နစက အစိုးရ နိုင်ငံတော်တာဝန်ထမ်းဆောင်စဥ် ရှေ့လုပ်ငန်းစဥ်(၅)ရပ်အနက် တတိယအချက်ဖြစ်သောပြည်တွင်းငြိမ်းချမ်းရေးအတွက်ဆောင်ရွက်ခဲ့မှုများနှင့်ပတ်သက်၍ ယာယီသမ္မတ(တာဝန်)၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်မှ ယနေ့ ဇူလိုင် ၃၁ ရက်နံနက်ပိုင်းကကျင်းပသည့် အမျိုးသားကာကွယ်ရေးနှင့် လုံခြုံရေးကောင်စီအစည်းအဝေး(၃/၂၀၂၅)တွင် ပြောကြားခဲ့ခြင်းဖြစ်သည်။
မိမိတို့အစိုးရသည် ငြိမ်းချမ်းရေးကိုလက်တွေ့ကျကျအကောင်အထည်ဖော်နိုင်ရန် တိုင်းရင်းသားလက်နက်ကိုင်အဖွဲ့အစည်းများ၏ ခေါင်းဆောင်များနှင့် ဆွေးနွေးနိုင်ရေးအတွက် ၂၀၂၂ ခုနှစ်၊ ဧပြီ ၂၂ ရက်တွင် ကမ်းလှမ်းဖိတ်ခေါ်ခဲ့ပြီး NCA လက်မှတ်ရေး ထိုးထားပြီးဖြစ်သည့် တိုင်းရင်းသားလက်နက်ကိုင်အဖွဲ့များထဲမှ(၇)ဖွဲ့၊ လက်မှတ်မရေးထိုးထားရသေးသည့် တိုင်းရင်းသားလက်နက်ကိုင်အဖွဲ့များထဲမှ(၃) ဖွဲ့တို့နှင့် မိမိကိုယ်တိုင်တွေ့ဆုံဆွေးနွေးနိုင်ခဲ့သည်ဟု ပြောသည်။
ဖွဲ့စည်းထားသည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီအနေဖြင့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့များနှင့် (၉၁)ကြိမ်၊ NCA လက်မှတ်ရေးထိုးထားခြင်းမရှိသေးသည့်အဖွဲ့များနှင့် (၂၅)ကြိမ်၊ နိုင်ငံရေးပါတီများနှင့် (၂၂) ကြိမ်၊ ငြိမ်းချမ်းရေးအကျိုးဆောင်အဖွဲ့များနှင့် (၁၃)ကြိမ်တွေ့ဆုံဆွေးနွေးနိုင်ခဲ့ပြီး ယခု ၂၀၂၅ ခုနှစ်အတွင်း ငြိမ်းချမ်းရေးစကားဝိုင်း(၁)ကြိမ်၊ ငြိမ်းချမ်းရေးဆွေးနွေးပွဲ(၁)ကြိမ်ကျင်းပပေးနိုင်ခဲ့သည်ဟု ပြောသည်။
” အဲဒီလို တွေ့ဆုံဆွေးနွေးမှုတွေကတစ်ဆင့် ဖွဲ့စည်း ပုံအခြေခံဥပဒေ(၂၀၀၈ ခုနှစ်)ကို ပြင်ဆင်ဖြည့်စွက်ဖို့ သဘောတူညီချက်(၄၃)ချက်ကိုလက်မှတ်ရေးထိုးအတည်ပြုနိုင်ခဲ့ပါတယ်။ အဲဒီ သဘောတူညီချက်တွေနဲ့ ယခင်အစိုးရတွေလက်ထက် ငြိမ်းချမ်းရေးညီလာခံရလဒ်တွေက စုစည်းထားတဲ့ ပြည်ထောင်စုသဘောတူညီချက်တွေကို မကြာခင်ကျင်းပမယ့် ရွေးကောက်ပွဲကပေါ်ပေါက်လာမယ့် ပြည်ထောင်စုလွှတ်တော်ကိုစုစည်းတင်ပြပြီး ဖွဲ့စည်းပုံအခြေခံဥပ ဒေပြင်ဆင်ဖြည့်စွက်နိုင်ရေးလုပ်ငန်းစဉ်တွေကို ပြန်လည်ဆောင်ရွက်သွားမှာပါ”ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
ပြည်ထောင်စုကြီးငြိမ်းချမ်းသာယာရေး၊ လူမှုစီးပွား ဘဝများဖွံ့ဖြိုးတိုးတက်ရေးနှင့် ထာဝရငြိမ်းချမ်းရေးရရှိရေးတို့သည် တိုင်းရင်းသား ပြည်သူအား လုံး၏ လိုအင်ဆန္ဒဖြစ်၍ ငြိမ်းချမ်းရေးလုပ်ငန်းစဉ်တွင်ပါဝင်ဆောင်ရွက်နေသည့် သက်ဆိုင်သူအား လုံး ဒီမိုကရေစီကျင့်စဉ်နှင့်အညီ ဆွေးနွေးညှိနှိုင်းအဖြေရှာပြီး ထာဝရငြိမ်းချမ်းရေးကိုအမြန်ဆုံးအကောင်အထည်ဖော်ဆောင်ရွက်ရန်လိုသည်ဟု ဗိုလ် ချုပ်မှူးကြီးမင်းအောင်လှိုင်က ပြောကြားခဲ့သည်။