နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မတ် ၁၆ ရက်နံနက်ပိုင်းက နစက ဥက္ကဋ္ဌရုံး သဘင်ဆောင်၌ကျင်းပသည့် ၂၀၂၅ ခုနှစ်၊ ဂုဏ်ထူးဆောင်ဘွဲ့များချီးမြှင့်အပ်နှင်းခြင်းအခမ်းအနားတွင် ဂုဏ်ထူးဆောင်ဘွဲ့ရရှိသူများအနက် (၃၆)ဦးကို ဂုဏ်ထူးဆောင်ဘွဲ့များအား လက်ရောက်ချီးမြှင့်ခဲ့သည်။
အခမ်းအနားတွင် နစက ဥက္ကဋ္ဌမှ တည်ငြိမ်အေးချမ်းပြီး ခေတ်မီဖွံ့ဖြိုးတိုးတက်သည့်နိုင်ငံဖြစ်စေရန်ဘက်စုံထောင့်စုံမှ ကြိုးပမ်းတည်ဆောက်နေရာ၌ ပြည်ထောင်စုဖွား တိုင်းရင်းသားပြည်သူအားလုံး၏ အင်အားသည်အဓိကကျပြီး အားလုံး၏ပူးပေါင်းပါဝင်မှု သည် အရေးကြီးကာ နိုင်ငံတော်အစိုးရ၏ဦးဆောင်မှုနှင့်အတူ ပြည်သူတစ်ဦးချင်းစီက စိတ်ဓာတ်၊ အသိအမြင်၊ ကာယဉာဏစွမ်းအားများနှင့် ပူးပေါင်းပါဝင်မှုအင်အားဖြင့်သာအောင်မြင်နိုင်မည်ဟု ပြောသည်။
နိုင်ငံတော်အစိုးရမှ ချမှတ်အကောင်အထည်ဖော် ဆောင်ရွက်နေသည့် ရှေ့လုပ်ငန်းစဉ်(၅)ရပ်၊ ဦး တည်ချက်(၉)ရပ်၊ အမျိုးသားရေး ရည်မှန်းချက် (၂)ရပ်၏ လုပ်ငန်းစဉ်များသည် လက်တွေ့အကောင်အထည်ဖော်ရာ၌ အလွန်ကျယ်ပြန့်နက်ရှိုင်းကာ ယင်း ဦးတည်ချက်လုပ်ငန်းစဉ်နှင့် ရည်မှန်းချက်တိုင်းတွင် ကဏ္ဍအလိုက်အသေးစိတ်ဖော်ဆောင်ရမည့် လုပ်ငန်းတာဝန်များစွာရှိနေသည်ဟု ပြောသည်။
” အားလုံးသိရှိပြီးဖြစ်တဲ့အတိုင်း ပါတီစုံဒီမိုကရေစီ အထွေထွေရွေးကောက်ပွဲကြီးကျင်းပနိုင်ဖို့အတွက် လိုအပ်တဲ့ပြင်ဆင်မှုတွေကို စီစဉ်ဆောင်ရွက်နေပြီ ဖြစ်ပါတယ်။ လွတ်လပ်ပြီးတရားမျှတတဲ့အထွေထွေရွေးကောက်ပွဲကို မဖြစ်မနေကျင်းပပြုလုပ်ပေးသွားမှာဖြစ်တဲ့အတွက် ရွေးကောက်ပွဲအောင်မြင်စွာ ကျင်းပနိုင်ဖို့ အစိုးရနဲ့ပြည်သူ တက်ညီလက်ညီ ဝိုင်း ဝန်းပူးပေါင်းဆောင်ရွက်သွားကြဖို့လိုအပ်ပါတယ်” ဟု နစက ဥက္ကဋ္ဌက ပြောသည်။
ထို့ပြင် နစက အနေဖြင့် ပြည်တွင်းမှဂုဏ်ထူးဆောင်ဘွဲ့အပ်နှင်းခြင်းခံထိုက်သူများကိုသာမက ပြည်ပနိုင်ငံများမှ မြန်မာနိုင်ငံ၏ ကောင်းရာကောင်းကျိုးကို စိတ်ကောင်းစေတနာအပြည့်ဖြင့် စွမ်းစွမ်းတမံပူးပေါင်းဆောင်ရွက်ခဲ့ကြသည့် ပုဂ္ဂိုလ်များကိုလည်း နိုင်ငံအချင်းချင်းချစ်ကြည်ရင်းနှီးမှုပိုမိုခိုင် မာစေရန် ဂုဏ်ထူးဆောင်ဘွဲ့၊ တံဆိပ်များချီးမြှင့်အပ်နှင်းလျက်ရှိသည်ဟု ပြောကြားခဲ့သည်။
ထို့နောက် နစက ဥက္ကဋ္ဌမှ ပြည်ထောင်စုစည်သူသင်္ဂဟဘွဲ့များဖြစ်သည့် “စည်သူဘွဲ့”ရရှိသူ(၁၃)ဦး၊ တပ်မတော်စွမ်းရည်သတ္တိဆိုင်ရာဘွဲ့များဖြစ်သည့် “သူရဘွဲ့”ရရှိသူ(၃)ဦး၊ စွမ်းဆောင်မှုဆိုင်ရာဂုဏ်ထူးဆောင်ဘွဲ့များဖြစ်သည့် “ဇေယျကျော်ထင်ဘွဲ့” ရရှိသူ(၁၇)ဦး၊ “ဝဏ္ဏကျော်ထင်ဘွဲ့”ရရှိသူ(၁၄)ဦး၊ “အလင်္ကာကျော်စွာဘွဲ့”ရရှိသူ(၁)ဦး၊ “သိပ္ပကျော်စွာဘွဲ့”ရရှိသူ(၂)ဦးတို့ကို ဂုဏ်ထူးဆောင်ဘွဲ့များအား တစ်ဦးချင်းလက်ရောက်ချီးမြှင့်အပ်နှင်းပေးခဲ့သည်။
ယနေ့ ကျင်းပသည့် ဂုဏ်ထူးဆောင်ဘွဲ့များချီးမြှင့်အပ်နှင်းခြင်းအခမ်းအနားတွင် ၂၀၂၅ ခုနှစ်၊ ဇန်န ဝါရီ ၄ ရက်(လွတ်လပ်ရေးနေ့)နှင့် မတ် ၂ ရက် (တောင်သူလယ်သမားနေ့)တို့တွင် အမိန့်ကြော်ငြာစာထုတ်ပြန်ပြီးဖြစ်သည့် စည်သူဘွဲ့(၁၃)ဦး၊ သူရဘွဲ့(၃)ဦး၊ ဇေယျကျော်ထင်ဘွဲ့(၁၇)ဦး၊ ဝဏ္ဏကျော်ထင်ဘွဲ့(၁၄)ဦး၊ အလင်္ကာကျော်စွာဘွဲ့(၁)ဦး၊ သိပ္ပကျော်စွာဘွဲ့(၂)ဦး(စုစုပေါင်း ၅၀ ဦး)ကို သက်ဆိုင် ရာ ဂုဏ်ထူးဆောင်ဘွဲ့များချီးမြှင့်အပ်နှင်းခဲ့သည်။