊ ဒီအပေါ်မှာရှိတဲ့ဟာကို ဖျ-က်ဆီးလိုက်နိုင်တာမဟုတ်ဘူး၊ ဥပမာပြောရရင် အချက်အလက်တွေပေါ့၊ cloud နည်းပညာနဲ့ အင်တာနက်ထဲမှာတင်ထားတဲ့အချက်အလက်တွေကို ခင်ဗျားတို့လည်း မသိနိုင်ဘူး၊ ကျွန်တော်တို့လည်း မသိနိုင်ဘူး၊ အချက်အလက်နှိမ်နင်းရခက်ခဲမှုပေါ့
နံပါတ်နှစ်က အွန်လိုင်းလောင်းကစားမှုကို ကျူးလွန်နေတဲ့သူပေါ့၊ အဲဒီအွန်လိုင်းလောင်းကစားမှုကို ကျူးလွန်နေတဲ့သူတွေက အများအားဖြင့် ဘယ်လူကြီးလူကောင်းမှကျူးလွန်တာမဟုတ်ဘူး၊ နိုင်ငံတကာမှာရှိနေတဲ့ ရာဇဝတ်မှုကျူးလွန်ပြီး ထွက်ပြေးနေတဲ့ ပြည်ပြေးတွေ၊ ရာဇဝတ်သားတွေက အများအားဖြင့် ကျူးလွန်တာဖြစ်တယ်။ ဒါပေမယ့် သူတို့ နောက်ကွယ်မှာတော့ အရေခြုံတွေ ရှိနိုင်ပါတယ်။ အဲဒါကြောင့်မို့ ကျွန်တော်တို့အနေနဲ့က တချို့ဟာတွေမှာ ခြေရာခံတာတွေ ကွင်းဆက်လိုက်တာတွေမှာ အားလုံးနဲ့ပူးပေါင်းဆောင်ရွက်ရတာဖြစ်ပါတယ်။ ခုနကပြောသလို နယ်စပ်တွေမှာ နှိမ်နင်းလိုက်တယ်၊ မြန်မာနိုင်ငံထဲကို ဝင်လာနိုင်တယ်။ ဒါလည်းမဖြစ်နိုင်ဘူးလို့မပြောနိုင်ဘူး၊ ကျွန်တော်တို့ မငြင်းပါဘူး။ တချို့နိုင်ငံတွေကိုလည်း ခင်ဗျားတို့ ဘယ်လောက်ထွက်သွားတယ်ဆိုတာ ပြည်ပကို ဘယ်လောက်ထွက်သွားတယ်ဆိုတာ ခင်ဗျားတို့လည်း သိပြီသားဖြစ်တယ်။ မြန်မာနိုင်ငံထဲကိုလည်း ဝင်လာနိုင်ပါတယ်။ အဲလိုမြန်မာနိုင်ငံထဲကို ဝင်လာတဲ့အခါမှာ ကျွန်တော်တို့အနေနဲ့ ပြတ်ပြတ်သားသားနှိမ်နင်းသွားမှာဖြစ်တယ်” ဟု ဗိုလ်ချုပ်ဇော်မင်းထွန်းက ပြောသည်။
မြန်မာနိုင်ငံအတွင်းသို့ တရားမဝင် ဝင်ရောက်လာသည့် အွန်လိုင်းလိမ်လည်မှုများ၊ လောင်းကစားမှုများနှင့်ပတ်သက်ပြီး အဓိကအားဖြင့် ပြည်သူလူထုကို အကူအညီတောင်းလိုကြောင်းလည်း ၎င်းက ဆိုသည်။
“မြန်မာနိုင်ငံထဲကို ဝင်လာတယ်ဆိုတဲ့နေရာမှာ အဓိကလုပ်ဆောင်ရမှာက အဓိကအကူအညီတောင်းချင်တာ ကျွန်တော်တို့ပြည်သူလူထုပဲ။ ကျွန်တော်တို့ပြည်သူလူထုအနေနဲ့ နံပါတ် (၁) မမြင်ချင်ယောင်မဆောင်ပါနဲ့၊ မကြားချင်ယောင်မဆောင်ပါနဲ့။ မမြင်ချင်ယောင် မကြားချင်ယောင် မဆောင်ဘူးဆိုရင် သက်ဆိုင်ရာကိုပြောမယ်၊ မမြင်ချင်ယောင် မကြားချင်ယောင် မဆောင်ဘူးဆိုရင် ပထမဦးဆုံးအနေနဲ့ ဒါကိုနှိမ်နင်းပြီးသားဖြစ်တယ်။
နံပါတ် (၂) အချက်က ပုန်းကွယ်ဖို့နေရာမပေးနဲ့။ ဒီလူတွေ ဘယ်နေရာမှာပုန်းမလဲ၊ ပြည်သူလူထုကြားထဲမှာပဲ ပုန်းမှာပဲ၊ မသင်္ကာစရာတွေ့လာမှာပဲ၊ ပုန်းကွယ်ဖို့နေရာမပေးနဲ့။ ဒါတွေကို ကျွန်တော်တို့ပြည်သူလူထုတင် တိုက်တွန်းတာမဟုတ်ဘူး၊ တရားဥပဒေစိုးမိုးရေးအဖွဲ့တွေ ပြည်သူလူထုအပါအဝင် ဝိုင်းဝန်းကူညီပူးပေါင်းဆောင်ရွက်သွားဖို့ ကျွန်တော့်အနေနဲ့ တိုက်တွန်းလိုပါတယ်” ဟု ဗိုလ်ချုပ်ဇော်မင်းထွန်းက ပြောကြားခဲ့သည်။