ဂါဇာကမ်းမြောင်ဒေသ ပဋိပက္ခအဆုံးသတ်ရေးအတွက် ပိုမိုကြီးမားသော သဘောတူညီချက်၏ တစ်စိတ်တစ်ပိုင်းအားဖြင့် လက်ကျန် ဓ-ါးစာခံအားလုံးကို အလဲအလှယ်လုပ်ရန်အတွက် စေ့စပ်ညှိနှိုင်းမှုကိုချက်ချင်းလုပ်ဆောင်ရန် ဟားမတ်စ်အဖွဲ့က အသင့်ရှိကြောင်း ဟားမတ်စ် စေ့စပ်ညှိနှိုင်းရေးကိုယ်စားလှယ်အဖွဲ့ခေါင်းဆောင် ခါလစ် အယ်ဟေယာက ဧပြီလ၁၇ ရက် နေ့တွင် ပြောကြားခဲ့သည်။
အစ္စလာမ်မစ်လှုပ်ရှားမှု ဟားမတ်စ်အဖွဲ့အနေဖြင့် ယာယီအပစ်အခတ်ရပ်စဲရေး သဘောတူညီချက်ကို ပယ်ချခဲ့ကြောင်း ရုပ်သံမိန့်ခွန်းတွင် အယ်ဟေယာက ပြောကြားခဲ့သည်။
“အစ္စရေးဝန်ကြီးချုပ် ဘင်ဂျမင်နေတန်ယာဟုနဲ့ သူ့အစိုးရအဖွဲ့ဟာ ပျက်သုန်းမှုနဲ့ ငတ်မွတ်ခေါင်းပါးမှု ဆက်လက်ဖြစ်ပွားနေတဲ့ စစ်ပွဲကို အခြေခံတဲ့ သူတို့ရဲ့ နိုင်ငံရေးအစီအစဉ်ကို ဖုံးကွယ်ဖို့ရာ တစ်စိတ်တစ်ပိုင်း သဘောတူညီချက်တွေကို အသုံးချနေပါတယ်။ ဒါကို ကျွန်တော်တို့ လက်မခံပါဘူး” ဟု အယ်ဟေယာက ဆိုခဲ့သည်။
၂၀၂၅ ခုနှစ် ဇန်နဝါရီလ ၁၉ ရက်နေ့တွင် အသက်ဝင်ခဲ့သော အပစ်အခတ်ရပ်စဲမှုကို ပြန်လည်ထူထောင်ရန် အီဂျစ် ကြားဝင်ညှိနှိုင်းသူများက ကြိုးစားနေသော်လည်း အစ္စရေးနှင့် ဟားမတ်စ်တို့သည် အဓိကအကြောင်းအရာများအပေါ်တွင် နက်ရှိုင်းစွာ သဘောကွဲလွဲနေသောကြောင့် တိုးတက်မှု အရိပ်အယောင်အနည်းငယ်သာ ရှိသေးသည်။
အပစ်ရပ်စဲမှု ပြန်လည်ထူထောင်ရန်နှင့် အစ္စရေးဓ-ါးစာခံများကို ပြန်လွှတ်ပေးရန် ရည်ရွယ်သော ဧပြီလ ၁၄ ရက်နေ့က ကိုင်ရိုတွင် ပြုလုပ်ခဲ့သည့် နောက်ဆုံးအကျော့ ဆွေးနွေးပွဲများသည် ရှင်းလင်းပြတ်သားသော အဖြေမရရှိဘဲ အဆုံးသတ်ခဲ့ရသည်။
အစ္စရေး ထောင်များရှိ ပါလက်စတိုင်း အကျဉ်းသားများနှင့် ဓါးစာခံအချို့ အပြန်အလှန် လဲလှယ်ရန် ၊ ပဋိပက္ခအဆုံးသတ်ရေးနှင့် အစ္စရေးတပ်များ ဂါဇာမှ ဆုတ်ခွာရေးတို့ပါဝင်သော အပစ်ရပ်စဲရေး သဘောတူညီချက် ဒုတိယအဆင့် အကောင်အထည်ဖော်ရေး စေ့စပ်ညှိနှိုင်းမှုများကို စတင်ရန် ကာတာနှင့် အီဂျစ် ညှိနှိုင်းသူများ၏ အဆိုပြုချက်ကို ဟားမတ်စ်က လက်ခံကြောင်း အယ်ဟေယာက အတည်ပြုခဲ့သည်။
အစ္စရေးသည်မူ မဖြစ်နိုင်သော စည်းကမ်းသတ်မှတ်ချက်များနှင့် အဆိုပြုချက်ကို တင်ပြခဲ့သည်ဟုသူက စွပ်စွဲခဲ့သည်။
ဂါဇာကမ်းမြောင်ဒေသ အပစ်အခတ်ရပ်စဲရေးဆိုင်ရာ အခြေအနေတစ်ရပ်အဖြစ် ဟားမတ်စ်တို့ လက်နက်ဖြုတ်သိမ်းရန် လိုအပ်သည်ဆိုသော အဆိုပြုချက်သည် အစ္စရေး အဆိုပြုချက်များ၏ တစ်စိတ်တစ်ပိုင်းသာဖြစ်ပြီး အီဂျစ်၏ အဆိုပြုချက်မဟုတ်ဟု အီဂျစ် အစိုးရ ပြန်ကြားရေးဌာန(SIS) ဥက္ကဌ Diaa Rashwan က ပြောကြားခဲ့သည်။
Ref: အိပ်ချ်ဒီ