မကြာမီရောက်ရှိတော့မည့် ပွင့်လင်းရာသီအတွက် ရန်ကုန်မြစ်တွင်းပြေးဆွဲသော အပျော်စီးသင်္ဘောများမှာ ပြင်ဆင်မှုများ လုပ်ဆောင်နေပြီး အချို့သော သင်္ဘောလိုင်းများမှာ တစ်ပတ်လျှင်(၃)ရက်နှုန်းဖြင့် တိုးချဲ့ပြေးဆွဲရန် စီစဉ်နေကြောင်း စုံစမ်းသိရှိရသည်။
ယခင်က စနေ၊ တနင်္ဂနွေ ပိတ်ရက်(၂)ရက်သာ ပြေးဆွဲပေးခဲ့ပြီး စက်တင်ဘာလ အလယ်လောက်မှစ၍ သောကြာနေ့ကိုပါ တစ်ရက်ထပ်တိုးပြီးတစ်ပတ်သုံးရက်ပြေးဆွဲရန် စီစဉ်ထားကြောင်း သိရသည်။
အဆိုပါ အပျော်စီးသင်္ဘောများသည် အစိုးရရုံးပိတ်ရက်ဖြစ်သော စနေ၊ တနင်္ဂနွေရက်များနှင့် အခါကြီး ရက်ကြီးရက်များတွင် ညနေပိုင်းအချိန်အတွင်း ပြေးဆွဲခြင်းဖြစ်ပြီး မိုးတွင်းကာလ ယာယီရပ်နားပြီးနောက် ပြန်လည်ပြေးဆွဲရာတွင် တစ်ပတ်နှစ်ရက်နှုန်း ပုံမှန်ပြေးဆွဲရာမှ တစ်ရက်ထပ်တိုး၍ တစ်ပတ်(၃)ရက်နှုန်းအဖြစ် ပြေးဆွဲပေးရန် စီစဉ်ထားခြင်းဖြစ်သည်။
အပျော်စီးသင်္ဘောခရီးစဉ်အဖြစ် ဗိုလ်တထောင်ဆိပ်ကမ်းမှ ညနေ (၅) နာရီတွင် ထွက်ခွာပြီး ရန်ကုန်မြစ်အတွင်း ပင်လယ်၀အထိ ခုတ်မောင်းပေးကာ ည (၇) နာရီတွင် ဗိုလ်တထောင်ဆိပ်ကမ်းသို့ ပြန်လည်ဆိုက်ကပ်၍ ခရီးစဉ် ပြီးဆုံးကြောင်း သိရသည်။
တစ်ဦးလျှင် လူကြီး (၃၅,၀၀၀) ကျပ်နှင့် အသက် (၄)နှစ်မှ (၁၁) နှစ်အရွယ် ကလေးခအဖြစ် (၂၅,၀၀၀) ကျပ်၊ အသက် (၇၀) နှင့်အထက် (၂၅,၀၀၀) ကျပ် စသည်ဖြင့် စီးနင်းခသတ်မှတ်ထားပြီး နိုင်ငံခြားသား ခရီးသွားများအတွက် (၁၀) ဒေါ် လာမှ ၁၅ ဒေါ်လာကြား သတ်မှတ်ထားကြောင်း၊ ခရီးစဉ်အတွင်း ရေ၊ ဖျော်ရည်များနှင့် ဘူဖေးအစားအစာများကို အခမဲ့ကျွေးမွေးဧည့်ခံကြောင်း သိရသည်။