ထိုင်းဝန်ကြီးချုပ် နုတ်ထွက်မည်မဟုတ်ဟု ပါတီပြောကြား

အကျပ်အတည်းကြုံနေသော ဝန်ကြီးချုပ် ပေတုံတန် ရှင်နာဝပ်ထရာသည် ရာထူးမှ နုတ်ထွက်မည်မဟုတ်သကဲ့သို့ ပါလီမန်ကို ဖျ-က်သိမ်းမည်လည်း မဟုတ်ကြောင်း သူ၏ဖြူထိုင်းပါတီမှ အကြီးတန်းအရာရှိတစ်ဦးက စနေန့တွင် ပြောကြားခဲ့သည်။

ဘတ်ဂျက်ဥပဒေကြမ်းကို အတည်ပြုပြီးချိန်တွင် ရာထူးမှနုတ်ထွက်ရန် သို့မဟုတ် ပါလီမန်ဖျ-က်သိမ်းရန် ညွှန့်ပေါင်းပါတီများ၏ အဆိုပြုချက်ကို ပေတုံတန်က လက်ခံလိမ့်မည်ဆိုသော ထင်ကြေးပေးမှုများသည် လုံးဝမမှန်ကြောင်း ပါတီ၏ အထွေထွေအတွင်းရေးမှူး Sorawong Thienthong က ဖေ့စ်ဘုတ်တွင် ပို့စ်တင်ပြောကြားခဲ့သည်။

အိမ်နီးချင်း ကမ္ဘောဒီးယားနိုင်ငံနှင့် နယ်စပ်အငြင်းပွားကိစ္စအပေါ် ကိုင်တွယ်ပုံလွယ်မှားခဲ့မှုနှင့် ပတ်သက်၍ ဝန်ကြီးချုပ် နုတ်ထွက်ပေးရန် တောင်းဆိုမှုများ ကြီးထွားနေခြင်းကို ခရီးသွားလုပ်ငန်းနှင့် အားကစားဝန်ကြီးလည်းဖြစ်သူ မစ္စတာ Sorawong က တုန့်ပြန်ခဲ့ခြင်းဖြစ်သည်။

ကမ္ဘောဒီးယားဝန်ကြီးချုပ်ဟောင်း ဟွန်ဆန်နှင့် သူဖုန်းပြောဆိုရာတွင် ထိုင်းစစ်တပ်ကို အပုပ်ချခဲ့ပုံရသည့် ဖုန်းအသံဖိုင် ပေါက်ကြားခဲ့ပြီးနောက် မစ္စပေတုံတန် ရာထူးနုတ်ထွက်ရေးတောင်းဆိုသည့် ဆန္ဒပြမှုများသည် လူများကို ပိုမိုဆွဲဆောင်လာနိုင်ခဲ့သည်။

အသံဖိုင်ပေါက်ကြားခြင်း ကိစ္စသည် ညွှန့်ပေါင်းအဖွဲ့မှ ထွက်ရခြင်း၏ အကြောင်းရင်းများထဲမှ တစ်ခုဖြစ်ကြောင်း Bhumjaithai ပါတီက ပြောကြားခဲ့သည်။ လက်ရှိတွင် ညွှန့်ပေါင်းအဖွဲ့သည် အောက်လွှတ်တော်တွင် အမတ်နေရာအများစုကို ကျဉ်းမြောင်းသောအသာရမှုဖြင့် ထိန်းသိမ်းထားသည်။

“တိုင်းပြည် လက်ရှိရင်ဆိုင်နေရတဲ့ အကျပ်အတည်းတွေကို ဖြေရှင်းရာမှာ သူ့ရဲ့တာဝန်ကို အပြည့်အ၀ ဆက်လက်ထမ်းဆောင်သွားမယ်လို့ ဝန်ကြီးချုပ်က ကျွန်တော်တို့ကို အခိုင်အမာ အာမခံထားပါတယ်” ဟု မစ္စတာ Sorawong က ပြောဆိုခဲ့သည်။

ဖုန်းအသံဖိုင် ပေါက်ကြားခဲ့မှုအတွက် မစ္စပေတုံတန်က တောင်းပန်ခဲ့ပြီး လူထုဒေါသကို ဖြေလျှော့ရန် ကြိုးစားခဲ့သည်။ သို့ရာတွင် သူရာထူးဖယ်ရှားရေးအတွက် ဖိအားပေးရန် လမ်းပေါ်ထွက် ဆန္ဒပြမှုများကို အရှိန်မြှင့်လုပ်ဆောင်သွားမည်ဟု သူ၏ ပြိုင်ဘက်များက ခြိမ်းခြေ-ာက်ခဲ့သည်။ သောကြာနေ့တွင် သူသည် ကမ္ဘောဒီးယားနှင့် နယ်စပ်တင်းမာမှုတွင် ပါဝင်ပတ်သက်နေသည့် စစ်သားများကို ထောက်ခံကြောင်း ပြသသည့်အနေဖြင့် နယ်စပ်စခန်းတစ်ခုရှိ တပ်ဖွဲ့ဝင်များထံ သွားရောက်ခဲ့သည်။

Ref: ဘန်ကောက်ပို့စ်