ဘင်္ဂလားပင်လယ်အော် အနောက်မြောက်ပိုင်းတွင် ဖြစ်ပေါ်နေသော လေဖိအားနည်းရပ်ဝန်းဆက်လက် တည်ရှိနေသဖြင့် တစ်ပြည်လုံးတွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး နေရာကွက်၍ မိုးကြီးခြင်းနှင့် မိုးသက်လေပြင်း တို-က်ခတ်ခြင်းတို့ ဖြစ်ပေါ်နိုင်သည်ဟု မိုးလေဝသ ဦးစီးဌာန (ရန်ကုန်)က အသိပေးထားသည်။
အဆိုပါ လေဖိအားနည်းရပ်ဝန်းသည် အနောက်မြောက်ဘက်သို့ ဖြည်းညှင်းစွာ ဆက်လက်ရွေ့လျားနိုင်ကာ လာမည့် (၂၄)နာရီအတွင်း အိန္ဒိယနိုင်ငံ၊ အနောက်ဘင်္ဂလားပြည်နယ်ကမ်းလွန်နှင့် ဩရိဿပြည်နယ်မြောက်ပိုင်းကမ်းခြေတို့သို့လည်းကောင်း၊ လာမည့် (၄၈) နာရီအတွင်း အိန္ဒိယနိုင်ငံ၊ ဩရိဿပြည်နယ်အတွင်းသို့လည်းကောင်း ရောက်ရှိနိုင်သည်ဟု ခန့်မှန်းထားရှိကြောင်း ဆိုသည်။
ထိုသို့သော အခြေအနေကြောင့် မြန်မာနိုင်ငံအပေါ် အကျိုးသက်ရောက်မှုအနေဖြင့် ယနေ့မှစ၍ ဇွန်လ (၂၂) ရက်အတွင်း တစ်ပြည်လုံးတွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး နေရာကွက်၍ မိုးကြီးခြင်းနှင့် မိုးသက်လေပြင်း တို-က်ခတ်ခြင်းတို့ ဖြစ်ပေါ်နိုင်ကြောင်း သိရသည်။
မြန်မာ့ပင်လယ်ပြင်အပေါ် အကျိုးသက်ရောက်နိုင်မှုမှာ ယနေ့မှစ၍ ဇွန်လ(၂၀) ရက်အတွင်း မြန်မာ့ကမ်းရိုးတန်းတလျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ပြီး လှိုင်းအသင့်အတင့်မှ လှိုင်း ကြီးနိုင်ကာ မိုးသက်လေပြင်းကျစဉ် မြေပြင် ရေပြင်လေသည် တစ်နာရီလျှင် (၃၅) မိုင်မှ မိုင် (၄၀) အထိ တို-က်ခတ်နိုင်ပြီး လှိုင်းအမြင့်မှာ (၆) ပေမှ (၁၂) ပေခန့်အထိ ရှိနိုင်သည်ဟု အသိပေးထုတ်ပြန်ထားသည်။