ယူကရိန်းအခြေအနေနဲ့ ပတ်သက်ပြီး ရုရှားအပေါ် ကန့်သတ်ချက်အသစ်တွေ ထပ်ပြီးတိုးမြှင့်ချမှတ်ဦးမလားဆိုတာကို အမေရိကန်သမ္မတ ဒေါ်နယ်လ်ထရမ့်အနေနဲ့ ဆုံးဖြတ်ရသေးဘူးလို့ အမေရိကန်အရာရှိတွေကို ကိုးကားပြီး Politico သတင်းစာက ဖော်ပြခဲ့ပါတယ်။
သူတို့ရဲ့ ပြောကြားချက်အရ အမေရိကန်ဖက်က ထပ်တိုးစီးပွားရေးပိတ်ဆို့မှုတွေနဲ့ ခြိမ်းခြောက်လိုက်ရင်၊ အပစ်အခတ်ရပ်စဲရေးဆွေးနွေးပွဲတွေ ပြုလုပ်ဖို့ ရုရှားကတွန့်ဆုတ်နေနိုင်တယ်လို့ ထရမ့်က ထင်မြင်နေတယ်လို့ ဆိုပါတယ်။
ဒီအရင် သတင်းရင်းမြစ်တွေကို ကိုးကားပြီး The Wall Street Journal က ဖော်ပြခဲ့ရာမှာတော့ အမေရိကန်သမ္မတဟာ ဒီသီတင်းပတ်အတွင်း ရုရှားအပေါ် ပိတ်ဆို့အရေးယူမှုအသစ်တွေ ပြုလုပ်ဖို့ စဉ်းစားနေပြီး ငြိမ်းချမ်းရေးအတွက် နောက်ဆုံးတွန်းအားပေးမှု အလုပ်မဖြစ်ရင် ဆွေးနွေးပွဲလုပ်ငန်းစဉ်ကနေ ထွက်ခွာဖို့အထိတောင် စဉ်းစားနေတယ်လို့ ဆိုပါတယ်။ ဖြစ်နိုင်ခြေရှိတဲ့ အစီအမံတွေမှာ ဘဏ်လုပ်ငန်းဆိုင်ရာ ပိတ်ဆို့မှုအသစ်တွေ ပါဝင်မှာမဟုတ်ပေမယ့် ညှိနှိုင်းစားပွဲမှာ ရုရှားခေါင်းဆောင်ပိုင်းကို ဖိအားပေးပြီး ထပ်မံလျှော့ပေါ့မှုတွေ ရရှိစေဖို့ တခြားရွေးချယ်စရာတွေကို ဆွေးနွေးနေတယ်လို့ သတင်းရင်းမြစ်တစ်ခုက သတင်းစာကို ပြောကြားခဲ့ကြောင်း ရေးသားခဲ့ပါသေးတယ်။