စင်္ကာပူ၊ မေ ၂၀
၂၀၂၄ ခုနှစ်အတွင်း စင်ကာပူနိုင်ငံတွင် ခုခံစွမ်းအားကျဆင်းမှုကူးစက်ရောဂါ (HIV) ဖြစ်ပွားသူ အသစ် ၁၅၁ ဦးကို တွေ့ရှိရ ကြောင်း သတင်းထုတ်ပြန်ခဲ့ပြီး ၇၈ ဦး မှာ ရောဂါရင့်သည့် အဆင့် ဖြစ်ကြောင်း ကူးစက်ရောဂါအေဂျင်စီ (CDA) က ယမန်နေ့ကထုတ်ပြန်သောနောက်ဆုံးပေါ် သတင်းအချက်အလက်များ အရသိရှိရသည်။
အသစ် တွေ့ရှိရသော ရောဂါဖြစ်ပွားသူများ၏ ၆၂ ရာခိုင်နှုန်းခန့်ကို ဆေးကုသမှုကာလအတွင်း တွေ့ရှိခဲ့ပြီး အများစုမှာ HIV ပိုးကူးစက်မှု၏အနှောင်းပိုင်းအဆင့်သို့ ရောက်ရှိနေပြီဖြစ်သည်။
လူနာသစ်ထက်ဝက်ကျော်ကို နောက်ကျမှ ရောဂါရှိေကြာင်း တွေ့ရခြင်းမှာ စိုးရိမ်စရာအကြောင်းရင်းတစ်ခုဖြစ်သည်ဟု HIV၊ အသည်းရောင်အသားဝါ C နှင့် CDA လက်အောက်ရှိ လိင်မှတစ်ဆင့် ကူးစက်ရောဂါဆိုင်ရာ နိုင်ငံတော်ပရိုဂရမ်အကြီးအကဲ ဝုံးချန်ဆောင် က ဒေသတွင်း မီဒီယာသို့ ပြောကြားခဲ့သည်။
အစောပိုင်းအဆင့်နှင့် အနှောင်းပိုင်း အဆင့် လူနာများသည် ကုသမှုခံယူပြီးနောက် သုံးလမှ ခြောက်လအတွင်း HIV ဗိုင်းရပ်စ်ပိုးကို ပုံမှန်အားဖြင့် မတွေ့နိုင်အောင် ထိန်းချုပ်ဖိနှိပ် ထားနိုင်သော်လည်း နောက်ကျသောအဆင့်တွင် မှ ရောဂါရှာဖွေတွေ့ရှိသူများသည် ခုခံအားစနစ် အားနည်းခြင်းကြောင့် ပြင်းထန်သော တခြားရောဂါများနှင့်တွဲ၍ ရှိနေပြီးသားဖြစ်သဖြင့် နောက်ဆက်တွဲပြဿနာများကို ကြုံတွေ့ရလေ့ရှိသည် ဟု ၎င်းက ဆိုသည်။ အနှောင်းပိုင်းလူနာများအတွက် ကုသမှုသည် နောက်ထပ်ကိုယ်ခံအားပျက်စီးမှုကို ကာကွယ်ရန် ဗိုင်းရပ်စ်ကို နှိမ်နှင်းရုံသာမက ယင်းနှင့် တစ်ပြိုင်နက်တည်း တွဲ၍ဖြစ်သော ရောဂါများကိုလည်း စနစ်တကျ ထိန်းသိမ်းကုသရသည်။
ခုခံအားစနစ်သည် ထိခိုက်ပျက်စီးသွားပြီဆိုလျှင် လူနာ၏ကျန်းမာရေးသည် အပြည့်အဝ ပြန်လည်ကောင်းမွန်ရန် အချိန်ကာလသည် အသက်အရွယ်နှင့် အခြေခံကိုယ်ခံစွမ်းအား အခြေအနေပေါ်မူတည်၍ကွဲပြားမှုရှိကြောင်း ၎င်းက ဆက်လက်ပြောသည်။ ဤပြန်လည်ထူထောင်ရေးကာလတွင် လူတစ်ဦးချင်းစီသည် အခြားသော ကူးစက်ရောဂါများကို ပို၍ ခံနိုင်ရည်ရှိရန်လည်းလိုအပ်သည်။
၂၀၂၄ ခုနှစ် နှစ်ကုန်ပိုင်းအထိ စင်ကာပူနိုင်ငံတွင် HIV ရောဂါရှိကြောင်း သိရှိထားသူ စုစုပေါင်း ၇,၁၃၇ ဦး ရှိကြောင်း သိရှိရပါသည်။
စင်္ကာပူနိုင်ငံတွင် HIV ပိုးကူးစက်မှုအသစ် အရေအတွက်သည် တစ်နှစ်ထက်တစ်နှစ် တဖြည်းဖြည်း ကျဆင်းလာကာ ၂၀၀၉ ခုနှစ်မှ ၂၀၁၉ ခုနှစ်အတွင်း နှစ်စဉ် ၃၀၀ မှ ၅၀၀ အထိ၊ ၂၀၂၀ မှ ၂၀၂၃ ခုနှစ်အတွင်း နှစ်စဉ် ၂၀၀ မှ ၂၅၀ ဝန်းကျင်အထိ ကျဆင်းလာသည်။
Ref: ရှင်းဟွာ