ယခုမေလအတွက် ရည်ညွှန်းဆန်ဈေးနှုန်းများ ထုတ်ပြန်ရာတွင် ပြည်တွင်းစားဆန်တချို့ တစ်အိတ်လျှင် ကျပ် (၈,၀၀၀) မှ (၁၀,၀၀၀) အထိ ကျဆင်းလာခဲ့ကြောင်း စားသုံးသူရေးရာဦးစီးဌာနမှ ထုတ်ပြန်ထားသည့် ရည်ညွှန်းဆန်ဈေး နှုန်းအရ သိရသည်။
ယခု မေလအတွက် (၁၀၈) ပေါင်/ (၂၄)ပြည် ဆန်တစ်အိတ်ဈေးနှုန်း သတ်မှတ်ချက်အရ ပြည်ပတင်ပို့သည့် ဆန်ကြမ်းအုပ်စုများ (ဧည့်မထ/ ငစိန်) (ဆင်းသုခ၊ သီးထပ်ယဉ်၊ ရတနာတိုး၊ ငစိန်ရာကျော်၊ ကရင်မ၊ ထွန်းပု၊ GW-၁၁၊ စောရုပ်၊ ၇၄၇၊ သီးပု၊ ရွှေမန်း စသော ဧည့်မထ/ ငစိန် အုပ်စုဝင် ဆန်ကြမ်းများ)အတွက် (၂၅) မှတ်၊ (၁၅) မှတ်၊ (၁၀/၅) မှတ် (၅ ၀) ကီလိုဂရမ်တစ်အိတ် ကျပ် (၆၀,၀၀၀) မှ ကျပ် (၇၂,၀၀၀) အထိ သတ်မှတ်ထားသည်။
အလားတူ ပြည်ပတင်ပို့မှုနှင့် ပြည်တွင်းစားသုံးမှုပါရှိသော အရည်သွေးအသင့်တင့်ရှိသော ဆန်အမျိုးအစား အဟောင်းတစ်အိတ်ကို ကျပ် (၇၈,၀၀၀) နှင့် အသစ်တစ်အိတ်ကို ကျပ် (၆၈,၀၀၀) သတ်မှတ်ထားသည်။
မြန်မာပြည်အောက်ပိုင်းမှ ထွက်ရှိသော စားသုံးမှုအရည် သွေးကောင်းမွန်သည့် ပြည်တွင်းစားဆန် အမျိုးအစားများကိုလည်း ဆန်ဟောင်းတစ်အိတ် ကျပ် (၉၂,၀၀၀) နှင့် အသစ်တစ်အိတ် ကျပ် (၇၅,၀၀၀) သတ်မှတ်ထားသလို မြန်မာပြည်အထက်ပိုင်းမှ ထွက်ရှိသော စားသုံးမှုအထူကောင်းမွန်သည့် ဆန်အမျိုးအစားများကိုမူ တစ်အိတ် ကျပ် (၁၃၃,၀၀၀ )နှင့် ဆန်အသစ်အတွက် တစ်အိတ် ကျပ် (၁၂၀,၀၀၀) သတ်မှတ်ထားသည်။
ဈေးအရောင်းစင်တာ (Super Market၊ Mini Market) များတွင် Consumer Packaging ဖြင့် ရောင်းချမှုအတွက် ဆန်ဈေးနှုန်းအားလုံးကိုလည်း နိုဝင်ဘာလအတိုင်း သတ်မှတ်ပေးထားကြောင်း၊ ဈေးကွက်အတွင်းရောင်းချရာတွင် အထက်ဖော်ပြပါ သင့်တင့်မျှတသော ရည်ညွှန်းဈေးနှုန်းများအပေါ် (၈) ရာခိုင်နှုန်းထက်မပိုသော၊ ဝန်ဆောင်စရိတ် (၃) ရာ ခိုင်နှုန်းထက်မပိုသော၊ သယ်ယူသိုလှောင်စရိတ် (၄) ရာခိုင်နှုန်းထက်မပိုသော ထုတ်လုပ်သူအကျိုးအမြတ်တို့ဖြင့် တွက်ချက်ရောင်းချရန် သတိပေးထားသည်။