တစ်ကမ္ဘာလုံးကိုစွမ်းအင်‌တင်ပို့သောနိုင်ငံဖြစ်လာရန်ဂျကာတာရည်မှန်း

ဂျကာတာ၊ မေ ၂၂

အင်ဒိုနီးရှားသမ္မတ ပရာဘိုဝို ဆုဘီယန်တို က ၎င်း၏နိုင်ငံတွင် ကြီးမားကျယ်ပြန့်၍ အသုံးမပြု၊မဖော်ထုတ်ရသေးသော စွမ်းအင်အရင်းအမြစ်အရန်သိုလှောင်ထားမှုနှင့် အမြဲမပြတ်ပြန်လည် ဖြည့်တင်း နိုင်စွမ်းတို့ကြောင့် ၎င်းတို့နိုင်ငံသည် ကမ္ဘာကြီးအတွက် အဓိက စွမ်းအင်ထောက်ပံ့ ဖြည့်တင်း ပေးသွင်းသူ ဖြစ်လာရန် အဆင်သင့်ရှိကြောင်း ပြောကြားခဲ့သည်။

ဗုဒ္ဓဟူးနေ့တွင် တန်ဂဲရန်မြို့ ၌ ကျင်းပခဲ့ သော ၄၉ ကြိမ်မြောက် အင်ဒိုနီးရှားရေနံအသင်းကွန်ဗင်းရှင်းနှင့် ပြပွဲဖွင့်ပွဲတွင် ပရာဘိုဝို က ကမ္ဘာလုံးဆိုင်ရာ စွမ်းအင်လိုအပ်ချက်တွေကို ဖြည့်ဆည်းပေးဖို့ အင်ဒိုနီးရှားရဲ့ မဟာဗျူဟာမြောက် ရပ်တည်ချက်သည် အရေးကြီးဆုံးဖြစ်ကြောင်း အလေးပေးပြောကြားခဲ့ပါသည်။

“ကျွန်ု‌တော်တို့မှာရရှိနိုင်တဲ့ စွမ်းအင်အရင်းအမြစ်တွေဟာ ရုပ်ကြွင်းလောင်စာတွေကနေစပြီးတော့ မြေအောက် ဘူမိ အပူ၊ ရေအားလျှပ်စစ်၊ လေနဲ့ ပင်လယ်လှိုင်းစွမ်းအင်တို့လို ပြန်လည်ပြည့်ဖြိုးမြဲစွမ်းအင် တွေအထိ ပါဝင်ပါတယ်။ အင်ဒိုနီးရှားဟာ နိုင်ငံ၏စွမ်းအင်ဖူလုံရုံတင်မကဘဲ ကမ္ဘာကို လည်း စွမ်းအင်ထောက်ပံ့ ဖြည့်တင်း ပေးသွင်းနိုင်မယ်ဆိုတဲ့ ယုံကြည်မှုရှိပါတယ်” ဟု ၎င်းက ပြောကြားခဲ့သည်။

အင်ဒိုနီးရှားနိုင်ငံသည် မတူးဖော်ရသေးသော ရေနံနှင့် သဘာဝဓာတ်ငွေ့လုပ်ကွက် ဒါဇင်များစွာကို ဆက်လက်ပိုင်ဆိုင်ထားဆဲဖြစ်ပြီး ပြည်တွင်းနှင့် ပြည်ပရင်းနှီးမြှုပ်နှံသူများအတွက် သိသာထင်ရှားသော အခွင့်အလမ်းများကို ပေးဆောင်လျက်ရှိသည်ဟု သမ္မတက မှတ်ချက်ပြု ပြေကြားခဲ့သည်။

ဖွံ့ဖြိုးတိုးတက်ရေး အရှိန်အဟုန်မြှင့်တင်ရန်အတွက် အစိုးရ၊ ပုဂ္ဂလိကကဏ္ဍနှင့် အစိုးရပိုင်လုပ်ငန်းများအကြား ခိုင်မာသော ပူးပေါင်းဆောင်ရွက်မှုများကိုတိုးမြှင့်ရန် တောင်းဆိုခဲ့သည်။

လိုင်စင်နှင့် ရင်းနှီးမြှုပ်နှံမှုလုပ်ထုံးလုပ်နည်းများကို ရိုးရှင်းစေရန်အတွက် ဗျူရိုကရေစီ ကြိုးနီစနစ် ကို ပယ်ဖျက်ရန်လည်း ကတိပြုခဲ့သည်။

“စည်းမျဉ်းစည်းကမ်းတွေကို ရိုးရှင်း လွယ်ကူအောင်လုပ်ဖို့ စည်းကမ်းထိန်းသိမ်းရေးအဖွဲ့တွေကို တောင်းဆိုပါတယ်။ ပြည်တွင်းရော နိုင်ငံတကာ ရင်းနှီးမြှုပ်နှံသူတွေအတွက် စီးပွားရေး အဆင်ပြေတဲ့ ပတ်ဝန်းကျင်တစ်ခုကို ဖန်တီးပေးရမယ်” ဟု ၎င်းက မှတ်ချက်ပြု ပြောကြားခဲ့သည်။

Ref: ရှင်းဟွာ