ရုရှားစစ်တပ်ဂျက်လေယာဉ်သုံးစင်းသည် စက်တင်ဘာလ ၁၉ ရက်နေ့က နေတိုးအဖွဲ့ဝင် အက်စ်တိုးနီးယားနိုင်ငံ ဝေဟင်ပိုင်နက်အတွင်း ၁၂ မိနစ်ကြာ ဝင်ရောက်ပျံသန်းကာ မကြုံစဖူး အတင့်ရဲသော ကျူးကျော်မှုလုပ်ခဲ့သည်ဟု အက်စ်တိုးနီးယားအစိုးရက ပြောကြားလိုက်သည်။ ယခုဖြစ်ရပ်သည် မဟာမိတ်အဖွဲ့ကို တုန်လှုပ်စေသော ရုရှား၏ စစ်ရေးလှုပ်ရှားမှုများတွင် နောက်ဆုံးဖြစ်ရပ်ဖြစ်သည်။
ရုရှားကာကွယ်ရေးဝန်ကြီးဌာနကမူ ၎င်းတို့၏ ဂျက်လေယာဉ်များ အက်စ်တိုးနီးယားပိုင်နက်ကို ချိုးဖေ-ာက်ဝင်ရောက်ခဲ့သည်ဆိုမှုအား ငြင်းဆိုခဲ့ပြီး လေယာဉ်များသည် နိုင်ငံတကာရေပြင်တွင်သာ ပျံသန်းခဲ့ခြင်းဟု ပြောဆိုခဲ့သည်။
ယူကရိန်းစစ်ပွဲကြောင့် တင်းမာမှုများမြင့်တက်နေခဲ့ပြီးဖြစ်သည့်အပြင် စက်တင်ဘာလ ၉ ရက် နေ့နှင့် ၁၀ ရက်နေ့ ညပိုင်းက ပိုလန်နိုင်ငံလေပိုင်နက်အတွင်း ရုရှားဒရုန်းအစင်း ၂၀ ကျော်ဝင်ရောက်ခဲ့သည့်ဖြစ်ရပ်အပြီး သီတင်းတစ်ပတ်အကြာတွင် ယခုကျူးကျော်မှု ထပ်မံပေါ်ပေါက်ခဲ့ခြင်းဖြစ်သည်။ ဒရုန်းများကျူးကျော်မှုတွင် နေတိုးဂျက်လေယာဉ်များက ဒရုန်းအချို့ကိုပ-စ်ချခဲ့ရပြီး ရုရှားသည် မဟာမိတ်အဖွဲ့၏ အသင့်ဖြစ်မှုနှင့် ဖြေရှင်းနိုင်မှုကို စမ်းသပ်နေသည်ဟု အနောက်နိုင်ငံ အရာရှိများက သုံးသပ်ခဲ့သည်။
ထို့အပြင် ယခုဖြစ်ရပ်သည် ရုရှားနျူကလီးယားလက်နက်များကို အစမ်းပ-စ်လွှတ်လေ့ကျင့်မှုလည်းပါဝင်ခဲ့သည့် ရုရှားနှင့် ဘီလာရုစ်တို့၏ ဇာပက်ဒ်-၂၀၂၅ ပူးတွဲစစ်ရေးလေ့ကျင့်မှုအပြီး သုံးရက်အကြာတွင်ပေါ်ပေါက်ခဲ့ခြင်းလည်းဖြစ်သည်။
MiG-31 တိုက်လေယာဉ် သုံးစင်းသည် ခွင့်ပြုချက်မရှိဘဲ အက်စ်တိုးနီးယားလေပိုင်နက်အတွင်းဝင်ရောက်ခဲ့ကာ ၎င်းတို့အား ပြန်ဆုတ်ခွာခိုင်းခြင်းမပြုမီ စုစုပေါင်း ၁၂ မိနစ်ခန့် လေပိုင်နက်အတွင်းရှိနေခဲ့ကြောင်းနှင့် ယင်းသည် မြန်နှုန်းမြင့်လေယာဉ်တစ်စင်း နိုင်ငံအနှံ့အပြားသို့ ပျံသန်းသွားရောက်နိုင်သည့် အချိန်ကာလတစ်ခုဖြစ်ကြောင်း အက်စ်တိုးနီးယားအစိုးရက ပြောကြားခဲ့သည်။
ရုရှားသည် ယခုနှစ်အတွင်း အက်စ်တိုးနီးယား လေပိုင်နက်အတွင်း ချိုးဖေ-ာက်ဝင်ရောက်ခဲ့သည်မှာ လေးကြိမ်တိုင်ရှိပြီဖြစ်ပြီး ယင်းကို ၎င်းကိုယ်တိုင် လက်ခံနိုင်ဖွယ်ရာမဟုတ်သော်ငြားလည်း ယနေ့ချိုးဖေ-ာက်မှုတွင် တိုက်လေယာဉ်သုံးစင်း မိမိတို့လေပိုင်နက်အတွင်း ဝင်ရောက်ခဲ့သည့်အနေအထားသည် ထင်မှတ်မထားသော ပြောင်ကျကျလုပ်ရပ်ဖြစ်နေကြောင်း အက်စ်တိုးနီးယားနိုင်ငံခြားရေးဝန်ကြီး Margus Tsahkna က ပြောကြားခဲ့သည်။
ရုရှားဂျက်လေယာဉ်များသည် ရုရှားပြည်မကြီးနှင့် ၎င်း၏ ကာလီနင်ဂရတ်အကြားရှိ ဘောလ်တစ်ပင်လယ်ပြင်ကို ပုံမှန်ဖြတ်ကျော်ပျံသန်းလေ့ရှိသည်။
Ref: သည်စထရိတ်တိုင်းမ်စ်