မြန်မာသင်္ဘောသား ဆယ်ဦးကို တရုတ် ကယ်တင်ပေးခဲ့

တောင်တရုတ်ပင်လယ်ရှိ တရုတ်နိုင်ငံ၏ Xisha Qundao ကမ်းလွန်တွင် စက်ချို့ယွင်းကာ ဘူလွာမုန်တိုင်းအန္တရာယ်နှင့် ရင်ဆိုင်နေခဲ့ရသော မြန်မာ သင်္ဘောသား ဆယ်ဦးကို တရုတ်နိုင်ငံက အောင်မြင်စွာကယ်တင်ပေးခဲ့သည်ဟု Sansha ရေကြောင်း ရှာဖွေရေးနှင့် ကယ်ဆယ်ရေးစင်တာက ကြားသပတေးနေ့တွင် ပြောကြားခဲ့သည်။

ဟိုင်နန်ပြည်နယ် Sansha မြို့ Yongxing ကျွန်းအရှေ့တောင်ဘက် ၂၀၃ ကီလိုမီတာအကွာတွင် မြန်မာသင်္ဘောသား ဆယ်ဦး လိုက်ပါလာသော သင်္ဘောသည် စတီယာရင် ဂီယာချို့ယွင်းမှုဖြစ်ကာ ထိန်းချုပ်မှုမဲ့စွာ မျောပါနေခဲ့ကြောင်း စက်တင်ဘာ ၂၆ ရက်တွင် စင်တာက အကြောင်းကြားချက်ရရှိခဲ့သည်။

ထို့အတွက် တိုင်ဖွန်း ဘူလွာအန္တရာယ်နှင့် ထိပ်တို-က်တိုးတော့မည့် အခြေအနေရောက်နေသည့် သင်္ဘောသားများအတွက် စင်တာက အရေးပေါ်တုန့်ပြန်မှုကို ချက်ချင်းလုပ်ဆောင်ကာ ကယ်ဆယ်ရေးသင်္ဘောတစ်စီး စေလွှတ်ခဲ့သည်။

စက်တင်ဘာလ ၂၇ ရက် နေ့နံနက်အစောပိုင်းတွင် ကယ်ဆယ်ရေးသင်္ဘောသည် ဒုက္ခရောက်နေသော သင်္ဘောအနီးသို့ ရောက်ရှိခဲ့သော်လည်း တိုင်ဖွန်းချဉ်းကပ်လာမှုကြောင့် သင်္ဘောကို ဆွဲခေါ်ရန် မဖြစ်နိုင်ခဲ့ပေ။ ထို့ကြောင့် စင်တာက သင်္ဘောသားမျာကို ဦးစွာကယ်ထုတ်ရန်ဆုံးဖြတ်ကာ ၎င်းတို့ ဆယ်ဦးစလုံးကို ကယ်ဆယ်ရေးသင်္ဘောထံ ပို့ဆောင်ပေးခဲ့သည်။

ထို့နောက် မုန်တိုင်းပြီးသွားချိန်တွင် မျောပါနေသော သင်္ဘောကို ဆက်လက်ရှာဖွေခဲ့ရာ၌ စက်တင်ဘာလ ၂၈ ရက် နေ့မွန်းလွဲပိုင်းတွင် သင်္ဘောတည်နေရာကို ရှာတွေ့ခဲ့သည်။

ထို့နောက် စက်တင်ဘာ ၂၉ ရက်တွင် မြန်မာသင်္ဘောသားများကို ၎င်းတို့ သင်္ဘောရှိရာသို့ ရဟတ်ယာဉ်ဖြင့် ပို့ဆောင်ပေးခဲ့ပြီးနောက် စက်ပျက်သင်္ဘောကို တရုတ်ကယ်ဆယ်ရေးသင်္ဘောက ဆွဲခေါ်လာခဲ့သည်။ အဆိုပါ သင်္ဘောကို အောက်တိုဘာလ ၁ ရက်နေ့တွင် ပိုင်ရှင်၏ တွန်းသင်္ဘောရှိရာသို့ လွှဲပြောင်းပေးအပ်ခဲ့ပြီး သင်္ဘောသည် ကြာသပတေးနေ့ မွန်းလွဲ ၂ နာရီခွဲခန့်တွင် ဦးတည်ရာဖြစ်သော ဗီယက်နမ်နိုင်ငံ ဒါနန်းဆိပ်ကမ်းသို့ ရောက်ရှိခဲ့ကြောင်း သိရသည်။

အဆိုပါ ကယ်ဆယ်ရေးလုပ်ငန်းသည် သင်္ဘောသားများ၏ အသက်အန္တရာယ်ကို လုံခြုံစေခဲ့ပြီး ပင်လယ်ရေကြောင်း ညစ်ညမ်းမှုဖြစ်ပေါ်လာနိုင်ခြေကို ကာကွယ်နိုင်ခဲ့သည်ဟု Sansha ရေကြောင်းဘေးကင်းလုံခြုံရေးစီမံခန့်ခွဲမှုအဖွဲ့က ပြောကြားခဲ့သည်။

Ref: ရှင်းဟွာ