နူးဒေလီ၊ အောက်တိုဘာ ၁၅
မြန်မာနိုင်ငံတွင် အခက်အခဲများရှိနေသော်လည်း လာမည့် နှစ်နှစ်မှ သုံးနှစ်အတွင်း အိန္ဒိယ-မြန်မာ-ထိုင်း (အိုင်အမ်တီ) သုံးနိုင်ငံ အဝေးပြေးလမ်းမကြီးကိုပြီးစီးအောင် ဖေါက်လုပ် နိုင်မည်ဟု အိန္ဒိယက အပြုသဘောအမြင်ရှိကြောင်း အိန္ဒိယအရှေ့မြောက်ဒေသဖွံ့ဖြိုးတိုးတက်ရေး ဝန်ကြီးဌာန (ဒိုနာ)က ပြောကြားခဲ့သည်။
အရှေ့တောင်အာရှ သတင်းစာဆရာများ ကိုယ်စားလှယ်အဖွဲ့သည် အိန္ဒိယနိုင်ငံသို့ မကြာသေးမီက လာရောက်ခဲ့သည့် ခရီးစဉ်အတွင်း ဒိုနာ သည် အိန္ဒိယနိုင်ငံ အရှေ့မြောက်ပိုင်းရှိ ၎င်း၏ ဖွံ့ဖြိုးတိုးတက်ရေးစီမဲကိန်းများ၏ ပဏာမခြေလှမ်းများကိုထုတ်ပြခဲ့ပြီး ဒေသတွင်း ပို့ဆောင်ဆက်သွယ်ရေးကို တိုးမြှင့်ရန် အိန္ဒိယ၏ ကတိကဝတ်ကို အလေးပေးဖော်ပြခဲ့သည်။
ဒိုနာ အတွင်းရေးမှူး ချန်ချယ် ကူမားရ်က မြန်မာနိုင်ငံတွင် နိုင်ငံရေးမငြိမ်မသက်မှုများကြောင့် နှောင့်နှေးမှုများကြုံတွေ့နေရသည့် အိုင်အမ်တီ အဝေးပြေးလမ်းမကြီးနှင့် ပတ်သက်သည့် မေးခွန်းများကို ဤသို့ဖြေကြားခဲ့သည်။
“အမြန်လမ်းမကြီးကို နှစ်နှစ်ကနေ သုံးနှစ်အတွင်း အပြီးဆောက်လုပ်ဖို့ ကျွန်တော်တို့ မျှော်လင့်ထားပါတယ်” ဟု ၎င်းက ပြောသည်။
အိုင်အမ်တီအဝေးပြေးလမ်းမကြီးသည် မြန်မာနိုင်ငံကိုဖြ-တ်၍ ထိုင်းနိုင်ငံ တာ့ခ်ခရိုင် မဲဆောက်မြို့နှင့် အိန္ဒိယနိုင်ငံ မဏိပူရ် ပြည်နယ် မိုရေးမြို့ကို ဆက်သွယ်ထားသည့် ကီလိုမီတာ ၁,၃၆၀ ရှည်လျားသော လေးလမ်းသွားလမ်းမကြီးဖြစ်သည်။
စီမံကိန်းသည် အိန္ဒိယ၏ “အရှေ့မျှော်လင့်ဆောင်ရွက်ရေး” မူဝါဒ၏ အဓိကအစိတ်အပိုင်းတစ်ခုဖြစ်ပြီး ဇန်နဝါရီလ ၁ ရက်နေ့၊ ၂၀၁၀ ပြည့်နှစ်တွင် စတင်အသက်ဝင်ခဲ့သော အာဆီယံ-အိန္ဒိယ လွတ်လပ်သောကုန်သွယ်မှုသဘောတူညီချက်အရ ကုန်သွယ်မှုနှင့် ပို့ဆောင်ဆက်သွယ်မှုအားကောင်းစေရန် ရည်ရွယ်သည်။
မြန်မာ၏ တမူး-ကလေးမြို့-ကလေးဝဒေသနှင့် မိုရေးမြို့ကို ဆက်သွယ်သည့် ကီလိုမီတာ ၁၆၀ ရှည်လျားသည့် အိန္ဒိယ-မြန်မာ ချစ်ကြည်ရေးလမ်းကို ၂၀၀၁ ခုနှစ် ဖေဖော်ဝါရီလတွင် စတင်ဖွင့်လှစ်ခဲ့သည်။ လက်ရှိတွင် ၁၂၀.၇၄ ကီလိုမီတာ ရှည်လျားသော ကလေးဝ-ယာကြီးလမ်းပိုင်းနှင့် ၁၄၉ ဒသမ ၇၀ ကီလိုမီတည ရှည်လျားသော တမူး-ကြီးကုန်း-ကလေးဝလမ်းပိုင်း၌ တံတား ၆၉ စင်းကိုလည်း ဆောက်လုပ်လျက်ရှိသည်။
အရှေ့-အနောက် စီးပွားရေးစင်္ကြံ စီမံကိန်းအရ အိန္ဒိယ-ဗီယက်နမ် အဝေးပြေးလမ်းမကြီးမှတဆင့် ပိုမိုကျယ်ပြန့်သော အရှေ့တောင်အာရှဒေသကို ချိတ်ဆက်နိုင်ရန် အိန္ဒိယက အဆိုပြုခဲ့သည်။
“မလေးရှားနဲ့ စင်ကာပူတို့အပါအဝင် အရှေ့တောင်အာရှရဲ့ တောင်ပိုင်းကိုလက်လှမ်းမီ ရောက်ရှိချင်ပါတယ်။ ဒါပေမယ့် ပထမဆုံးအနေနဲ့ မြောက်ဘက်အပိုင်းကို ပြီးအောင်လုပ်ဖို့လိုပါတယ်” ဟု မစ္စတာ ကူမားက ပြောကြားခဲ့သည်။
အချိန်ဇယားနှင့် ပတ်သက်၍ မြန်မာနိုင်ငံဆိုင်ရာ အိန္ဒိယသံအမတ်ကြီးမှတစ်ဆင့် မြန်မာအစိုးရနှင့် ဆွေးနွေးမှုများ ဆက်လက်လုပ်ဆောင်နေကြောင်း မစ္စတာကူးမားက ပြောကြားခဲ့သည်။
“မြန်မာနိုင်ငံမှာ အခြေအနေတွေ တိုးတက်လာရင် အဝေးပြေးလမ်းက စောစောစီးစီးပြီးသွားနိုင်တယ်” ဟု ၎င်းက ဆက်လက်ပြောကြားခဲ့သည်။ သို့သော်လည်း နိုင်ငံရေးမတည်ငြိမ်မှုများကြောင့်နှောင့်နှေးမှုများရှိနေဆဲဖြစ်ကြောင်း ၎င်းက အသိအမှတ်ပြုခဲ့သည်။
“ဒါက နိုင်ငံခြားအစိုးရတွေ ပါဝင်တဲ့ နိုင်ငံတကာ ပရောဂျက်တစ်ခုပါ၊ ဒါကြောင့် သူတို့ရဲ့ စိုးရိမ်မှုတွေကို ထည့်သွင်းစဉ်းစားဖို့ အရေးကြီးပါတယ်” ဟု ၎င်းက ဆိုသည်။
“ကျွန်ုပ်တို့သည် အပြုသဘော အမြင်ရှိကြသော်လည်း၊ ကြိုမမြင်နိုင်သော အခြေအနေများသည် အချိန်ဇယားကို အကျိုးသက်ရောက်စေနိုင်သည်ကို ကျွန်ုပ်တို့ နားလည်ပါသည်” ဟုသူက ဆိုသည်။
Ref: ဘန်ကောက်ပို့စ်