မိတ်ဆွေကောင်း၏အရေးပါမှုနှင့်ပတ်သက်၍ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မေ ၂၁ ရက်နံနက်ပိုင်းက နေပြည်တော်ရှိ ဇေယျာသီရိဗိမာန်၌ကျင်းပသည့် အခြေခံနှင့်တန်းမြင့်ရေကြောင်းလူငယ်သင်တန်းအမှတ်စဉ်(၁/၂၀၂၅)နှင့် အခြေခံနှင့်တန်းမြင့် လေကြောင်းလူငယ်သင်တန်း(၁/၂၀၂၅)တို့မှ သင်တန်းသား၊ သင်တန်းသူများနှင့် အုပ်ချုပ်သူနည်းပြများအားတွေ့ဆုံစဉ် ပြောကြားခဲ့ခြင်းဖြစ်သည်။
” လူရယ်လို့ဖြစ်လာရင် မိတ်ကောင်းဆွေမွန်ရှိဖို့လိုအပ်ပါတယ်။ တစ်ဦးနဲ့တစ်ဦးနားလည်မှု၊ ရိုင်းပင်းကူညီမှု၊ စာနာဖေးမမှု၊ အမှားတွေ့ရင် စေတနာနဲ့ဝေဖန်ထောက်ပြမှုတွေဟာ မိတ်ဆွေအချင်းချင်းပြုမူပေးတတ်တဲ့ အလေ့အကျင့်ကောင်းတွေဖြစ်ပါတယ်။ အဲ့လို မိတ်ဆွေကောင်းတွေကိုပိုင်ဆိုင်ခြင်းအားဖြင့် မိမိတို့ဖြတ်သန်းရမယ့် အနာဂတ်ဘဝကို ဖြောင့်တန်းအောင်လျှောက်လှမ်းနိုင်ကြမှာပဲဖြစ်ပါတယ်”ဟု နစက ဥက္ကဋ္ဌကပြောသည်။
ထို့အတူ လူတိုင်းတွင်မိတ်ဆွေကောင်းရှိရန်အရေးကြီးသကဲ့သို့ တိုင်းရင်းသားလူမျိုးပေါင်းစုံဖြင့် ဖွဲ့ စည်းတည်ဆောက်ထားသည့် မိမိတို့နိုင်ငံတော်ကြီးသည်လည်း မိတ်ဆွေကောင်းများပိုင်ဆိုင်ထားသည့်နိုင်ငံတစ်နိုင်ငံဖြစ်သည်ဟု ပြောသည်။
” မိမိတို့နိုင်ငံရဲ့ ပြည်တွင်းရေးအခြေအနေတွေနဲ့ပတ်သက်ပြီး အမှန်တရားဘက်ကအရှိအတိုင်းရပ်တည်ပေးတဲ့နိုင်ငံတွေဟာ နိုင်ငံတော်ရဲ့မိတ်ဆွေကောင်းတွေပဲဖြစ်ပါတယ်။ မကြာခင်ကဖြစ်ပွားခဲ့တဲ့ မန္တလေးငလျင်ကြီးကြောင့် ထိခိုက်ဆုံးရှုံးမှုတွေဖြစ်ပေါ်ခဲ့ရချိန်မှာ အချိန်နဲ့တစ်ပြေးညီ ကူညီကယ်ဆယ်ရေးလုပ်ငန်းတွေလုပ်ကိုင်ပေးဖို့ရောက်လာတဲ့ မိတ်ဆွေကောင်းနိုင်ငံတွေ ဝမ်းနည်းစာနာကြောင်း သဝဏ်လွှာပေးပို့ခဲ့ကြတဲ့ နိုင်ငံ့ခေါင်းဆောင်တွေ ငလျင်ဒဏ်သင့်ပြည်သူတွေအတွက် ကျန်းမာရေးစောင့်ရှောက်မှု၊ စားသောက်နေထိုင်ရေးကဏ္ဍစုံမှာပံ့ပိုးကူညီပေးကြတဲ့အဖွဲ့အစည်းတွေနဲ့နိုင်ငံတွေဟာ မိမိတို့နိုင်ငံအတွက်မိတ်ဆွေကောင်းတွေလို့ဆိုရမှာဖြစ်ပါတယ်”ဟု နစက ဥက္ကဋ္ဌကပြောသည်။
ထို့ပြင် စာအုပ်စာပေများသည် လူသားတို့၏ မိတ်ဆွေများဖြစ်၍ လူများ၏စိတ်ကိုနူးညံ့စေသည့် ရသစာပေများ၊ အတွေးအခေါ်ဗဟုသုတမြင့်မားစေသည့် သုတစာပေများကို ဖတ်ရှုလေ့လာပြီး မိမိ၏ ဘဝအစဉ်တိုးတက်နေအောင်ကြိုးပမ်းပြီး နိုင်ငံတော်အတွက် အားကိုးအားထားပြုရသည့် အနာဂတ် သားကောင်းရတနာများဖြစ်အောင်ကြိုးပမ်းသွားကြရန်လည်း နစက ဥက္ကဋ္ဌက တိုက်တွန်းပြောကြားခဲ့သည်။