ဂျပန်က တစ်ပတ်ရစ် ဖျက်သင်္ဘောများကို ဖိလစ်ပိုင်သို့ တင်ပို့မည်

             
တရုတ်နိုင်ငံ၏ ပင်လယ်ရေကြောင်း ချဲ့ထွင်မှုကို ဟန့်တားကာကွယ်ရာတွင် ဖိလစ်ပိုင်ကို ခိုင်မာအားကောင်းစေရန်အတွက် တစ်ပတ်ရစ် ရေတပ်ဖျက်သင်္ဘောများကို ဂျပန်က တင်ပို့သွားမည်ဖြစ်ကြောင်း ယိုမီယူရီသတင်းစာက တနင်္ဂနွေနေ့တွင် သတင်းဖော်ပြခဲ့သည်။
          
တင်ပို့မည့်အစီအစဉ်တွင် ဂျပန်ရေကြောင်း ကိုယ်ပိုင်ကာကွယ်ရေးတပ်ဖွဲ့တွင် ဆယ်စုနှစ်သုံးခုကျော် တာဝန်ပေးခဲ့သည် Abukuma အတန်းအစား ဖျက်သင်္ဘော ခြောက်စင်းပါဝင်မည်ဖြစ်ကြောင်း အမည်မဖော်သည့် အစိုးရသတင်းရင်းမြစ်များစွာကို ကိုးကား၍ ဂျပန်နေ့စဉ်သတင်းစာ ယိုမီယူရီက ဖော်ပြခဲ့သည်။
          
ဂျပန်ကာကွယ်ရေးဝန်ကြီး ဗိုလ်ချုပ်ကြီး နာကာတာနီနှင့် ဖိလစ်ပိုင်ကာကွယ်ရေးဝန်ကြီး ဂီလ်ဘာတို တီအိုဒိုရိုတို့ ပြီးခဲ့သည့်လက စင်ကာပူတွင် တွေ့ဆုံကြစဉ် ဖျက်သင်္ဘောများ တင်ပို့ရေးကို သဘောတူခဲ့ကြခြင်းဖြစ်သည်ဟု ယိုမီယူရီက ဆိုခဲ့ကာ ဖိလစ်ပိုင်စစ်တပ်သည် အပြီးသတ်ကြိုတင်ပြင်ဆင်မှု တစ်စိတ်တစ်ပိုင်းအဖြစ် ယခုနွေရာသီတွင် ဖျက်သင်္ဘောများကို စစ်ဆေးရန် စီစဉ်ထားကြောင်းလည်း ဖော်ပြခဲ့သည်။
          
ယင်းသတင်းနှင့်ပတ်သက်၍ ဂျပန်ကာကွယ်ရေးဝန်ကြီးဌာန ပြောရေးဆိုခွင့်ရှိသူက မှတ်ချက်ပေးရန် ငြင်းဆိုခဲ့သည်။ ဖိလစ်ပိုင်စစ်တပ် ပြောရေးဆိုခွင့်ရှိသူနှင့် တရုတ်နိုင်ငံခြားရေးဝန်ကြီးဌာနတို့ကလည်း ရိုက်တာသတင်းဌာန၏ မှတ်ချက်ပေးရန် တောင်းဆိုမှုကို လတ်တလောတွင် တုန့်ပြန်ဖြေကြားခဲ့ခြင်း မရှိသေးပေ။
            
ဖိလစ်ပိုင်နှင့် သက်ဆိုင်သော တောင်တရုတ်ပင်လယ်၊ ဂျပန်နှင့် သက်ဆိုင်သော အရှေ့တရုတ်ပင်လယ် ရေပြင်များတွင် ပေကျင်း၏ အတင့်ရဲသော လုပ်ရပ်များ တိုးမြင့်လာခြင်းဆိုင်ရာ စိန်ခေါ်မှုနှင့် ရင်ဆိုင်နေရသည်ဟု တိုကျိုနှင့် မနီလာတို့က ပြောဆိုသည်။
           
နှစ်နိုင်ငံစစ်ရေးပူးပေါင်းဆောင်ရွက်မှုတွင် ပူးတွဲစစ်ရေးလေ့ကျင့်မှုများ၊ ဂျပန်ရေဒါ ပံ့ပိုးရေးအစီအစဉ်နှင့် အဆင့်အမြင့်အရာရှိအဆင့် မဟာဗျူဟာမြောက် ဆွေးနွေးပွဲများ ပါဝင်သည်။ ပြီးခဲ့သည့်နှစ်တွင် တပ်ဖွဲ့များ အပြန်အလှန်ဝင်ရောက်ခွင့်ပြုရေး သဘောတူညီချက်ကို နှစ်နိုင်ငံလက်မှတ်ရေးထိုးခဲ့ပြီး အာရှတွင် ပထမဆုံးအကြိမ်အဖြစ် ဂျပန်သည် အခြားတိုင်းပြည်တစ်ခု၏ မြေပေါ်တွင် ၎င်း၏တပ်များကို ချထားခွင့်ပြုခဲ့သည်။
           
ဂျပန်ရေတပ်ဝက်ဘ်ဆိုက်တွင် ဖော်ပြထားချက်အရ Abukuma အတန်းအစားဖျက်သင်္ဘောသည် တန် ၂၀၀၀ အလေးချိန်ရှိ အတန်ငယ်သေးငယ်သော ဖျက်သင်္ဘောအမျိုးအစားဖြစ်ပြီး စံနှုန်းမြင့် ရွှေ့ပြောင်းခုတ်မောငးနိုင်ကာ သင်္ဘောသား ၁၂၀ ခန့်ဖြင့် စီမံခန့်ခွဲနိုင်သည်။ ယင်းသင်္ဘောများတွင် ရေငုပ်သင်္ဘောဖျက်နှင့် သင်္ဘောဖျက် ဒုံးကျည်များ၊ တော်ပီဒိုပြွန်များနှင့် လက်နက်များတပ်ဆင်ထားကြောင်း သိရသည်။

Ref: ယူအက်စ်နူးစ်