ဆိုရှယ်မီဒီယာကိုသုံးကာ နိုင်ငံတွင်းရှိ ဘင်္ဂလားဒေ့ရှ်လုပ်သားများအကြား အယူဝါဒများ ဖြန့်ဝေခြင်း၊ အိုင်အက်စ်အကြမ်းဖက်အုပ်စုအတွက် ရန်ပုံငွေစုဆောင်းခြင်းတို့ပြုလုပ်သည့် ကွန်ရက်တစ်ခုကို မလေးရှားအာဏာပိုင်များက ဖြိုခွင်းခဲ့သည်ဟု ထိပ်တန်းရဲအရာရှိတစ်ဦးက ဇူလိုင် ၄ ရက်တွင် ပြောကြားခဲ့သည်။
၂၀၁၆ က ကွာလာလမ်ပူတွင် တို-က်ခို-က်မှုဖြစ်ပွားခဲ့ပြီးနောက် မလေးရှားနိုင်ငံတွင် အိုင်အက်စ်နှင့် ဆက်စပ်သည်ဟု သံသယရှိသော မွတ်ဆလင်စစ်သွေးကြွလှုပ်ရှားမှုများကို ရာနှင့်ချီ၍ ထိန်းသိမ်းခဲ့သော်လည်းဒေသတွင်း နှိမ်နင်းမှုပြုလုပ်ခဲ့အပြီး မကြာခင်နှစ်များတွင်မူ ဖမ်းဆီးမှုများသည် လျော့ကျသွားခဲ့သည်။
မလေးရှားနိုင်ငံသည် စက်ရုံ၊ စိုက်ပျိုးရေးနှင့် ဆောက်လုပ်ရေးလုပ်ငန်းများအတွက် ပြည်ပအလုပ်သမား အများအပြားကို အမှီပြုနေရပြီး ဘင်္ဂလားဒေ့ရှ်နိုင်ငံသားများသည် ထောင်နှင့်ချီ၍ နှစ်စဉ် မလေးရှားသို့ သွားရောက်နေကြသည်။
ဧပြီလက စတင်ခဲ့သော စီမံချက်များစွာတွင် အာဏာပိုင်များသည် ဘင်္ဂလားဒေ့ရှ်နိုင်ငံသား ၃၆ ဦးကို ထိန်းသိမ်းခဲ့ကြောင်းနှင့် ၎င်းတို့သည် စက်ရုံများ သို့မဟုတ် ဆောက်လုပ်ရေးနှင့် ဝန်ဆောင်မှုကဲ့သို့ကဏ္ဍများအတွင် အလုပ်လုပ်ရန် မလေးရှားသို့ ရောက်ရှိနေသူများဖြစ်ကြောင်း ရုပ်သံသတင်းစာရှင်းလင်းပွဲတွင် ရဲချုပ်မွတ်ခါလစ် အီစမိုင် က ပြောကြားခဲ့သည်။
ကွန်ရက်သည် အခြားဘင်္ဂလားဒေ့ရှ်အလုပ်သမားများကို ပစ်မှတ်ထားကာ အဖွဲ့ဝင်သစ်စုဆောင်းခြင်းနှင့် ဆိုရှယ်မီဒီယာနှင့် အွန်လိုင်းစာပို့ပလက်ဖောင်းများကိုသုံး၍ အစွန်းရောက် အတွေးအခေါ်အယူဝါဒများ ဖြန့်ဝေသွတ်သွင်းခြင်းတို့ လုပ်ဆောင်ခဲ့သည်ဟု ရဲထောက်လှမ်းရေးကို ကိုးကားကာ ၎င်းက ပြောကြားခဲ့သည်။
ထို့အပြင် ကွန်ရက်သည် နိုင်ငံတကာ ငွေကြေးလွှဲပြောင်းဝန်ဆောင်မှုများ၊ e-wallet များသုံး၍ ဆီးရီးယားနှင့် ဘင်္ဂလားဒေ့ရှ်နိုင်ငံများရှိ အိုင်အက်စ်အုပ်စုများထံ ပေးပို့ရန် ရန်ပုံငွေများကောက်ခံကြောင်းလည်း ၎င်းက ပြောကြားခဲ့ပြီး ရန်ပုံငွေပမာဏ မည်မျှအထိရှိသည်ကိုမှု အသေးစိတ်ပြောကြားရန် ငြင်းဆိုခဲ့သည်။
ထိန်းသိမ်းခဲ့သူများအနက် ငါးဦးကို အကြမ်းဖက်အုပ်စုတွင် ပါဝင်မှုဖြင့် စွဲချက်တင်ထားကာ ၁၅ ဦးကို ပြည်နှင်ဒဏ်ပေးခဲ့ကြောင်း သိရသည်။
ကျန်ရှိသော ၁၆ ဦးကိုမူ နောက်ထပ် စုံစမ်းစစ်ဆေးမှုများလုပ်ဆောင်ရန် ရဲတပ်ဖွဲ့က ဖမ်းဆီးထားဆဲဖြစ်ကြာင်းနှင့် နောက်ထပ် ဖမ်းဆီးမှုများလည်း ရှိလာနိုင်ကြောင်း ဒါတွတ် မွတ်ခါလစ်က ပြောကြားခဲ့သည်။
Ref: သည်စထရိတ်တိုင်းမ်စ်