ရှုံးပွဲမရှိ ချန်ပီယံဆုကို ဆွတ်ခူးခဲ့ပြီဖြစ်သည့် ရှမ်းယူနိုက်တက်အသင်း

၂၀၂၄-၂၀၂၅ မြန်မာနေရှင်နယ်လိဂ်
ဘောလုံးရာသီအတွင်း ရှုံးပွဲမရှိ ချန်ပီယံဆုကို ရှမ်းယူနိုက်တက်က ဆွတ်ခူးခဲ့ရရှိပြီဖြစ်သည်။

ယနေ့ မတ်လ (၁ )ရက် တောင်ကြီးမြို့ ပြည်နည်အားကစားကွင်း၌ ကျင်းပခဲ့သည့် ရာသီပိတ်နောက်ဆုံးပွဲစဉ် (၂၂) ကို ရှမ်းယူနိုက်တက်နှင့် ဟံသာဝတီယူနိုက်တက်အသင်းတို့ ယှဉ်ပြိုင်ကစားရာအိမ်ရှင် ရှမ်းယူနိုက်တက်အသင်းက (၄) ဂိုးပြတ်သွင်းယူ၍ အနိုင်ရရှိခဲ့သည်။

ပွဲစဉ်အပြီးတွင် ချန်ပီယံဆုပေးပွဲအခမ်းအနားကို ဆက်လက်ကျင်းပရာ မြန်မာနေရှင်နယ်လိဂ် ၂၀၂၄-၂၅ ဘောလုံးပြိုင်ပွဲတွင် သွင်းဂိုး (၁၅) ဂိုးဖြင့် ဂိုးသွင်းအများဆုံးဆု ရရှိခဲ့သည့် ရန်ကုန်ယူနိုက်တက်အသင်းမှ ကျောနံပါတ် (၂၃) ရန်ကျော်ထွေးအား ဆုကြေးငွေကျပ် (၁၀) သိန်းနှင့် အထိမ်းအမှတ်ဆုတံဆိပ်ကို အားကစားနှင့် ကာယပညာဦးစီဌာန ညွှန်ကြားရေးမှူးချုပ် ဦးထွန်းမြင့်ဦးက ချီးမြှင့်ပေးခဲ့သည်။

ပြိုင်ပွဲတွင် ရမှတ် (၄၄)မှတ်ဖြင့် တတိယရရှိခဲ့သည့် ဟံသာဝတီယူနိုက်တက်အသင်းအား တစ်ဦးချင်းကြေးတံဆိပ်ဆုချီးမြှင့်ခြင်းကို မြန်မာနေရှင်နယ်လိဂ်ကော်မတီဥက္ကဌ ဦးဇော်မင်းသိန်းက ချီးမြှင့်ပြီး တတိယဆုအတွက် ဆုကြေးငွေကျပ်သိန်း (၃၀၀) ကို ရှမ်းပြည်နည်အစိုးရအဖွဲ့ လူမှုရေးဝန်ကြီး ဦးမင်းမင်းလွင်က ချီးမြှင့်ပေးခဲ့သည်။

ထို့အတူ ရမှတ် (၅၁) ဖြင့် ဒုတိယဆုရရှိခဲ့သည့် ရန်ကုန်ယူနိုက်တက်အသင်းအား တစ်ဦးချင်း ငွေတံဆိပ်ဆု ချီးမြှင့်ခြင်းကို ရှမ်းပြည်နယ်အစိုးရအဖွဲ့ စီးပွားရေးရာဝန်ကြီး ဦးခွန်သိန်းမောင်နှင့် ဒုတိယဆုအတွက် ဆုကြေးငွေကျပ်သိန်း (၅၀၀) ကို ရှမ်းပြည်နယ်အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးစိန်ဝင်းတို့က ချီးမြှင့်ပေးခဲ့သည်။

ထို့နောက် ပြိုင်ပွဲတွင် ရမှတ် (၆၂) မှတ် ရရှိကာ ရှုံးပွဲမရှိချန်ပီယံဆုဆွတ်ခူးနိုင်ခဲ့သည့် ရှမ်းယူနိုက်တက်အသင်းအား တစ်ဦးချင်း ရွှေတံဆိပ်ဆုချီးမြှင့်မှုကို အာရှဘောလုံးအဖွဲ့ချုပ်အကြီးတန်း ဒုတိယဥက္ကဌ၊ မြန်မာနိုင်ငံဘောလုံးအဖွဲ့ချုပ်ဥက္ကဌ ဦးဇော်ဇော်က ချီးမြှင့်ပေးခဲ့သည်။

တဆက်တည်း ပထမဆုအတွက် ဆုကြေး ငွေကျပ်သိန်း (၇၀၀) ချီးမြှင့်ခြင်းကို ရှမ်းပြည်နယ်တရားလွှတ်တော် တရားသူကြီးချုပ် ဦးသန်းဦးလွင် ချီးမြှင့်ပေးခဲ့သည်။

ပြိုင်ပွဲတွင် တစ်ရာသီလုံး ရှုံးပွဲမရှိစံချိန်မှတ်တမ်းရရှိခဲ့သည့် ရှမ်းယူနိုက်တက်အသင်းအား Undefeated Champions ဆုဖလားထပ်ဆောင်းချီးမြှင့်မှုကို မြန်မာ နိုင်ငံဘောလုံးအဖွဲ့ချုပ်နာယကကြီး ဦးအောင်ကိုဝင်းက ဂုဏ်ပြုချီးမြှင့်ပေးခဲ့သည်။

ယင်းနောက် ချန်ပီယံ ရှမ်းယူနိုက်တက်အသင်းအား ချန်ပီယံဆုဖလားချီးမြှင့်ခြင်းကို ရှမ်းပြည်နယ်အစိုးရအဖွဲ့ ဝန်ကြီးချုပ် ဦးအောင်အောင်က တက်ရောက်ချီးမြှင့်ပေးခဲ့ပြီးနောက် မှတ်တမ်းတင်ဓာတ်ပုံရိုက်ကူးခြင်းများ ပြုလုပ်၍ အခမ်းအနားအား ရုတ်သိမ်းခဲ့ပါသည်။

မြန်မာနေရှင်နယ်လိဂ် ၂၀၂၄-၂၅ အမှတ် ပေးဘောလုံးပြိုင်ပွဲအပြီးတွင် ရှမ်းယူနိုက်တက်အသင်းက ရမှတ် (၆၂) မှတ်ဖြင့် အဆင့်(၁)၊ ရန်ကုန်ယူနိုက်တက်အသင်းက ရမှတ် (၅၁) ဖြင့် အဆင့်(၂)နှင့် ဟံသာဝတီယူနိုက်တက်အသင်းက ရမှတ် (၄၄) မှတ် ဖြင့် အဆင့်(၃) နေရာရရှိခဲ့သည်။

ထို့အတူ အဆင့်(၄)နေရာကို ရမှတ် (၄၀) ရရှိသည့် ဒဂုံစတားယူနိုက်တက်နှင့်အဆင့် (၅)နေရာအား ရမှတ် (၃၃) မှတ် ရရှိသည့် မဟာယူနိုက်တက်အသင်းတို့က ရပ်တည်နိုင်ခဲ့သည်။

ရှမ်းယူနိုက်တက်အသင်းသည် အမှတ် ပေးချန်ပီယံဆုကို (၆)ကြိမ်မြောက် (၂၀၁၇၊ ၂၀၁၉၊ ၂၀၂၀၊ ၂၀၂၂၊ ၂၀၂၃၊ ၂၀၂၄-၂၅) ရရှိခြင်းဖြစ်ပြီး မြန်မာနေရှင်နယ်လိဂ်ပြိုင်ပွဲ၏ အအောင်မြင်ဆုံးအသင်းအဖြစ် ရပ်တည်နိုင်ခဲ့သည်။