ချဒ်နိုင်ငံသားတွေ အမေရိကန်ကို လာရောက်လည်ပတ်ခွင့် ပိ-တ်ပင်တဲ့ ထရမ့်အစိုးရရဲ့ ဆုံးဖြတ်ချက်ကို တုံ့ပြန်တဲ့အနေနဲ့ အမေရိကန်နိုင်ငံသားတွေကို ဗီဇာထုတ်ပေးခြင်း ဆိုင်းငံ့မယ်လို့ ချဒ်သမ္မတ မာဟာမက် အီဒရစ် ဒီဘီက ကြာသပတေးနေ့မှာ ကြေညာခဲ့ပါတယ်။
“အပြန်အလှန်ဆက်ဆံရေး နိယာမတွေနဲ့အညီ” အမေရိကန်နိုင်ငံသားတွေကို ဗီဇာဆိုင်းငံ့ဖို့ သူ့အစိုးရကို ညွှန်ကြားထားကြောင်း ဖေ့စ်ဘွတ်ခ်ပို့စ်တစ်ခုမှာ ချဒ်သမ္မတက ပြောကြားခဲ့တာဖြစ်ပါတယ်။
“ချဒ်မှာ ပေးစရာလေယာဉ်တွေ မရှိဘူး၊ ပေးစရာဒေါ်လာဘီလီယံချီ မရှိဘူး၊ ဒါပေမဲ့ ချဒ်မှာ သူ့ရဲ့ ဂုဏ်သိက္ခာနဲ့ ဂုဏ်ယူမှုတွေ ရှိပါတယ်”လို့ ချဒ်သမ္မတဒီဘီက ပြောကြားခဲ့ပြီး၊ အဲဒီလိုပြောကြားမှုဟာ ကာတာနိုင်ငံ အုပ်ချုပ်သူမိသားစုက ထရမ့်အစိုးရကို လက်ဆောင်အဖြစ် ပေးအပ်ခဲ့တဲ့ ဒေါ်လာသန်း ၄၀၀ တန် ဇိမ်ခံလေယာဉ်ကို စောင်းမြောင်းရည်ညွှန်းပြောဆိုခဲ့တာ ဖြစ်ပါတယ်။
သမ္မတ ဒေါ်နယ်လ် ထရမ့်က ဗုဒ္ဓဟူးနေ့မှာ သူ့ရဲ့ ပထမသက်တမ်းတုန်းက အဓိကမူဝါဒတစ်ခုကို ပြန်လည်အသက်သွင်းခဲ့ပြီး ချဒ်အပါအဝင် နိုင်ငံ ၁၂ နိုင်ငံကို ဗီဇာပိတ်ပင်ကြောင်း ကြေညာခဲ့ပါတယ်။ အဆိုပါနိုင်ငံတွေကို “အားနည်းချက်ရှိတဲ့” စိစစ်မှုနဲ့ စိစစ်အတည်ပြုမှုတွေရှိပြီး အမေရိကန်မှာ သတ်မှတ်ကာလထက် ကျော်လွန်နေထိုင်တဲ့ သူတို့ရဲ့ ကိုယ်ပိုင်နိုင်ငံသားတွေကို ပြန်လည်ခေါ်ယူဖို့ သမိုင်းကြောင်းအရ ငြင်းဆန်ခဲ့တယ်လို့ စွပ်စွဲခဲ့ပါတယ်။