“ရွှေဧကရာဇ်”ရွှေလုပ်ငန်းပိုင်ရှင်ထံမှ ငွေကျပ်သိန်း (၂၆၀၀၀)ခန့်တန်ဖိုးရှိ ရွှေထည်ပစ္စည်းများကို ဓ-ားပြတိုက်ယူဆောင်သွားသူများကို ဖမ်းဆီးရမိရေးစုံစမ်းနေ

စစ်ကိုင်းတိုင်း၊ မြင်းမူမြို့တွင် မေ ၁ ရက်မွန်းလွဲ ၂ နာရီခွဲခန့်က လက်နက်ကိုင်ဆောင်ထားသူ(၄)ဦးက “ရွှေဧကရာဇ်”ရွှေလုပ်ငန်းပိုင်ရှင်ထံမှ ငွေကျပ်သိန်း (၂၆၀၀၀)ခန့်တန်ဖိုးရှိ ရွှေထည်ပစ္စည်းများကို ဓ-ားပြတိုက်ယူဆောင်သွားခဲ့ကြကြောင်း သိရသည်။

မြင်းမူမြို့၊ မာဃရပ်ကွက်နေ “ရွှေဧကရာဇ်”ရွှေလုပ်ငန်းပိုင်ရှင်သည် ဆိုင်မှအလုပ်သမားများနှင့်အတူ ဆိုင်သို့သွားရောက်ရန် နေအိမ်မှတစ်ဆင့် ကားဖြင့်ထွက်ခွာလာစဥ် နေအိမ်လမ်းတစ်ဖက်ခြမ်းမှ လက်နက်များကိုင်ဆောင်ထားသော အမျိုးသား (၄)ဦးရောက်ရှိလာကာ ငွေကျပ်သိန်း(၂၆၀၀၀)ခန့်တန်ဖိုးရှိ ရွှေထည်ပစ္စည်းမျိုးစုံ(၅)ပိဿာခန့်တင်ဆောင်လာသည့်ကားကို ဓ-ားပြတိုက်ယူဆောင်သွားခဲ့ကြကြောင်း သိရသည်။

” ဆိုင်သွားဖို့အိမ်ကနေကားနဲ့ထွက်လာတဲ့အချိန် လမ်းတစ်ဖက်ခြမ်းမှာရှိတဲ့ သိမ်တော်ကြီးဘုရားဝင်းထဲကနေ မျက်နှာဖုံးကိုယ်စီစွတ်ပြီးလက်နက်တွေကိုင်ထားတဲ့ လူ(၄)ယောက်ရောက်လာတယ်။ နောက် ရွှေထည်ပစ္စည်းတွေတင်ထားတဲ့ကားကိုပါဓ-ားပြတိုက်ပြီး ကမ်းနားလမ်းအတိုင်းမောင်းနှင်ထွက်ပြေးသွားကြတယ်လို့သိရပါတယ်။ ကမ်းနားလမ်းတစ်နေရာရောက်တော့ ကားမောင်းတဲ့ကောင်လေးကိုကန်ချထားခဲ့ပြီး မြစ်ပေါက်ကျေးရွာဘက်ကို မောင်းပြေးသွားတယ်လို့သိထားတယ်”ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။

ဖြစ်စဥ်အား လုံခြုံရေးအဖွဲ့ဝင်များက စစ်ဆေးမှုများပြုလုပ်၍ ပြစ်မှုကျူးလွန်သူများအားဖမ်းဆီးရမိရေးအတွက် စုံစမ်းစစ်ဆေးမှုများနှင့် ပိတ်ဆို့ရှာဖွေမှုများပြုလုပ်လျက်ရှိကြောင်း သိရသည်။