ပင်တဂွန်မှ ယခု သီတင်းပတ် ဆုံးဖြတ်ချက်မှတ်တမ်းအရ ထရန်စ်ဂျန်ဒါ(Transgender)ဝန်ထမ်းများကို စစ်တပ်မှ ထုတ်ပယ်မည်ဟု သိရသည်။ ယင်းသည် ထရန်စ်ဂျန်ဒါဝန်ထမ်းများအား စစ်တပ်တွင် ပါဝင်ခွင့် သို့မဟုတ် တာဝန်ထမ်းဆောင်ခွင့်များကို ပိတ်ပင်လိုက်ခြင်း ဖြစ်ပြီး၊ အဆိုပါမှတ်တမ်းကိုလည်း ဗုဒ္ဓဟူးနေ့တွင် တရားရုံးသို့ တင်သွင်းခဲ့ပြီးဖြစ်သည်။
ဤဆုံးဖြတ်ချက်သည် သမ္မတ ဒေါ်နယ်ထရမ့်၏ ပထမသက်တမ်းအတွင်း ထရန်စ်ဂျန်ဒါဝန်ထမ်းများအပေါ် ထားရှိခဲ့သော ကန့်သတ်ချက်များထက်ပင် ပိုမိုတင်းကျပ်လာခြင်းဖြစ်ပြီး၊ ထရမ့်ကို ထောက်ခံသူများကပင် ယခင်က မကြုံဖူးသော လုပ်ရပ်ဟု ဆိုကြသည်။
ထရမ့်သည် လွန်ခဲ့သောလကပင်လျှင် ထရန်စ်ဂျန်ဒါစစ်သားများကို ဦးတည်သည့် အုပ်ချုပ်ရေးအမိန့်တစ်ရပ်ကို လက်မှတ်ရေးထိုးခဲ့ပြီး၊ “ထရန်စ်ဂျန်ဒါစစ်သားများသည် စစ်သားတစ်ဦးအတွက် လိုအပ်သော ရိုးသားမှု၊ ကိုယ်ကျိုးစွန့်မှုတို့နှင့် မကိုက်ညီပါ” ဟုလည်း ပြောဆိုခဲ့သည်။
ယခုလအတွင်းတွင်ပင် အမေရိကန်စစ်တပ်သည် ထရန်စ်ဂျန်ဒါဝန်ထမ်းများကို စစ်တပ်တွင် ပါဝင်ခွင့်မပေးတော့ဘဲ၊ လိင်ပြောင်းလဲမှုနှင့်ဆိုင်သော ကုသမှုများကို ဆောင်ရွက်ပေးခြင်း သို့မဟုတ် ကူညီဆောင်ရွက်ပေးခြင်းများကို ရပ်ဆိုင်းမည်ဟု ပင်တဂွန်က ကြေညာခဲ့သည်။ ဗုဒ္ဓဟူးနေ့ညနေပိုင်းတွင် ထုတ်ပြန်ခဲ့သော ဆုံးဖြတ်ချက်မှတ်တမ်းသည် လက်ရှိတာဝန်ထမ်းဆောင်နေသော စစ်သားများအပေါ် ပိတ်ပင်ချက်ကို ပိုမိုချဲ့ထွင်လိုက်ခြင်း ဖြစ်သည်။
စာတမ်းတွင် ပင်တဂွန်သည် ထရန်စ်ဂျန်ဒါစစ်သားများကို ခွဲခြားသတ်မှတ်ရန် လုပ်ထုံးလုပ်နည်းများကို ၃၀ ရက်အတွင်း ပြုစုရမည်ဖြစ်ပြီး၊ ထို့နောက် ၃၀ ရက်အတွင်း ၎င်းတို့ကို စစ်တပ်မှ ထုတ်ပယ်ရန် စတင်ဆောင်ရွက်ရမည်ဟု ဖော်ပြထားသည်။
“စစ်သားများ၏ အသင့်ပြင်ဆင်မှု၊ ရန်သူကို သတ်ဖြတ်နိုင်စွမ်း၊ စည်းလုံးညီညွတ်မှု၊ တစ်သမတ်တည်းဖြစ်မှုနှင့် ရိုးသားမှုတို့အတွက် အမေရိကန်အစိုးရ၏ မူဝါဒမှာ သက်ဆိုင်သလို အမြင့်မားဆုံးသတ်မှတ်ချက်များ သတ်မှတ်ရန်ဖြစ်သည်” ဟု ဖေဖော်ဝါရီ ၂၆ ရက်နေ့တွင် ရက်စွဲပါ ဆုံးဖြတ်ချက်မှတ်တမ်းတွင် ဖော်ပြထားသည်။